Le Blog de Marie Toutoule

Chalut mes gins ! J’lisos dins l’journal que cha y est, ches chinois is ont lanché leu fusée dins l’eschpache. Cor’ des millions qui von’tent s’involer auchi vit’ que ch’prix du baril d’pétrole. In peut s’d’minder, mi, j’treuve que ch’est à juss’ tite, chi ch’est bin l’momint d’aller vir quo qui s’pache aud’chus de ch’couche d’ozone alors qu’i vaudrot miux qu’in s’in préoccupe pus d’ind’chous !

Alors après ches cosmonautes, ches astronautes, in est parti pou l’ère d’ches taïkonautes. Déchidémint, ches chinois is ont vraimint invie d’montrer à tertous qu’is sont des vainqueurs et qu’ches médalles aux kilos qu’is ont eues à ches JO, cha n’est pon cor’ assez.
Alors, mes gins, in pourrot épiloguer pindint du long. Savoir chi ch’est intéressant d’aller faire un tiot coucou à toute cheule colonie d’drôl’tes d’ojieaux, qu’in appel’te chatellites, par ches timps qui cour’tent. Chi ches chinois, is avotent vraimint b’soin d’mette eune étiquette made in china su un chuppositoire géint. Seu indrot cor’ d’ù qu’is n’avotent rin fait. A m’mote, ches gins dins l’misère in Chine, cheuls qui restent dins ch’qu’in peut nommer l’trou du cul de ch’Monte, is von’tent avoir du mau à accepter d’printe un chuppositoire com’ ch’ti-lal !

In a d’jà tint d’trucs à armette dins l’bion sins su Tierre, nin, i fot qu’in s’occupe d’ailleurs. Infin tout cha pou in v’nir à une tiote phrasse d’Confucius. Ches chinois devrotent l’arlire d’timps in timps. Li, i avot d’jà armarqué, à sin époque, qu’in s’occupe toudis d’quo qu’i n’fallot pon d’abord ! J’sais, mes gins, qu’ch’est un sujet compliqué pou un ouiquen mais in peut auchi explorer cha ichi et dev’nir toutoul’naute…