Le Blog de Marie Toutoule

Chalut mes gins ! Dins un monte d’ù qu’in est soumis à d’el pub in permaninche, chertains publichitaires sont toudis in train d’cacher d’ù qu’is peufent cor’ in mette. Quo qu’is n’ont pon cor’ exploité ! Même chi, nou’z’autes, in a l’imprechion que tout i l’a d’jà été fait, ch’est pach’qu’in n’compte pon su l’originalité d’ches gins-lal.

In peut constater que tout i est propiche à l’pub. A la tévé, in t’in met in veux-te, in v’là. In va t’annoncher que ches nuaches is arrif’tent aveuc cheule carette Darty. Is peufent auchi t’annoncher du solel. Ch’est du parel à même, is vintent auchi bin des vintilateurs que des radiateurs électriques ! Dins t’boîte à lettres, d’timps in timps t’artreuves du courrier mucher dins eune tonne d’pub. In peut s’souv’nir qu’is avotent même essayé d’mette ches pubs in autocollint su ches pièces d’monnaie, intre autes ! Mes gins, in Nouvielle Zélande, in a treuvé miux à faire. Eune compagnie aérienne, dins ch’pays, alle a fait eune étude et alle a armarqué qu’i y avot gramint d’attinte dins ches aéroports. Qui dit attinte, dit queue. Et quo qu’in fait pindint eune queue ? Rin, à part pester que cha n’va pon assez vit’ ou qu’sin voisin ded’vant i sint trop l’trinspiration. Mais ches zis, is von’tent raviser un peu partout. Churtout su ch’ti qui est d’vint ti ! Alors ches publichitaires is ont eu l’idée d’payer des chauves pou faire l’queue dins ches aéroports aveuc un messache publichitaire gravé su l’nuque ! Incroyape !
Mi, j’te l’dis, mes gins, à m’mote, i va y avoir gramint d’chutes d’queveux dins ches aéroports New zélandais quind in va savoir qu’cha rapporte. Presque chinq chints euros à ch’ti qui accepte d’trinsformer ch’boîte crânienne in eschpache publichitaire. Chi te veux arrondir tes fins d’mos, i faudra vit’ que te prennes un stock d’tondeusses in promo pou aller ouvrir un stand à la sauvette à côté de ch’t’aéroport. Qui n’a pon ch’tondeusse ? Alle est bielle m’tondeusse ! Alle est garintie un in !
Fot bin admette qu’i va y avoir des gins favorisés. Tous cheuls qui ont l’grosse tiête ou qui ont l’tiête com’ eune montgolfière. In va d’voir leu payer un supplémint pisqu’in pourra in mette pus ! In fait, in n’dira pus cha, qu’is ont l’grosse tiête. In dira : ch’ti-lal, i a l’tiête com’ un quate par tros ! Pou cheuls qui n’el sav’tent pon, un quate par tros, ch’est in mètes. Ch’est l’talle stindard d’un pannieau d’pub ! Imagine auchi qu’in France, in va ête privilégiés. Intre ches grèfes d’ù qu’ches gins is attind’tent désespérémint un avion pach’que, eune fos, ch’est ches contrôleurs aériens qui n’sont pon contints. L’fos chuivinte, ch’est l’personnel d’bord. Et cor’ l’fos d’après, ch’est l’pilote qui ch’est cassé un ongle ! In va même proposer à ches publichitaires d’raviser lal d’ù i y a des trains ! Une parienthésse, in France, au lieu d’acater le Figaro, in l’payera pou qu’i rase ches crânes ! Vingt dius, j’in connos qui von’tent avoir b’soin d’sous-tites pou comprinte l’feinte ! In pus, alle fonctionne auchi bin dins ches aéroports que dins ches gares…
Bion, com’ ches publichitaires is ont b’soin d’idées, mi, Marie Toutoule, j’vais am’ner m’tiote contribution. J’vos cor’ des trucs à faire. In peut utiliser l’PQ pou faire d’el pub. Ches vécés, ch’est un indrot d’ù qu’t’as du timps pou ti. Ch’PQ, t’as larg’mint l’timps d’el raviser. In pus, in peut même faire des pubs à épisodes. Ch’est l’mote. Au bout d’eune s’maine, te sauras d’quo i in artourne aveuc cheule phrasse et pou qui t’as dû t’obliger à faire pus d’popos pach’qu’in t’avot titilé l’curiosité !
Cor’ un indrot fachile qu’in peut prévoir. Dins l’même ginre que ches crânes. Dins un cimp d’nudistes. In peut proposer à chertains d’mette des pubs. Cha n’est pon l’plache qui minque ! In peut chibler in fonction d’quo in veut vinte. Su ches fesses, l’pub pou l’dernier PQ, cor’, bin ouais. Ch’ti qui est pus épais que ch’t’épais. Qui est doux et qui n’abîme pon ches fesses. L’preufe in direct ! Pou ches dames, eune nudiste aveuc su ches gambes ch’dernière crème dépilatoire. In pus, in peut faire eune gambe aveuc, eune gambe sins. Avint, après, ravisez com’ alle est efficache, cheule crème !

V’là, mes gins. In n’va même pon pinser à ch’qu’in pourrot faire aveuc ches hommes ; l’jour d’ù qu’in vind l’viagra in parapharmachie. Chi, in va l’faire, j’vos bin qu’cha t’intéresse : « Avint, j’avos un cop d’mou, dirot alors un nudiste-publicité. Mais à’ch’t’heure, grâche à viagra, j’ardréche l’situation dins toutes ches circonstinches. In pourra même li proposer eune campagne conjointe aveuc Durex !