Chalut mes gins ! A’ch’t’heure, j’n’ai pon invie d’te parler d’un sujet grafe. Nin, i fot auchi savoir s’détinte. In pourrot app’ler cha d’el RTT, Report Timporaire d’Traval. Histoire qu’in n’arrife pon trop fatigué in ouiquen. I n’minqu’rot pus qu’cha qu’in sot obligé pacher sin timps à dormir pou récupérer d'ches heures d’ouvrache au lieu d’in profiter ! Hé, ti, j’te vos ! J’n’ai pon dit qu’i fallot dormir à tin burieau ! J’n’sign’te pon ches miots d’esscusses, j’te préviens !

Ouais, cha partot d’eune bionne attintion d’em part, te distraire, mais n’y a pon gramint d’cosses d’drôl’tes qui s’pachent  in ch’momint. In parl’te toudis de ch’même truc aveuc un miot qu’in a pon l’drot d’dir’te. Mais in a oublié, infin mi, d’te parler de ch’salon d’el carette. Ch’est importint, mes gins. I n’fot pon oublier que, chi te n’arrifes pon à boucler ches fins d’mos, cha n’coûte rin d’rêfer d’eune bielle carette aveuc tout sin confort. Infin, ti n’rêfes pon trop, pach’que l’file qui est appuyée su l’carette, alle n’est pon livrée aveuc !
Alors, i fot bin l’avouer, quind te vos ches carettes, in s’deminde pouquo alles n’conduis’tent pon toutes seu. Ch’est plein d’gadgets qui pinsent à t’plache. Mais, nin, t’es cor’ obligé d’tenir tin volint, d’appuyer su ches pédales et d’juer aveuc l’minche qui est dins l’mitan ! Infin, pon pou tertous car t’as ches automatiques. D’autint qu’t’as d’jà ches bazars qui t’dis’tent quind qu’ch’est te dos tourner à drote, quind qu’ch’est qu’te dos tourner à gauche. Et pis, quind t’arrifes, is t’dis’tent même que t’es à dechtination. Ch’est tout juss’ chi l’système i n’t’invoie pon ches bravos ! Bravo min gars ou file (parité oblige), même chi t’as eu du mau à artreuver t’drote de t’gauche, heureuss’mint qu’ches satellites t’avotent à l’oeul. Chinon, te s’ros cor’ in train d’tourner in rond com’ un babache !
J’ai vu un nouvieau gadget pou ches gins qui s’indorm’tent au volint. Te sais, cha fait parel que cheuls qui téléphon’tent in conduisint. Is fon’tent des zigs, is fon’tent des zags. Ch’est des drôl’tes d’zigs, quo ! A’ch’t’heure, t’as ch’carette qui va réagir. Cha, alle est com’ ti ! Alle attrape des hauts d’cœur com’ dins ches routes d’montagne. Donc, in a mis un système d’vibreur chous l’sièche du conducteur. In aurot pu faire un système qui li met eune baffe, in plein dins s’guiffe, pou l’révéller. Mais i fot croir’te qu’in a treuvé cha trop radical. Churtout chi in met des leunettes. Pach’que, pou l’cop, in les perd aveuc l’baffe. In n’vot pus rin, et au lieu d’éviter l’décor, in rinte d’dins ! Mi, j’n’sais pon chi l’cop du vibreur, ch’est une bionne idée. J’in connos qui von’tent faire essprès d’faire du zig et du zag pou qu’cha leu vibre chous ches fesses ! Pou l’peu qu’t’as in pus ch’téléphone qui vibre, li-auchi… Ving dius ! In va vit’ ête in présinche d’carettes tamponneusses dins l’esstasse général.
In fait auchi d’pus in pus attintion à ch’que cha pollue moins. I s’rot quind même timps qu’in fasse pus d’efforts pou cheule planète. Infin, in peut armarquer qu’ches fabricints is travall’tent pus vit’ d’pis qu’in a mis un bonus-malus. Mi, j’dis cha… Alors, in t’parl’te d’bio carburint. Cha n’a rin à vir aveuc un puis d’pétrole qui s’rot arroser sins ingrais, nin ! Ch’est ch’qu’in peut faire aveuc ches produits com’ ch’colza, par eximpe. J’n’sais pon chi t’as vu qu’in pouvot auchi rouler à l’huile d’friture. Ch’est eune idée qu’alle est bionne. Mais chi te mets l’huile dins l’quelle t’as fait ch’friture aveuc ches pichons de t’pêque. Te m’el dis pou que j’roul’te d’vint ti !
In a auchi parlé d’hydrogène et forcémint d’carettes électriques. Te armarqu’ras, quind in dit électrique, qu’in n’te parl’te pon d’carettes à éolienne, même chi ch’est à l’mote. In aurot bin trop peur qu’cha fasse hélicoptère ! In pus, cha n’est pon pratique pou pacher chous ches ponts et pou la rintrer dins tin garache. Par conte, mes gins, in pourrot infin vérifier eune esspression. Quo ? Te n’as jamais intindu quéqu’un qui d’mindot chi te voulos raviser sin moulin. Lal, cha prind tout sin sins !
Tout cha, ch’est pou rir’te. In n’est pon prêt d’vir ch’carette com’ Doc dins retour vers l’futur. Pourtint, cha s’rot bin. In n’aurot pus b’soin d’sortir ches poubelles. In mettrot tout dins ch’bazar qu’i appel’te l’convecteur timporel, et hop ! In voiture min Jean-Marcel, j’conduis, te fais pouët pouët !

V’là, mes gins. In n’a pus qu’à attinte d’vir quo qu’is von’tent cor’ no invinter pou ches années à v’nir. Mais, mi, j’ai forcémint eune solution. Alle t’coûte rin in essinche. Ch’est bion pou tin porte-monnaie. Alle n’pollue pon, mais vraiment pon, et te peux auchi faire pouët pouët aveuc un bidule !

Chi te veux découvrir min salon d’el carette, te cliques such’ logo entrée…