Chalut mes gins ! Ches jours is ch’suiv’tent et… ch’arsimp’tent ! Ch’est toudis ches mêmes qui monopolis’tent ches actualités et, pindint ch’timps-lal, in n’sait pon quo qu’i y a d’aute. Chi te n’sais pon d’qui j’veux parler, te peux arlir’te ches deusse artiques préchédints. Pourtint, i dot ch’in pacher quind même. Chi t’as un grind rideau d’fumée à drote, ch’est chertain’mint pour masquer un fu à gauche. I n’y a pon d’raison, dins l’aute sins, cha march’te toudis. Alors, in va essayer d’raviser cha insimpe…

Ah, bin, ouais, ch’est fachile à dir’te, mais in n’sait pon quo qu’alle d’vient Titine. Cha n’va nin ête fachile d’savoir. I y a bin sin porte-parole, min Benoît Hamon goût, mais in a l’impréchion qu’in li a inl’vé ches piles d’pis sin histoire aveuc min Freddy. Just’mint, Titine alle a été occupé à li faire la l’chon : Honte à ti, min Benoît ! In ne ch’attaqu’te pon à un homme com’ te l’as fait ! Chi te rajoutes ches chous-tites, te peux n’ête sûr’te qu’alle aura pinsé qu’in ne ch’attaqu’te pon à un Mitterrand. Te t’rinds compte ti, ch’est l’symbole d’euch timps d’ù qu’ches rosses alles avotent cor’ des bionnes épines, pour piquer à vif ch’camp adverse. Des rosses vigoureusses, d’pleine tierre, pon toute ch’te produc’chion d’jônnes rosses sauvaches qui préfèr’tent toudis l’solitaire à ch’bouquet ! Pis, alle a d’jà ch’fantôme d’euch père François qui dot assez chouvint v’nir li catouller ches dogts d’pids. I frapp’te un cop quind i arrif’. Ch’est ch’fameux cop d’euch père François. Ch’est qu’i n’dot pon ête contint, Tonton. Alle mèn’te ch’barque com’ l’commindint d’euch Titanic et cha n’li fait nin plaiji ! In même timps, mes gins, quind t’as ch’glachon li-même à ches commindes…

Bref ! I n’faut pon réveiller ches echprits et churtout ch’ti-lal, in ch’attaquint à sin n’veu ! Ch’est nin de ch’faute, à min Freddy, chi à forche d’avoir parler d’ches clachiques d’euch cinéma, un film com’ coiffeur pour dame, cha li a donné l’invie d’étudier d’pus près ches bigoudis ! In parlant d’bigoudis, in li a armis eune couche à Titine. Nin, alle n’a pon fait com’ Ségolène à ch’Zénith ! Figure-ti, mes gins, qu’i ch’est paché qué cosse dins ch’gare d’Lille-Flandres. Bah, nin ! Ch’est pon pach’que ches trains is sont arrivés à l’heure… Un touriste allemand i a comminché à ch’dégourdir l’bigoudi in pleine gare. Ch’est eune gamine d’seize ins qui a ravisé che chpectaque et qui a été choquée. Bah, ouais, mes gins ! Ch’pauf’ allemand i a dû querre su l’seu deschindinte d’Jeanne d’Arc cor’ in vie. In même timps, j’em dis qu’cha n’est pon pochipe, puich’que Jeanne alle étot puchelle. Cor’ eune immaculée concepchion , à moins qu’alle n’sot pus chelle qu’in crot. A’ch’t’heure, l’jônne file n’a p’t-ête pon voulu dir’te à ches parints qu’alle in a d’jà vu d’autes…

Ch’est cor’ un problème qui quée su l’dios d’Titine, alle est prisse intre deusse caïlles. D’un côté, i minqu’te gramint d’solel à Lille pour dir’te qu’el capitale d’ches Flandres alle d’vient l’première ville naturiste d’ù qu’i n’y a pon d’ieau. La Deûle ? Mouais, pon convaincue ! Tout cha, ch’est à causse d’alle. Ch’est ch’qui arrif’ quind in met des gros bébés nus pindint des mos d’vint l’gare. Ches gins, qui vienn’tent pour l’première fos pindint un tel déballache ou qui ont ravisé ches photos su Internet, is ch’imagin’tent que ch’est chertain’mint eune tradichion locale. In a bin ches moules… Oops ! J’cros qu’in va m’mette un –18. Pardon, je n’le f’rai pus ! Quind in ravise l’opchion deussième caïlle, ch’est guère miux. Alle fait tout pour attirer ches touristes. Li, in n’ch’est même pon préoccupé d’savoir ch’i allot bin. Quo ? Ch’est quind même l’moinde des cosses. L’gare Lille-Flandres alle est l’palais d’ches courants d’air. I a dû attraper frod. Te m’diras, ch’est chertain’mint pour cha qu’i va voulu récauffer sin bigoudi. A’ch’t’heure, ch’est trop tard, je n’sus pon convaincue qu’i n’aura pon l’goutte à ch’nez d’toute fachon…

Te comprinds auchi pourquo qu’Titine a été dichcrète d’pis un chertain timps. Alle a été occupée et, auchi, préoccupée. Chi bin qu’in a eu eune rumeur com’ quo alle voulot donner ch’démichion. Toute ch’te préchion qu’alle a, alle n’avot pon l’invie d’finir com’ ches gins d’France Telecom. De ch’douche du matin jusqu’à ch’tisane du choir, d’ù qu’alle sait qu’alle va avoir l’visite d’euch fantôme François, alle pach’te sin timps à canter : « J’ai besoin qu’in aime, mais perchonne i ne comprind ce que j’espèr’te et que j’attinds. J’ai bieau in faire pus que trinte-chinq heures. Perchonne i vot com’ j’em démèn’te pour min parti, et pis à’ch’t’heure, je me sins… Mal aimée, je n’sus qu’eune mal aimée. Ches gins me connaiss’tent tel que je veux leu montrer. Mais est-che qu’is ont querché à vir derrière m’tiête d’interr’mint, qu’i y a eune boute-in-train muchée tout in dedins… » Ouais, mes gins ! Un fantôme François i peut in mucher un aute…

Un grind momint d’déprime. Alle étot d’jà prête pour sin dernier jour. Alle n’avot pus qu’à arjoinde che cim’tière d’ches éléphants. Bah, ch’est ch’qu’alle a fait ! Alle a artreuvé Riri, Fifi, Loulou. Ch’est leu nom d’code. Riri, pach’que Béber, cha fait Béber l’dromadaire. Quind in est un éléphant qui ch’appell’te Bertrand (tiens, cha rime), cha n’le fait pon. Fifi, cha sonn’te miux qu’Fafa car Laurent i n’a pon querre à cha. Pis Loulou, forchémint ch’est min DSK. Ch’est pon compliqué, te mets un jupon près d’li et te vas vir qu’ch’est un sacré loulou ! Bref ! Is n’on’tent pon hésité à li donner un stimulant…

Ch’est un truc qui march’te à tous ches cops. Com’ alle n’étot pon gramint sortie d’euch mairie, toudis à ch’prinde l’tiête aveuc ch’t’Allemand, alle étot pachée à côté. Alors, quind alle a intindu ches tros éléphants prononcher Sarkozy, même ch’i s’agissot d’euch fiston, cha li a fait d’l’effet. Tel un diape qui sort d’euch boîte, cha l’a fait bondir. Un nom à n’pon dir’te, cha li donn’te des boutons. Te vos, ch’est cor’ l’preuf’ qu’ches éléphants is on’tent eune bionne mémoire. Is ch’rappell’tent toudis du bouton d’ù qu’i faut appuyer pour la faire démarrer ! Infin, in vot qu’el machine alle est grippée, pach’que cha n’a pon fait gramint d’bruit. Bah, nin, mes gins ! Quind j’dis grippée, ch’est pon l’peine d’commincher à sortir tin machque et t’lochion alcoolique. Ch’est quo ches manières ?

Mes gins, qu’est-che qui va falloir faire pour qu’alle sorte d’euch déprime et qu’alle arcomminche à mette d’euch cœur à l’ouvrache com’ alle savot l’faire. Min Freddy, cha n’l’a pon fait disjoncter. Min Benoît, i a archu un savon, mais i est chertain’mint pardonné. Commint qu’in peut résister à min Don Juan ! Le tiot Prince, ch’est vrai qu’cha l’a fait bondir, mais chins pus in fin d’compte. Te cros qu’chi in li annonche que ch’quinsse, ch’est l’momint d’payer ch’taxe fonchière, cha la f’ra sortir d’sin silinche. Bah, cha nin ! Tertous i est d’jà au courant d’pis longtimps. Alors… j’arposse l’même quechtion : Quo qu’i va falloir ?