Chalut mes gins ! Cha chahute. cha bouscul’te. In annonche un avis d’timpête, chi cha n’est pon un avis d’cyclone, voire un tsunami ! Ah, bin, nin, mes gins ! Cha n’est pon pach’qu’in a eu l’drot à un cours d’météo par Laurence Ferrari, pindint ch’journal, hier choir, qu’j’ai déchidé de m’arcycler pindint l’nuit. Quoque, te n’treuves pon que j’ai un faux air d’Evelyne Dhéliat ? Ch’ti qui dit ouais par timps d’brouillard et d’dios, i va avoir affaire à mi ! Bref. Chi in d’vot résumer ch’journal, cha a été un rapide passache par Hautmont, d’ù qu’ch’étot prévu qu’in interrog’te ches habitants. Cha ch’est traduit par eune famille seul’mint, pon d’timps, chertain’mint, car i fallot qu’in montre que Laurence alle n’est pon eune femme tronc. In a pu raviser qu’alle avot des gambes, com’ Claire Chazal, l’sam’di midi, pour faire com’ ch’te présintatriche d’euch journal d’el chix. Pis, in a eu l’drot a un aute mouv’mint timpétueux…

Vingt dius ! In peut dir’te qu’min couple d’amis Paul et Mick i est gramint sollichité in ch’momint ! Is n’on’tent pon eune minute d’répit. V’là t’y pon qu’min Benoît Hamon goût i ch’est mis dins eune colère noir’te, du moins rosse très, très foncé. I l’a jué bieau brun coléreux, après bieau brun ténébreux ! Et le v’là parti in croisate conte min Frédéric Mitterrand et cha mauviaisse vie ! Haro su ch’baudet ! Infin, su Freddy. Bah, ouais, mes gins, com’ j’n’oublie pon qu’min Frédéric i  adore ch’cinéma, j’ai chosi Freddy, histoire d’ajouter eune touche d’diabolisachion. Pis, ch’est auchi pour faire d’el culture cinématographique. Pach’que, chi tertous i ch’souvient des griffes d’el nuit, i n’faut pon oublier qu’i y a eune des suites qui ch’appell’te l’infint d’euch cauchemar ! Toute l’colère d’min Benoît, alle vient d’là, et pon du blues. Cha, ch’est Johnny. Alle vient qu’i avoue, dins sin lif’, avoir fait d’euch tourisme sexuel dins sin jeune timps !

Ah, ouais, cha n’le fait pon ! D’pis l’timps qu’in traqu’te ches gins qui pratiqu’tent des visites guidées autes qu’pour raviser des monumints historiques. Churtout quind in t’sort cha eune bionne s’maine après Polanski. D’ailleurs, d’là à pinser qu’i y a complot, i n’y a pon loin. In effet, sin lif’ i n’est pon sorti hier, mais in 2005 ! Min Benoît i a dû imprunter l’eximplaire d’Marine Le Pen. Ch’est eune chpécialiste in la matière. Ch’est d’jà alle qui avot découvert que Danny La Verdure i ch’étot laiché tripoter par des tiots garchons, quand i étot cor’ Danny ch’Rouche. Ch’est, d’ailleurs, p’t-ête pour cha qu’i ch’est mis au vert… J’vais prinde un parallèle osé, mais Marine alle est eune sorte d’Serge Klarsfeld. Li, i chassot ches nazis. Alle, alle chass’te ches toucheux d’zizis !

Bin, qu’est-che qu’is on’tent tous à écrir’te cha, auchi ? In a l’impréchion que, pach’qu’is l’on’tent avoué dins un lif’, in va leu pardonner. Péché avoué à mitan pardonné ? Mouais… Ch’est quind même pon com’ ch’is avotent volé eune peumme Gala su un marché à Fives ! Forchémint, com’ alle avot churligné l’passache, min Benoît i a lu qu’min Freddy i f’sot référinche à ches amours aveuc des tiots garchons durint ches voyaches. Et Titine dins tout cha ? Bin, ouais ! Normal’mint, min Benoît i porte cha bionne parole. Ichi, nin. Ch’est d’sin propre chef. Infin, fachon d’parler, puich’que, just’mint, Titine alle n’a pon cor’ invité Paul et Mick pour in parler. Alle n’a pon lu sin lif’, à min Freddy. Bah, nin ! D’pis 2005, alle a eu gramint d’cosses à faire et à’ch’t’heure, com’ i arcomminche à faire frod, alle ch’est armisse à ch’tricot. Cha ard’vient à l’mote, i faut croir’te. Min inquêtriche, Bridget Columbo, alle vient d’em dir’te qu’alle auchi et min camarate canteur Pat’Bol i a rêvé d’ête su l’couverture d’Modes et Travaux. Cha n’ch’invinte pon, mes gins ! Bisous à ches deusse. D’ailleurs, min Pat’Bol, j’attinds toudis des bulles pour fiêter tin anniverchaire !

Désolée, ch’étot un messache perchonnel. In va arv’nir toud’chuite à l’affaire d’euch jour. Alors, in n’est pon ichi pour dir’te qu’in li fiche l’paix. Ch’est vieux, ch’est nin graf’. loin d’mi ch’te pinsée. Ch’est même horribe ! Parel, in n’est pon ichi nin pus pour crier, haut et fort, qu’i faut qu’i démichionn’te. Je n’vais pon ajouter eune couche à ch’t’histoire. Chacun i che f’ra sin opinion. Quoque j’auros querre à rafraîchir ches mémoires. J’vais rajouter eune couche in fin d’compte. Je n’sais pon chi te t’rappell’tes, mais ch’est quind même l’premier homme à avoir eu l’drot d’adopter un adoleschint. Bin avint qu’in ch’posse l’quechtion chi un couple d’hommes i pouvot adopter… Merchi Tonton ! Ch’est sûr’te, ch’i avot déclaré fumer des joints, alors qu’in sait tertous qu’i n’est pon plombier, cha aurot chertain’mint fait rache auchi. D’autint qu’i y a eune campagne d’informachion conte l’drogue, in ch’momint, à l’TV… D’pis qu’i est arrivé à ch’gouvern’mint, j’ai frinch’mint l’sinsachion qu’i déring’te gramint d’monte. I ch’fait bousculer aveuc Hadopi pour sin baptême d’ministre d’el culture. I ch’fait bousculer lors d’euch visite à ch’fiête d’l’Huma. I aurot dû faire profil bas et n’pon prinde parti pour Polanski.

A’ch’t’heure, le v’là bin immerdé pour faire sin traval. Bin, ouais, mes gins ! In tint qu’ministre d’el culture, cha n’va nin ête fachile. Imagine qu’i dot aller à un conchert d’Yves Duteil. Pus quechtion ! In s’rot capape d’lir’te dins ches journaux, dès ch’lind’main, qu’i étot présint uniqu’mint pach’que l’canchon qu’i préfèr’te ch’est prinde un infint ! Mais cha n’est pon l’seu. In treuve auchi, dins sin répertoire, Pour l’amour d’un infint et Pour les infints d’euch monte intier. Petite fille, mais cha l’intérèche moins. J’irai vir tes parints, mais cha m’étonn’rot qui von’tent appréchier. Deusse infints du Tamil Nadu, ch’est interdit auchi. Che qu’min d’euch pays d’ù qu’tout i est pochibe, terminé, ch’poliche alle veill’te. L’infint poète, même pon in rêve, même chous ch’prétexte que ch’est d’el culture.

Mes gins, qué malheur ! D’voir pacher à côté d’tous ches chefs d’œuvre, juss’ pour ch’faire oublier. J’ai ch’guitare qui m’déminge ! Li, cha dot ête à un aute indrot… In va p’t-ête li laicher acouter Tous ches drots d’ches infints, Le mur d’el prison d’in face et Un aller simpe pour l’infer ! Pis, cha n’est pon tout. I y a cor’ pir’te ! Fini Enrico Macias, Min Frère Tour, poïe, poïe, poïe, poïe ! Va falloir éviter infints de tous pays ! D’autint qu’i a avoué, li-même, qu’i avot d’jà pratiqué des infints d’tous pays et chertain’mint d’toutes ches couleurs… Bion, in n’est pon drôl’te. In li f’ra intinde Malheur à ch’ti qui bless’te un infint. Terminé auchi d’acouter ches hits d’euch momint. Et bin, chi ! I y a Cœur d’Pirates qui cante Com’ des infints. Alle dit dins ches paroles : « Et in ch’prind l’main com’ des infints. » Pis, ch’t’arfrain : « Et t’as querre à mi cor’, et mi j’ai querre à ti cor’ pus fort… »

Mes gins, je n’peux pon m’impêcher d’in caser eune tiote dernière. Même chi, in tint qu’ministre d’el culture, cha n’euch limite pon à l’canchon. I y a auchi ches films, com’ Halfaouine, l’infint d’ches terraches et j’in pach’te. Des peintures et autes… Pis, chertain’mint, des romans com’ Harry Potter. Ch’est tous des gamins, cha pourrot vit’ ch’trinsformer in A Tripoter… J’vais donc arv’nir su eune canchon qui est com’ un hymne à l’France. Ch’est normal, mes gins, ch’est l’dernière fos qu’in a gagné ch’t’concours d’l’Eurovision, in 1977. Année d’ù qu’i d’vot cor’ chertain’mint pratiquer sin tourisme. Chi in ch’armémore ches paroles, alles prenn’tent eune aute diminchion : L’ojieau et l’infint. A tin avis, mes gins, d’quo qu’in parl’te quind in dit ojieau ? J’in vos d’jà qui sont in train d’pinser qu’Marie Toutoule alle n’in loup’te pon eune. Qu’alle vot ch’mâle partout ! Pardon, ch’mal partout, j’étos juss’ in train d’arpinser à min Benoît…

Bref, j’arviens su ches paroles, que j’vais armette aveuc ch’nouviel éclairache. Juss’ un extrait, i faut rechter corréque su ches sujets déringeants : « Com’ un infint aux zis de leumière, qui vot pacher au loin un ojieau. Ch’ti d’min Freddy qui fait l’tour d’el Tierre, à la recherche dins tiot bellot… » Ch’tiot arfrain quind même, pour bin t’armémorer l’canchon : « L’amour ch’est ti, l’amour ch’est mi. Ch’t’ojieau ch’est pour ti, ch’t’infint ch’est pour mi. » Dins l’verchion originale, is on’tent juss’ oublié ches « pour », que j’em sus permisse d’rajouter…

V’là, mes gins ! I valot miux traiter cha aveuc des canchons, cha adouchit ches mœurs. Churtout quind ches mœurs in quechtion is sont particulièr’mint déringeants. A qui ch’tour, j’ai invie d’dir’te pour conclur’te ? Qui va cor’ faire une déclarachion d’tripotache ? Pis, après, va y avoir ches autes perverchions. Alle a jué dins un porno quind alle ne f’sot pon cor’ d’el politique. I met ches porte-jarr’telles d’euch femme chous sin costume, quind i fait un dichcours, etc.. Bah, nin, j’ai pon cor’ ches noms, mais cha viendra !