Chalut mes gins ! Commint cha va par ch’bieau début de s’maine ? Un lundi écossais. Ouais ! Ch’timps i chang’te toutes ches heures, in ch’crorot in Ecosses. In va laicher ch’timps, in a d’autes cats à fouetter. Faut bin qu’in ravise insimpe tout ch’qui ch’est paché pindint ch’ouiquen ! Euh ! J’cros que j’vais prinde un jus d’fruit. Pardon, j’voulos dir’te un joker. Chi in résume quo qui ch’est paché, in peut chiter deusse noms : Frédéric Mitterrand, cor’ li. Ch’est même dev’nu eune affaire à li tout seu. Pis, Sarkozy. Mais lal, attinchion, mes gins ! Un Sarko i peut in mucher un aute. I n’s’agit pon d’min Nicolas, mais d’euch tiot Prince ! A part cha, i n’y a pon gramint d’autes cosses, sauf un truc mais je n’in parl’rai pon à’ch’t’heure…

In va commincher par ch’tiot Prince. Nin ! In n’va pon vir chi in sait cor’ commint ch’déchine un mouton, mais plutôt pourquo, li-auchi, i a été invité par mes amis Paul et Mick. Ch’est pus chouvint sin père, Ro d’France, qu’li ! Ichi, tout raffut, ch’est pach’qu’min tiot Prince i d’vrot bintôt dev’nir présidint de l’établich’mint public d’el Définche. Bah, ch’est gramint long à écrir’te su eune carte d’visite. A moins d’avoir un A4. Ch’est bin pour cha qu’in in a fait un acronyme : EPAD. In fait, ch’est un quartier réservé à ches affaires, mais cha, in l’savot d’jà. Ch’i est élu, i aura ainchi sin territoire. Cha s’ra eune sorte d’princhipauté, mais chins l’mer et gramint moins d’solel…

A ch’sommet d’el Définche, i faudra qu’i fasse attinchion. In l’attind à ch’tournint. Quo qu’i in sot, cha armue gramint d’monte, avint même qu’i ait atteint ch’premier étache. Alors cha promet... Ma Ségolène, sœur d’euch Grind Pardon, prêtrèche ès fra-ter-ni-té, alle dit qu’i n’aurot même pon eu eune chince d’ête proposé ch’i n’avot pon eu un nom parel. Qu’i s’agit lal d’eune graf’ atteinte à ches valeurs d’el République ! Rin qu’cha, mes gins ! Bion, in même timps, ch’est Ségolène. Alle fait gramint d’bruit, mais alle n’mord pon. Du moins, je l’espèr’te ! Du cop, j’em sus d’mindé quo qu’alle voulot bin dir’te par lal. J’ai eu l’vision d’min tiot Prince su d’el Définche et j’ai compris. Eune sorte d’remèque d’King Kong à l’françaisse. Li, su ch’sommet d’el tour, richquant à tout momint d’mette in péril toutes ches affaires d’euch pays. In pleine crisse, j’in ai frod dins l’dios !

Vu l’nombe d’gins qui li tir’tent d’chus, j’ai gramint peur qu’el fin alle sot parelle à l’verchion première. Te m’diras, mes gins, ch’i quée, in mettra eune suite à ch’t’acronyme : EPAD’tatra… Pis, j’sus sûr’te qu’in treuv’ra quéqu’un pour dir’te EPAD’bol ! In l’avot bin dit que ch’gamin i EPAD’égourdi et qu’ch’est juss’ grâche à sin père. Après, t’as ch’club des gins qui diss’tent qu’i est trop jônne, vingt-tros ins. Pach’qu’in fin d’compte, ch’est auchi ch’qu’in li arproche à ch’point d’avoir linché eune pétichion. Pis, in dit qu’i n’a pon ches compétinches requisses… I a sin bac, mes gins ! Attinchion, ch’est quind même pus qu’un bac à sape ! Infin, te comprinds auchi qu’in peut vit’ monter à ch’sommet même chins avoir fait des études pouchées. Ch’est ch’qu’in appell’te du népotisme…

In va faire eune séquinche vocabulaire avint d’continuer. I faut t’y habituer, ch’est pon un miot qu’in peut caser tous ches jours. D’ailleurs, j’avos fait l’pari qu’j’allos l’placher dins min artique. Pour ch’ti qui est d’jà in train d’euch préchipiter dins ch’dico, ch’est l’acte d’favoriser un proche. In d’autes termes, ch’est ch’fameux cop d’piston. Ichi, in l’occurrinche, un cop d’piston pour ch’fiston ! J’vais écrir’te ch’définichion, in ne ch’instruit jamais assez. N’pon confonde aveuc chins ch’truie qui est un cochon célibataire, mais cha, te l’savos d’jà ! Donc, miot pour miot ch’est : Che népotisme est un abus d’influinche et d’autorité qui génèr’te des injustiches in écartant "ceusses qui n’sont pon d’el famille". Il ch’apparinte au clientélisme, voire à des pratiques mafieuses. Te comprinds qu’cha n’étot vraimint pon gagner pour mi d’caser ch’miot dins ch’cas présint…

In arferm’te ch’dico et in arvient à ch’t’affaire. D’toute fachon, min Arnaud Montebourg i a dit qu’i d’vrot ête condamné à faire des études in réponche à min Xavier Bertrand qui a dit qu’in n’pouvot pon l’condamner pach’qu’i ch’app’lot Sarkozy. Ch’est quo qu’i fait, puich’qu’i est in deussième année d’drot, pour faire com’ papa. Alors, d’ichi à ch’qu’in lisse d’main qu’i n’y connôt pon un rayon, i n’y a pon loin ! Min Arnaud, fais attinchion à quo qu’ch’est qu’te dis ! Mi, je n’sus pon convaincu qu’min tiot Prince i n’y connôt pon un rayon. Te sais, ch’est quind même l’mari d’miss Darty. Ta, ta, ta… Ta, ta, ta ! Mi, auchi j’sais donner d’euch piston. In parlant d’Jessica, j’vais t’donner un scoop, mes gins. Te sais quo qu’alle d’minde à sin tiot Prince ? Déchine-me un grille-pain…

Bref ! Des rayons, ch’est pon ch’qui minqu’te ! Puich’que sin porte-parole à min tiot Prince i dit qu’i faut l’juger su ches actes, nin su sin âche, i faudrot rapp’ler à tertous qu’i connôt bin ch’rayon des bionnes affaires. L’preuf’ in est qu’i l’a épousé ! Ch’est quind même un bion présache pour ch’quartier d’affaire. Pis, i n’y a pon vraimint d’richques, i l’fait chous contrat d’confianche ! I les arnifle pach’qu’i a du pif ! Bion, i faut dir’te qu’i est bin nez ! Mi, j’sus sûr’te que, dins quéques années, i s’ra l’Cyrano d’el Définche. Te n’treuves pon qu’i li arsimpe ? Bah, ouais, mes gins ! Quind in va raviser dins ches magasins, tout i est organisé. Ches rayons sont in ordre, chaque cosse à ch’plache ! Chinon, j’n’auros pon hésité à dir’te qu’i s’ra l’Cyrano d’bric-à-brac… Ch’est EPAD’tant min ju d’miots, hein ?

Ch’est pon tout cha, Marie Toutoule, mais t’as parlé d’un deussième sujet ! J’sus sûr’te que t’es in train d’te dir’te cha… Ch’est vrai, mais, in même timps, j’in ai fait des lines d’long d’jà l’s’maine dernière (ichi). Pis, j’sus colère ! Nin, pon à causse d’min Freddy. A causse d’min Mustapha El Atrassi, su NRJ. Ch’matin, j’sus chous m’douche et j’intinds qu’i fait eune blaque : « Quind Frédéric Mitterrand i prind eune douche, ch’est toudis aveuc un Petit Marseillais ! » Dir’te que j’n’avos pon osé l’faire, mi ! Te sais, j’sus quind même timide par momints. Chi, chi ! Alors, pour n’pon rechter su cha, j’vais ajouter min grain d’sel : Quind Frédéric Mitterrand i a eune tiote invie, i prind un Petit Ecolier ! T’as LU ? J’ai honte, mes gins ! Alors, te comprindras aisémint qu’i s’rot malsain d’em part d’développer d’avintache su min Freddy, quind toute l’première partie est conchacrée à un Petit Prince…



Je n'ai pas résisté au plaisir de cette chanson où le Petit Prince fait une déclaration à sa rose. Belle ironie, alors que les roses lui tirent dessus...