Chalut mes gins ! Com’ j’sais qu’i y a auchi gramint d’frontaliers belges qui vienn’tent ichi, j’espèr’te qu’is aurontent paché eune bionne fiête nachionale et j’les salue tout particulièr’mint ! In espérant qu’ches pétards is vontent pouvoir claquer et qu’ches concherts is serontent moins arrosés qu’ceusses qu’in a eus à ch’quatorse juillet. Bah ouais ! In a bieau vif’ des journées paradisiaques chous un solel radieux, chu eune bielle île d’ches Seychelles. Infin, juss’ in rêf’, puich’qu’in n’a pon été invités. In est vit’ rattrapé par ches oraches. Cha rappell’te étringemint ch’fabuleusse saga qu’in est in train d’vif’. Bah, com’ te veux, ou d’subir ! Ch’est vrai auchi. Pourtint, cha n’est pon ches infos qui essay’tent d’détrôner mémé Liliane et cha nébuleusse avinture médiatique. Alors, j’ai déchidé d’faire eune pausse technologique. Com’ chi ch’étot eune pache d’pub intre deux épisotes !

Te n’es pon chins l’savoir, d’autint qu’t’as chertain’mint un ami qui t’in a mis un chous ch’nez. D’pis quéques s’maines, Apple i a sorti sin nouvieau iPhone4. Véritape bijou d’technologie, te peux tout faire aveuc ! Etant donné qu’i y a forchémint eune applicachion pour ch’qui t’intérèche. Infin, i n’fait toudis pon cafetière, ch’qui est quind même innuyeux. Te peux toudis mette in ém’pétros ch’canchon d’min Raymond Tanière, eun’ goutte d’jus, mais cha ne s’ra pon parel ! Ouais, com’ te dis, i t’dit d’jà d’ù qu’te peux aller in boir’te un et même, j’sus sûr’te, ch’magasin ch’pus proche d’ù qu’te peux in acater. Et chi te n’es vraimint pon dégourdi, i va même guider tes pas, tel che Messie, jusqu’à tin breuvache favori. Che n’étot p’t-ête pon un bion eximpe, j’te l’accorde. In attindint, j’ai un ami qui est paché l’aute jour et qui m’l’a mis chous ch’nez in disint qu’i f’sot tout. I étot fier com’ ch’biroute d’un bar toubac de m’faire des démos d’chi, des démos d’cha. Pir’te qu’à eune réunion Tupperware ! Quind i m’a infin laiché in placher eune pour me d’minder ch’que j’in pinsos, j’ai auchitôt posé sin bazar à tierre et j’li ai dit qu’i pouvot wassinguer ch’baraque. Bah, i n’eul fait pon ! Parel, i n’aspir’te pon ches moquettes, même ch’i sait faire des bruits qu’in pourrot croir’te à un aspirateur.

Inutile d’eut dir’te que j’in ai pris pour min matricule, mais ch’est à ch’momint-lal qu’i ch’est mis à sonner et cha a copé court à m’plaisinterie. « Ch’est ch’t’émile que j’attindos » i m’dit in m’arprinint sin gadget des mains. Infin, copé court, je n’sais pon chi bin dir’te, pach’que très rapidemint je l’ai intindu dir’te plusieurs fos un miot que je n’vais pon répéter d’un ton contrarié. Pis conclure par un merde, j’ai pus d’réseau, cha pache mau chez ti ! Commint cha, cha pache mau chez mi ? Dis tout d’chuite que j’ress’ dins un blockhaus ! Ni eune, ni deux, i est sorti dins ch’gardin chins pus d’résultat. Com’ in n’est chez ch’même opérateur, j’li ai sorti min portape, le li ai tindu et j’ai ajuté aveuc min pus bieau sourire : Tiens, ravises, i y a du réseau ! Mi, j’n’ai pon d’applicachion particulière, mais l’seu que j’ai ch’est téléphone. Te verras, cha cange l’vie ! J’te raconte cha pach’qu’in est intre nous, mes gins, mais je n’eum sus pon arrêtée lal. In a paché eune bionne soirée quind même et ch’lindemain j’ai ravisé chu ch’net pour savoir. J’ai su in moins d’deux ! I n’étot pon l’seu à avoir des problèmes aveuc sin concintré d’technologie ! Apple comminche seul’mint à reconnaîte un problème lié à sin intenne.

In effet, gramint d’utilisateurs ch’artreuv’tent mi-figue, mi-rojin d’vint leu nouvielle acquisichion ! Is ramèn’tent leu fraisse auprès d’euch peumme qui, du cop, ch’in prind plein ch’poire ! I n’faut pon les prinde pour des bananes, is ontent été pressés com’ des citrons pour l’acater et is ch’artreuv’tent marrons ! Bah, ouais, ch’est min applicachion salat’ d’fruits et cor’, j’ai oublié d’eut dir’te qu’min opérateur i est oranche ! Bref. Tout ch’problème i vient de ch’t’intenne, donc, qui est in fait ch’côté bas et gauche d’euch boîtier. Seul’mint, chi in met ch’main chu ches deux morcieaux qui sontent isolés intre eux, in fait com’ un court-circuit et in n’a pus d’récepchion ! In arrif’ toudis à téléphoner, mais ch’est ch’te 3G qui march’te pus et te t’artreuves aveuc juss’ un téléphone qui téléphone. Ch’est bin auchi, te m’diras, mais ch’est loin d’ête pour cha seul’mint qu’in t’eul proposse. Dins un premier timps, ch’est com’ tous ches grinds fabricints, is ontent fait ch’sourde orelle. Is ontent minimisé ch’problème et ontent ajuté qu’toutes ches marques avotent ches mêmes problèmes d’intenne…

Tout i allot pour ch’miux dins ch’meilleu d’ches montes in fin d’compte. Ches gins is avotent acaté un téléphone et is savotent téléphoner, merveilleux, nin ? C’est parel qu’chi t’acates eune carette qui a un problème d’freins. Te l’acates bin pour rouler, alors d’quo qu’te t’plains, alle roule ! Jusqu’à ch’jour d’ù qu’euch peumme alle est quée de ch’t’arpe. Infin, ch’est plutôt ch’t’action in bourse qui a comminché à querre et cha, cha a interpellé ches dirigeants. Bah, ouais ! In pus d’ches clients pon contints is allotent ch’artreuver aveuc eune binde d’actionnaires in furie. Quo qu’te veux, leu applicachion pépettes alle n’fonctionn’te pus et ch’est quind même ch’pus importinte à leux zis. Forchémint, brinle-bas d’combat chez Apple, i faut eune soluchion au pus vit’. D’jà in n’est sûr’te qu’is n’vontent pon les rapatrier pour canger ch’pièche qui posse problème, puich’que ch’est ch’boîtier. Alors, ches tiêtes pinsintes is ontent déchidé d’offrir eune coque in caoutchouc à tous ches gins qui in f’rotent la d’minde !

Chertains internautes is ontent proposé à Apple d’mette du scotch chu ch’côté d’euch boîtier pour éviter ches problèmes et, j’avoue, qu’j’ai treuvé ch’t’idée originale. D’ailleurs, plutôt qu’eune coque in caoutchouc qui ne f’ra pon très style dins chertains sacs à main, is pourrotent proposer un lot aveuc eune paire d’gants ; voire même un pack premium aveuc des gants in cuir. Bah nin ! Pon des gants in caoutchouc, cha ne f’rot pon très style nin pus ! A moins qu’cha sot pour aller aveuc ch’t’applicachion qui fait ch’vaichelle. J’te rassur’te, juss’ in virtuel auchi, pach’que chi te l’mets dins tin bac aveuc tes achiettes, i coul’te com’ un fer à arpasser. Ch’qu’i n’fait pon nin pus, à min grind désespoir’te ! Pus chérieuss’mint, is sontent in train d’étudier l’pochibilité d’mette un vernis spéchial qui impêquerot ch’problème. In attindint eune verchion 4.1 pour ches utilisateurs vernis. Ouais, ch’étot fachile à faire, j’te l’accorde. Bref, i ress’ toudis l’pochibilité de ténir tin téléphone intre deux dogts, voire même de n’pon l’ténir du tout. Eune fos qu’i est posé, te peux toudis utiliser ch’t’écran. Et pour ches trinsports in commun, par eximpe ? Bah, te d’mindes à eune personne d’vint ti d’euch baisser pour utiliser sin dios !

V’là, mes gins, in a fini ch’te pache d’pub. Est-che qu’in va ch’artreuver aveuc un nouviel épisote d’eul saga à friqués ? I y a d’forte cinche, mais i y a auchi eune aute série qui vient d’arprinde aveuc ch’mise in examen d’Ribéry, d’sin bieau-frère et d’Benzema. Cha auchi, ch’est à succès et ch’nouvielle saison alle comminche chu ches capieaux d’roues ! Pis, in pourrot faire un débat politique pour raviser d’pus près toutes ches affaires d’micro-partis. In pus, i y a d’quo auchi bin d’un côté qu’eud l’aute. Lal auchi ch’est eune bielle histoire d’inveloppes. Infin, micro-inveloppes, puich’qu’in n’dépache pon un nombe à chinq chiffes ! In ch’tient au courant et in in arparl’te, hein ?

C'est technique !

Salut mes gens ! Comme je sais qu’il y a aussi beaucoup de frontaliers belges qui viennent ici, j’espère qu’ils auront passé une bonne fête nationale et je les salue tout particulièrement ! En espérant que les pétards vont pouvoir claquer et que les concerts seront moins arrosés que ceux que l’on a eus au quatorze juillet. Bah oui ! On a beau vive des journées paradisiaques sous un soleil radieux, sur une belle île des Seychelles. Enfin, juste en rêve, puisque l’on n’a pas été invités. On est vite rattrapé par les orages. Cela rappelle étrangement la fabuleuse saga que l’on est en train de vivre. Bah, comme tu veux, ou de subir ! C’est vrai aussi. Pourtant, ce ne sont pas les infos qui essayent de détrôner mémé Liliane et sa nébuleuse aventure médiatique. Alors, j’ai décidé de faire une pause technologique. Comme si c’était une page de pub entre deux épisodes !

Tu n’es pas sans le savoir, d’autant que tu as certainement un ami qui t’en a mis un sous le nez. Depuis quelques semaines, Apple a sorti son nouveau iPhone4. Véritable bijou de technologie, tu peux tout faire avec ! Etant donné qu’il y a forcément une application pour ce qui t’intéresse. Enfin, il ne fait toujours pas cafetière, ce qui est quand même ennuyeux. Tu peux toujours mettre en MP3 la chanson de mon Raymond Tanière, eun’ goutte d’jus, mais ce ne sera pas pareil ! Oui, comme tu dis, il te dit déjà où tu peux aller en boire un et même, je suis sûre, le magasin le plus proche où tu peux en acheter. Et si tu n’es vraiment pas dégourdi, il va même guider tes pas, tel le Messie, jusqu’à ton breuvage favori. Ce n’était peut-être pas un bon exemple, je te l’accorde. En attendant, j’ai un ami qui est passé l’autre jour et qui me l’a mis sous le nez en disant qu’il faisait tout. Il était fier comme Artaban de me faire des démos de ci, des démos de ça. Pire qu’à une réunion Tupperware ! Quand il m’a enfin laissé en placer une pour me demander ce que j’en pensais, j’ai aussitôt posé son bazar à terre et je lui ai dit qu’il pouvait passer la serpillière dans la baraque. Bah, il ne le fait pas ! Pareil, il n’aspire pas les moquettes, même s’il sait faire des bruits où l’on pourrait croire à un aspirateur.

Inutile de te dire que j’en ai pris pour mon matricule, mais c’est à ce moment-là qu’il s’est mis à sonner et cela a coupé court à ma plaisanterie. « C’est l’e-mail que j’attendais » il me dit en me reprenant son gadget des mains. Enfin, coupé court, je ne sais pas si bien dire, parce que très rapidement je l’ai entendu dire plusieurs fois un mot que je ne vais pas répéter d’un ton contrarié. Puis conclure par un merde, j’ai plus de réseau, ça passe mal chez toi ! Comment cela, ça passe mal chez moi ? Dis tout de suite que je vis dans un blockhaus ! Ni une, ni deux, il est sorti dans le jardin sans plus de résultat. Comme on n’est chez le même opérateur, je lui ai sorti mon portable, le li ai tendu et j’ai ajouté avec mon plus beau sourire : Tiens, regardes, il y a du réseau ! Moi, je n’ai pas d’application particulière, mais la seule que j’ai c’est téléphone. Tu verras, ça change la vie ! Je te raconte cela parce que l’on est entre nous, mes gens, mais je ne me suis pas arrêtée là. On a passé une bonne soirée quand même et le lendemain j’ai regardé sur le net pour savoir. J’ai su en moins de deux ! Il n’était pas le seul à avoir des problèmes avec son concentré de technologie ! Apple commence seulement à reconnaître un problème lié à son antenne.

En effet, beaucoup d’utilisateurs se retrouvent mi-figue, mi-raisin devant leur nouvelle acquisition ! Ils ramènent leur fraise auprès de la pomme qui, du coup, s’en prend plein la poire ! Il ne faut pas les prendre pour des bananes, ils ont été pressés comme des citrons pour l’acheter et ils se retrouvent marrons ! Bah, oui, c’est mon application salade de fruits et encore, j’ai oublié de te dire que mon opérateur est orange ! Bref. Tout le problème vient de l’antenne, donc, qui est en fait le côté bas et gauche du boîtier. Seulement, si on met la main sur les deux morceaux qui sont isolés entre eux, on fait comme un court-circuit et on n’a plus de réception ! On arrive toujours à téléphoner, mais c’est la 3G qui marche plus et tu te retrouves avec juste un téléphone qui téléphone. C’est bien aussi, tu me diras, mais c’est loin d’être pour cela seulement que l’on te le propose. Dans un premier temps, c’est comme tous les grands fabricants, ils ont fait la sourde oreille. Ils ont minimisé le problème et ont ajouté que toutes les marques avaient les mêmes problèmes d’antenne…

Tout allait pour le mieux dans le meilleur des mondes en fin de compte. Ces gens avaient acheté un téléphone et ils savaient téléphoner, merveilleux, non ? C’est pareil que si tu achètes une voiture qui a un problème de freins. Tu l’achètes bien pour rouler, alors de quoi te plains-tu, elle roule ! Jusqu’au jour où la pomme est tombée de l’arbre. Enfin, c’est plutôt l’action en bourse qui a commencé à tomber et cela, ça a interpellé les dirigeants. Bah, oui ! En plus des clients pas contents ils allaient se retrouver avec une bande d’actionnaires en furie. Que veux-tu, leur application pépettes ne fonctionne plus et c’est quand même la plus importante à leurs yeux. Forcément, branle-bas de combat chez Apple, il faut une solution au plus vite. Déjà on n’est sûr qu’ils ne vont pas les rapatrier pour changer la pièce qui pose problème, puisque c’est le boîtier. Alors, les têtes pensantes ont décidé d’offrir une coque en caoutchouc à tous les gens qui en feront la demande !

Certains internautes ont proposé à Apple de mettre du scotch sur le côté du boîtier pour éviter les problèmes et, j’avoue, que j’ai trouvé l’idée originale. D’ailleurs, plutôt qu’une coque en caoutchouc qui ne fera pas très style dans certains sacs à main, ils pourraient proposer un lot avec une paire de gants ; voire même un pack premium avec des gants en cuir. Bah non ! Pas des gants en caoutchouc, cela ne ferait pas très style non pus ! A moins que ce soit pour aller avec l’application qui fait la vaisselle. Je te rassure, juste en virtuel aussi, parce que si tu le mets dans ton bac avec tes assiettes, il coule comme un fer à repasser. Ce qu’il ne fait pas non pus, à mon grand désespoir ! Plus sérieusement, ils sont en train d’étudier la possibilité de mettre un vernis spécial qui empêcherait le problème. En attendant une version 4.1 pour les utilisateurs vernis. Oui, c’était facile à faire, je te l’accorde. Bref, il reste toujours la possibilité de tenir ton téléphone entre deux doigts, voire même de ne pas le tenir du tout. Une fois qu’il est posé, tu peux toujours utiliser l’écran. Et pour les transports en commun, par exemple ? Bah, tu demandes à une personne devant toi de se baisser pour utiliser son dos !

Voilà, mes gens, on a fini cette page de pub. Est-ce que l’on va se retrouver avec un nouvel épisode de la saga à friqués ? Il y a de forte chance, mais il y a aussi une autre série qui vient de reprendre avec la mise en examen de Ribéry, de son beau-frère et de Benzema. Cela aussi, c’est à succès et la nouvelle saison commence sur les chapeaux de roues ! Puis, on pourrait faire un débat politique pour regarder de plus près toutes ces affaires de micro-partis. En plus, il y a de quoi aussi bien d’un côté que de l’autre. Là aussi c’est une belle histoire d’enveloppes. Enfin, micro-enveloppes, puisque l’on ne dépasse pas un nombre à cinq chiffres ! On se tient au courant et on en reparle, hein ?