Te sais, mes gins, quind t’acoutes ches actualités, te t’attinds à avoir des nouvielles qui von’tent améliorer tin ordinaire. Pardon, j’oublios qu’in étot dins ch’vraie vie, pon dins l’fic’chion. Bion, disons alors qui von’tent chinger ch’monte. Oops ! Faut p’t-ête pon rêver nin pus. Infin, bref, te t’attinds à ch’que ches politiques is t’annonchent qu’in va cor’ tout boul’vercher, mais te n’in tiens pon vraimint compte. Te t’dis qu’cha s’ra l’continuité dins ch’ching’mint. Qu’ch’est chertain’mint pon pour mette pus d’argent dins tin porte-monnaie d’toute façon ! Te n’t’attinds churtout pon à ch’qu’in annonche, dins ch’poste, qu’euch gouvern’mint i a des difficultés com’ ches intreprisses. Imagine m’guiffe quind j’ai intindu qu’in allot dégraisser dur’te dins ch’gouvern’mint ! J’étos loin d’pinser qu’cha allot auchi mau quind in vot qu’is sont toudis tout chourire quind in les vot à ch’TV…

J’étos d’jà in train d’em faire un plan pour savoir qui allotent ête mis à l’écart. Chertain’mint eune m’sure pour faire des économies. Ch’est vrai qu’min Nicolas i est toudis à dir’te que ch’train d’vie d’l’Etat i va baicher, mais cha n’est nin ch’cas. Quind j’ai réalisé qu’in n’parlot pon d’dégraissache d’effectif, mais d’dégraissache physique. Ches ministres is on’tent trop d’imbionpoint ! Te comprinds min erreur à propos d’ches résoluchions. D’accord, mes gins, je n’étos pon bin réveillée. Ches fêtes alles sont finies, in pense à faire un régime pour éliminer ch’surplus. D’ù l’impréchion d’ête d’jà d’main. Bah, nin, cha ch’étot Philips. Ichi, ch’est carrémint l’année prochaine. Cha, ch’est eune nouvielle qui révoluchionn’te l’vie d’tout à chacun ! Ch’est vrai, cha m’impêchot vaqu’mint d’dormir d’savoir qu’untel ou untel i ch’harnaiqu’te in XL ou XXL plutôt qu’in M. A moins qu’cha sot vraimint pour faire des économies. J’m’explique. I est fort pochibe qu’ches costumes is soent payés par ches frais profechionnels. Te sais, com’ ch’gardien d’el paix, ch’t’agint d’el SNCF. Ch’est in quelque sorte leu uniforme. Donc, chi in baich’te in talle, in consomm’te moins d’tissu et cha fait des économies…

Bah, ouais ! J’sais bin qu’ch’est chertain’mint nin l’raison première. Min Nicolas i part su ch’princhipe d’un echprit sain dins un corps sain. Tertous à ch’régime com’ l’France intière ! Sauf que, nou’z’autes, ch’est pach’qu’in n’a pon vraimint l’chox. Pis, ch’est un problème d’imache pour min Nicolas. I est plutôt athlétique. Carlita, ch’est un anchien mannequin. Ch’qui prouf’ eune fos d’pus, qu’in vit dins eune vraie dictature d’euch paraîte ! Te m’croras chi te veux, mais cha m’a auchitôt fait pinser à ch’film aveuc Louis De Funès : Ch’t’aile ou l’cuiche ! Inutile d’te dir’te qu’i y a eune arsimblinche intre ch’rôle princhipal dins ch’film et min Nicolas qui va l’arprinde. Tiot, toudis in train d’gesticuler. N’hésitant pon à accompagner chaque miot d’eune moue expressive. Dans ch’rôle d’ches arprésintants d’euch guide, in artreuve, bin intindu, ches ministres qui serv’tent l’France. Cha y est ? Te visualisses bin ches perchonnaches ? Alors in y va, concheil d’ches ministres…

Par un mercredi matin, tertous i attind in rang d’oignon. Tertous i est gramint à l’avinche su ch’t’heure, mais ch’est pour avoir l’timps d’rechpecter ch’rituel. In effet, l’première michion avint d’rintrer dins ch’te salle d’réunion, ch’est ch’pesée. Perchonne i n’peut y couper, in monte su ch’balinche. Te sais à l’instar d’ches réunions Weight Watcher qui, com’ ch’nom i l’indique, ravise ch’pods ! Ch’est min Nicolas, in perchonne, qui churveill’te ch’t’aiguille et qui dichtribue des bions points. Malheur à ti chi t’as pris chint grammes dins ta s’maine ! Nin seul’mint, te s’ras privé d’buffets offichiels, mais te vas d’voir courir aveuc min Nicolas et l’accompagner pindint sin jogginge. Pis, je n’te parl’te même pon chi t’as pris pus ! Ch’est nin compliqué, dès qu’te s’ras sorti d’euch conseil, ch’est eune bionne séanche d’vélo d’appart’mint qui t’attind… T’inquiète ! Pour que ch’timps i t’simbe moins long, l’CD d’Carlita i tourne in boucle !

Mes gins, com’ in s’ra contint d’vir toutes ches tablettes d’chocolat, noir’te pour faire plaiji à min Nicolas. Tous ches vintes plats et ches mines réjouies qui s’ront ch’fleuron d’eune France qui va bin. Eune France in bionne sinté, puisque Roselyne alle veill’te à ch’grain. Eune France à l’imache d’euch couple présidinchiel, jonne, svelte et athlétique. Eune France dynamique, quo ! Ch’est vraimint un sujet qui préoccupot tertous d’pis longtimps. Pourvu qu’min Nicolas i ne ch’aperchoiv’te pon qu’is sont prech’que tertous pus grind qu’li, pach’que je n’sais pon quo qui va ch’pacher, mais va y avoir des tiêtes qui von’tent querre…