Chalut mes gins ! I fait frod ! Va falloir qu’in ch’treuve des occupachions qui récauff’tent. Mi, ch’est pon compliqué, j’te proposse d’faire com’ d’habitute, d’rigoler un bion cop tertous insimpe ! Cha fait gramint d’bin à ch’moral. Cha fait monter l’timpérature d’tin corps. Cha intraîn’te ches zygomatiques et tout cha, chins qu’cha t’coûte un rond ! Alle n’est pon bielle l’vie ? Hé, ti, j’ai dit qu’cha f’sot monter l’timpérature d’tin corps, mais ch’est pon eune raison pour t’imaginer des trucs ! Fait gaffe à ti, chinon, te vas archevoir m’pantoufle dins d’guiffe…

Ah, bin, ouais, mes gins ! Forchémint, j’viens d’te donner un indiche colochal pour t’indiquer d’quo que j’vais parler. Te voulos eune occupachion qui récauffe, j’te proposse, in pus d’el rigolate, eune tiote séanche de chport. In n’a pus gramint d’timps, chi in veut monter eune équipe d’France pour ches futurs JO ! Heureuss’mint, in a un français, à’ch’t’heure, capape d’echpliquer quo qu’alles sont ches règes. Ouais, mes gins ! Min DSK i a failli archevoir eune bachket in pleine guiffe. Alle a été linchée par un jonne turc, pindint qu’i f’sot un dichcours d’vint eune assimblée d’étudiants, dins eune univerchité d’Istanbul ! I n’a pon réuchi à viser correct’mint, i simbe, car ch’godache alle a atterri su l’tiête d’un aute ! Aïe, mais cha fait mau ! Te m’excus’ras mais je n’sais nin commint qu’in dit in turc.

Après George Bush, l’ministre chinois, in avot eu l’drot à un linché collectif su l’ministère d’el arquerche in février. Seul’mint ch’étot su des murs, pour exiger ch’t’artrait du décret modifiant che statut des univerchités. Eune manifestachion in grinte pompe, donc ! In sait d’pis que, après quéques autes essais, ch’protestachion alle avot vit’ eu un cop d’pompe, ch’te fos ! Min DSK i l’a donc échappé bielle. Grâche à l’maladrèche de ch’t’étudiant turc, qui voulot l’prinde com’ tiête d’turc, i n’a même pon eu b’soin d’echquiver. Alors qu’in ch’souvient tertous que George Bush i avot dû faire un j’té de hanches pour éviter, d’un qu’veu, un abat Bush à l’babouche…

A’ch’t’heure, i y aurot bin eune aute raison, l’bachket alle aurot pu chinger d’direc’chion toute seu, mais ch’est nin crédibe. Je n’voudros pon ête mauviaisse lingue, mais min Dominique i est quind même ch’ro pour prinde sin pid ! Je n’vos vraimint pon commint qu’el bachket alle aurot fait pour n’pon ête attirée com’ un amant. Pardon, un aimant. Te vos, dès qu’in parl’te d’li, j’mélinche. Cor’ eune cosse, imagine eune s’conde que ch’étot eune Nike… Marie Toutoule, te comminches à t’infoncher, te n’auras bintôt pus pid. In va d’voir t’lincher un lacet pour qu’te n’te noes pon. Ah, bin, nin ; eune corde ! Vraimint, cha n’va nin. Pis, ches lacets qu’i a l’habitute d’vir, min Dominique, Nike, Nike (eune paire, ch’est miux), ch’est plutôt su ches guêpières d’ches tiotes stagiaires, pon su des bachkets qui pu’tent ! Mes gins, te sais commint min Dominique i appell’te sin bazar ? Boule ! Pach’que Istanbul… Te n’croyos toud’même pon qu’i avot chosi ch’te ville par hasard ! J’ai honte… Mais ch’est bion la honte !

Alors, ch’est sûr’te, ch’t’étudiant i a été maîtrisé auchi vit’. In li a même mis eune main su ch’bouque pour l’faire taire. D’autint qu’cha n’étot pon des miots d’amour, mais plutôt : Tiens prends ch’te Nike de t’mère !  Te les pompes à tertous aveuc tin FMI (lir’te Fédérachion des Mocassins Imputrescibles) ! Bah, i pestot sûr’mint auchi d’vint sin minque d’intraîn’mint. A moins qu’in li ait marché su l’pid. V’là ch’que ch’est d’avoir ches pids nus dins l’foule ! Min Dominique i est rechté imperturbape. Causse toudis, te m’intérèches. Mi, j’sus v’nu parler d’euch FMI (te peux lir’te Front Monétaire International mais auchi Filou Maniaque Invétéré). Ch’est pon pach’que te mets ches pids dins ch’plat, qu’te n’es pon d’accord aveuc mi, que je n’vais pon aller jusqu’à ch’biout ! I n’li a même pon fait un pid d’nez, histoire d’arprinde eune arvinche. I aurot même pu l’traiter d’va-nu-pieds. I aurot eu raison, puich’qu’i avot inl’vé ches godaches, mais i n’l’a pon fait !

Toudis i est qu’cha pourrot donner gramint d’idées dins un indrot d’ù qu’i y a chouvint eune caude imbianche. Ouais, mes gins, j’veux parler de ch’t’Assimblée Nachionale. Imagine, ti, quo qui aurot pu ch’pacher pindint qu’is étotent in train légiférer su ch’te loi Hadopi, par eximpe. Bion, pon ch’dernière adopchion qui étot juer à l’avinche, mais quind i y a eu des cintaines d’mochions d’chinsure. Vlan ! Eune mochion invoyée par ch’PS. Re-vlan, eune aute et cheule-chi alle pu’te vaqu’mint ! Vlan, eune d’drote. Etc.. A forche d’vouloir définde ches drots d’auteur, in che s’rot artreuvé aveuc des drôl’tes d’odeur…

Ch’est sûr, au biout d’un chertain timps, in pourrot avoir l’impréchion que ch’ti qui dirige i n’est pus su ch’perchoir. Cha arsimbl’rot pus à un coq su un tas d’brin. Cocorico ! Ch’est cha l’France ! In attindint, ch’est quind même ch’jeu à ch’mote un peu partout. Alors, mes gins, qu’est-che que t’attinds pour prinde égal’mint tin pid in juant. Mi, j’te dis à la s’melle prochaine…