Chalut mes gins ! In est d’jà dins ch’mitan d’el s’maine, mais j’ai l’impréchion qu’in fait du churplache d’pis quéques jours. Com’ chi ch’timps i ch’étot arrêté ! Infin, ch’est churtout à ch’niveau d’ches informachions qu’cha simbe faire du churplache. Hormis ches catastrophes naturelles, in peut résumer in eune paire d’miots : Clearstream, Polanski. Bah, ouais ! Quind j’disos eune paire, ch’est bin deusse. Infin, in a eu l’drot à des guess-stars…

Clearstream, in n’va pon cor’ in parler. In va laicher l’justiche suif’ sin cours, com’ in dit. Ch’i y a des arbondich’mints, in s’ra vit’ mis au courant, pon d’doute lad-chus. Dins l’série : L’justiche et ch’bion peuple, i y in a un qui fait gramint parler d’li, ch’est Polanski. In tros jours, ch’est tout un roman, Polanski ! Ch’est con pour quéqu’un qui fait des films ! Alors, mes gins, l’quechtion qui ch’posse ichi ch’est : Est-che qu’i faut arrêter quéqu’un pour des faits qui armontent à trinte et un ins ? Ch’est vrai, in pourrot partir d’euch princhipe que, pindint tout ch’timps, l’seul crime qui ait commis ch’est d’avoir fait des films. Ouais, mais, ch’est pon un vol d’chuques dins un magasin qu’in li arproche ! Ch’est vrai. Eune gamine d’treisse ins, ch’est pon ch’qu’in appell’te d’el pédophilie ?

A’ch’t’heure, pour faire l’balinche com’ ch’te justiche, l’gamine alle li a pardonné puich’qu’alle dit qu’alle étot conchintinte. Alle veut qu’in l’laiche in paix. Même l’famille alle simbe d’sin côté. Bion, j’n’irai pon jusqu’à dir’te qu’i y a chertain’mint eu un accord à multiples zéros su un chèque, com’ Michael Jackson in sin timps, mais ch’est eune pochibilité. Chacun i aura ch’prope opinion su ch’sujet. D’toute fachon min couple vedette Paul et Mick i est su ch’pid d’guerre. I y a d’quo ! Chi in résum’te d’fachon basique, ch’est eune cavale d’trinte et un ins, à pid, à qu’val, in carette et churtout in ski. Cha, ch’est pour faire plaiji à min camarate Pat’Bol qui vot Paul en ski, plutôt qu’autr’mint…

Mais lal i n’est pon l’quechtion ! Ch’qui m’déringe l’pus, ch’est qu’in peut intinde d’pis quéques jours. Ches artistes comédiens, canteurs, réalisateurs, ch’ministre d’el culture défindrent bec et ongles Roman Polanski. Ch’est pon tint qu’is l’défindent, mais ch’est ches mêmes qui veul’tent mette in prison ches gins qui télécharg’tent illégal’mint su Internet. Cha arvient à dir’te, mes gins, que ch’est moins graf’ d’abuser d’eune gamine d’treisse ins que d’pirater des oeufres chins ch’acquitter d’ches drots d’auteur ! D’ù qu’alles sont ches vraies valeurs lad’dins ? Te vois, cha, cha m’gène profondémint ! Parel, aveuc l’intervinchion d’Danny Ch’Verdure qui, li, dit carrémint qu’ch’est un viol. Ch’qui est faux. I a perdu eune bielle occasion de ch’taire. D’autint qu’in richque d’arsortir cor’ eune fos sin lif’ d’ù qu’i relatot chertains faits guère arluisants aveuc des tiots garchons…

Bion, bin ch’est quind qu’in rit ?

Ch’est vrai, cha n’est pon gramint drôl’te tout cha. Chi te veux rigoler, in peut raviser d’euch côté politique. PS d’abord. Te sais, ch’est un peu com’ che slogan à ches Galeries Lafayette. Ichi, in pourrot dir’te : I ch’pach’te toudis qué cosse à ch’parti sochialiste. In vient d’apprinde qu’i y a gramint d’étourdis dins ch’parti. In effet, i y aurot un grind nombe d’adhérints qui aurorent oublié d’régler leu cotisachion. Infin, chi ch’est Titine qui a fait ches comptes, ch’nombe i n’est chertain’mint pon bion. Ch’est pour éviter l’moindre erreur que je n’vais pon avincher d’chiffe mais cha s’rot d’l’ordre d’un étourdi pour tros adhérints ! Te vos, mes gins, Titine alle a mis ches éléphants dins ch’placard, mais, au moins, ches éléphants is on’tent d’el mémoire, eusses. Is n’oubli’tent pon d’régler leu cotisachion !

Dins ch’lot, i y a min Benoît Hamon goût ! Titine, j’in implor’te ta cléminche ! Ch’est nin d’euch faute. I n’a pon gramint d’timps, min Benoît. I n’a pon fait exprès d’poucher ch’parti dins ch’gouffre. I m’simbe que t’as eune bionne part d’rechponsabilité. D’accord, i n’y a pon qu’ti, ch’est vrai. Ch’est li qui porte t’bionne parole, faut pon l’oublier. Pis, aveuc tout quo qu’te sors d’pis des mos, cha li donn’te du traval. Bin au-d’là d’ches trinte-chinq heures… In pus, à causse d’ti, le v’là trinsformé in sex-symbol ! A forche d’dir’te qu’i plaît auchi bin à ches jonnes files qu’à ches vielles, t’as chamboulé ch’vie. D’ailleurs, mes gins, chi in a l’timps un jour, i faudra que j’te fasse acouter m’parodie su li. V’là un extrait in exclusivité : « Titine m’appell’te l’idole d’ches files. I y in a même qui m’invie. Mais is ne sav’tent pon dins ch’parti, qu’cha crée des jalousies. Quind alles m’ravis’tent en chippendale. Ch’est l’hystérie dins ch’t’assimblée. Toutes mes paroles, alles pach’tent à l’trappe. Je n’sus pon acouté… » Bah, ouais, Titine ! Li, i prind sin boulot à bras l’corps et tertoutes alles voudrotent printe sin corps à bras…

Gérard Collomb, qui ch’démèn’te pour éteindre l’fu d’trinte bus d’euch ville, Lyon, i a déclaré qu’i n’voyot pus Ségolène dins eune vision d’el France. In rappell’te quind même qu’i la chout’not à ch’congrès d’Reims. Et d’ajouter : « Alle est un peu in fonction d’ches réac’chions d’ches uns et d’ches autes... Tintôt, j’la treuve dins ch’zig, tintôt dins ch’zag... Mi j’ai b’soin d’eune line claire (...) Pon d’eune politique à ch’jour l’jour. » Vingt dius ! Ch’est un grind comique, ch’ti-lal ! I a quind même mis des mos à comprinde ch’que tertous i avot achimilé d’pis des lustres ! Ch’est bin pour cha qu’alle a acaté un frigidaire. Ch’étot pon pour mette ches idées d’dins, mais cheules d’ches autes ! Infin, i in découl’te que Ségolène alle zigzague, hic ! Ah, bin, nin ! Ch’est pon quo que j’voulos dir’te. I y a gramint d’vint, in Poitou-Charente, ch’est tout ! In sait très bin qu’i n’y a qu’dins ch’Nord qu’in picole, hein ? Quo ? Qui ch’est qui a dit qu’i y a un messache codé lad’dins ? Te m’prêtes vraimint des chous-intindus que je n’chous-intinds pon…

Bion, trêve d’blabla. Mi, j’ai eune expréchion qui résume cha, i faudrot qu’in la donn’te à min Gérard Collomb : « Faut nin tortiller d’euch cul pour quier drot ! » D’pus, quind in ch’appell’te collomb,  in sait ch’que cha veut dir’te… V’là, tout i est dit, pon b’soin d’in faire un Chabichou ! A propos d’quier drot, Titine alle vient d’ête interrogée su l’pouchée d’ches Verts dins ches élec’chions partielle à Rambouillet. Ouais, j’sais, com’ trinsichion, j’ai d’jà fait miux que ch’trinsit intestinal aveuc ch’colon, ch’pouchée, etc.. J’te l’accorde, mes gins ! In arvient à ch’qu’alle a déclaré : « Ches Verts is n’me fon’tent nin peur du tout, je l’ai dit pus d’eune fos, che sont nos part’naires (…) Aveuc Cécile Duflot in parl’te politique ensemble … » Ouf ! Je n’sais pon pour ti, mes gins, mais j’sus vaqu’mint rassurée qu’ch’est pon eune réunion tricot qu’alles fon’tent, quind alles sont insimpe !

A’ch’t’heure, j’voudros simpl’mint arv’nir su l’première partie : « Ches Verts is n’me fon’tent pon peur ! » Attinchion, Titine ! Te sais ch’qu’in dit : Un Vert, cha va. Tros Verts, attinchion ches dégâts ! Bion, j’avoue qu’cha n’est pon ch’princhipale préoccupachion pour ch’premier octobe. Cha s’rot pus, dins sin cas Sœur Titine, n’vos-te rin v’nir ? Aveuc tous ches gins qui n’on’tent pon payé leu cotisachion, pis ceusses qui on’tent été virés pach’que cha fait trop long qui n’avotent pon payé, alle va avoir gramint d’mau à vir eune marée rosse… M’est d’avis qu’alle d’vrot quind même avoir peur d’ches Verts. Bah, i li recht’ra un verre pour ch’arconforter !

Un tiot cop à drote, i n’y a pon d’raison. Cor’ à’ch’t’heure, alors qu’in l’attindot dins eune nouvielle déclarachion su Polanski, min Frédéric Mitterrand i n’a rin dit su ch’sujet. Par conte, i a donné sin point d’vue su ch’mote. Cha, cha ching’te l’vie d’tout à chacun, mi, j’te l’dis ! Cha m’a fait rir’te, te vas vir pourquo : « J’sus plutôt ball’rines que cuissardes, mais je n’in porte pon pour l’momint ! » Ah, bin, merde, alors ! J’le vos bin aller à ch’conseil des ministres aveuc ches ball’rines et un tutu pour compléter l’tout ! Cha dot ête l’nostalgie d’sin émichion. Etoiles et toiles, cha peut auchi vouloir dir’te, Etoiles, com’ danseusse étoile et toiles, pach’qu’i y a gramint d’poussières d’pis l’timps qu’i n’ch’in est pon servi, d’sin tutu !

Cor’ un cop à drote. Ch’est l’guerre dins ch’famille d’Rachida Dati. In ch’momint, ch’est vraimint l’rintrée littéraire, puich’que même sin frère i sort un lif’ d’ù qu’cha déménache dur’te pour sin matricule à Rachida : « Dans l’ombre de Rachida », ch’est ch’tite, d’ù qu’i n’a pon peur d’dir’te qu’alle a mis ch’t’honte su ch’famille à causse d’sin comport’mint quind alle étot inceinte. Chi te t’rappell’te bin, alle avot t’nu l’main d’Bernard Laporte, qui n’est toudis pon l’père d’euch file, d’vint ches caméras ! Pis, quind i a été condamné pour trafic d’chtupéfiants,  Rachida, qui étot ministre d’el justiche, alle n’a pon l’vé sin tiot dogt. Quind i déball’te sin sac, Jamal, cha fait mal ! In même timps, i vient d’crédibiliser ch’sœur. Pon d’excepchion, même pour l’famille ! A’ch’t’heure, chi alle n’a pon l’vé sin tiot dogt, ch’est p’t-ête à causse d’ches énormes bagouses ! Pon fachile, alle richquot eune cassure com’ pour rir’te !

Mes gins, in va in garder un peu pour eune aute fos, i n’faut pon ête trop gourmand. J’sus sûr’te qu’in peut cor’ in treuver des kilos pour noirchir des kilomètes d’papier. Infin, d’écran, cha s’rot pus exact. Heureuss’mint qu’chertains is fon’tent ches comiques, chinon i n’aurot eu l’drot qu’à des catatrophes…