Chalut mes gins ! Qué ouiquen cor’ ! Cha pach’te vraimint trop vit’, in d’vrot créer un ouiqu’mitan auchi, cha s’rot bin. Mes gins, chi je d’vos résumer in un miot, j’diros étrinche. Ch’étot un ouiquen propiche apparemment. P’t-ête dû à ch’préchion atmosphérique, qui sait. Mi, j’ai arçu un coup d’fil d’un extra-terrestre. Du moins, ch’est ch’que j’in ai déduit pach’que cha n’pouvot chertain’mint pon ête humain ch’que j’avos à ch’biout d’euch fil. Ch’est pon compliqué, pus cha disot d’énormités, que je n’os’ros même pon t’répéter, pus j’avos l’vision d’un être aveuc d’el guile qui li coulot des lèvres à chaque miot. Ches zis exorbités qui m’aurot tué d’euch argard et je n’te parl’te même pon d’euch lingue d’vipère…

Cor’ heureux que j’n’étos pon in Bretagne, pach’que là-bas, ch’est carrémint des OVNIS qu’is on’tent aperchus. Ouais, mes gins ! Te vos qu’étrinche, ch’est p’t-ête même pon assez fort. Pis, cha n’étot pon des crêpes bretonnes qui volotent. Quoque pour chertains, ch’is avotent abusé d’euch Chouchen, cha ne m’étonn’rot qu’à mitan. Te sais, d’loin, faire l’différinche intre achiette d’crêpes et choucoupe… Bref, dins l’chiel d’Perros-Guirec, cha a été l’fiesta ! Nin des choucoupes, mais des boules orinches. Bah, ouais, te pinses à l’même cosse qu’mi : Est-che que min François i n’étot pon in train d’faire un dichcours dins l’région ? I simbe qu’nin ! In a vit’ compris, in fait d’phénomènes étrinches, qu’ch’étot juss’ des linternes thaïlandaises qui avotent été linchées lors d’un mariache. Bion, d’accord, mais alors, min monstre tout guilleux à ch’biout d’euch fil, j’ai rêvé p’t-ête ? Nin, nin, nin ! I faut qu’in ravise dins des trucs qui ch’sont pachés. J’sus sûr’te qu’in va treuver des preufes d’eune manifestachion extra-terrestre…

Tiens, faut pon quercher bin loin : Jean-François Copé. J’sus chertaine qu’in l’a rimplaché par un clone, ch’est pon possipe autr’mint. Pindint ch’festival d’ches Musik’Elles à Meaux, dont i est ch’maire, i est monté su schène pour faire un duo aveuc Véronique Sanson. J’sus tintée d’ajouter qu’alle avot quind même mis l’son. Pach’que, chinon, i aurot fait un duo tout seul, donc un solo ! Pis, avint d’aller pus loin, pach’que te t’attinds à ch’que j’le fasse, tertous i sait qu’Titine alle n’a rin à vir là-bas. Bah, nin ! Aubry d’Meaux, cha n’le fait pon ! Bref ! A’ch’t’heure, quind in est politique, chi in n’fait pon d’schène, cha n’va nin. I faut que j’te mette ch’premier couplet, ch’est intéréchint : « Ch’i t’plaît, j’voudros aller à Bahia. J’l’ai bien vu dins ch’limpe d’Aladin. J’artiendrai deusse plaches dins ch’t’avion. Très loin d’euch son d’ches accordéons. Et je t’ai querre. Carèche-me… »

Je t’ai querre, carèche-me… Pour l’peu, chi in n’étot pon intré in automne, in pourrot croir’te que ch’est ch’printimps et qu’el sève alle monte. Cha, ch’est à causse d’mi, auchi, et d’min calindrier gag. Chi t’in as eu un, ch’est un collector. Te dos savoir pourquo j’dis cha. Pis chi te n’as pon compris qu’i faut carécher, in insiste bin su ch’limpe. Vas-y gratte, te vas vir ch’bion génie qui va in sortir !  Et quo qu’t’in pinses, ti, d’el phrasse qui dit : Très loin d’euch son d’ches accordéons. Ch’est un messache codé. Quind in parl’te d’accordéon, in pinse à min Valéry, bin intindu. Juss’ après sin roman, et d’euch vraie-fausse idylle aveuc Lady Di, in peut dir’te que cha vient à point. Li, auchi, in a dû l’rimplacher par un clone, ch’est pon possipe autr’mint. Pour qu’i ch’lâche de ch’te fachon, i a dû ête inl’vé par ches extra-terrestres et is on’tent fait des expérienches su li. A m’mote, is n’on’tent pon armis ches morcieaux dins ch’bion sins !

Cor’ eune qui a été clonée et échangée ou parel, in l’a bricolé ! Rachida Dati alle a dit ch’ouiquen que : « ch’i y a des charges, ch’est qu’i y a des coupabes. » Te vos bin, i y a qué cosse d’pon normal. J’vais même dir’te que, ch’i y a des juges, ch’est qu’i y a des procès. Par extinchion, ch’i y a des steaks, ch’est qu’i y a des bœufs. Cor’ pus fort, ch’i y a des politiques, ch’est qu’i y a des bêtisses à dir’te ! In sait tertous qu’alle parlot de ch’t’affaire Clearstream, mais in sait churtout qu’alle trouvot eune excusse à min Nicolas. Te t’chouviens d’sin dérapache d’parlache. Dir’te que j’avos mis cha su ch’compte d’euch récauff’mint climatique, alors qu’i d’vot s’agir auchi d’un inlèv’mint par ches extra-terrestres. D’ailleurs, pour min Nicolas, cha expliqu’rot gramint d’trucs ; te n’treuves pon ?

Cor’ eune preufe, chi te veux, qu’ches extra-terrestres is sont in train d’mette ch’brin chez ches politiques français. Ch’ouiquen, dins VSD, t’as min François Fillon qui gliche dins sin interview, à propos d’sin budget pour 2010 : « Cha n’m’immuniss’te pon d’un début d’grippe malgré ch’t’été indien qui insoleill’te Matignon et sin parc ! Pis i ajoute qu’i la combat à cop d’jus. J’ai bin l’impréchion qu’in l’a d’jà chingé. Premièr’mint, cha expliqu’rot sin budget, pach’que cha arsimpe toudis à un truc qui vient d’eune aute planète. Deussièm’mint, j’li treuve eune chertaine poésie dins cha fachon d’dir’te qu’i a un début d’grippe. « Malgré ch’t’été indien qui insoleill’te Matignon et sin parc », ch’est bieau, hein ? Cha f’rot eune bionne carte postale, in peut in ête sûr’te ! Seul’mint, un premier ministre qui fait d’el poésie chous forme d’une note d’humour, churtout li qui a toudis l’tiête d’quéqu’un qui a perdu ch’quinzaine, ch’est bin l’preuf’ qu’in a mis un clone à ch’plache. T’armarqu’ras, mes gins, que j’n’ai pon écrit un clown à ch’plache, même chi je v’nos d’dir’te qu’i avot fait eune note d’humour ! Trossièm’mint, qui pourrot faire l’objet d’une réduc’chion à ch’budget. Chi pour l’grippe, i suffit d’boir’te des jus et in n’in parl’te pus, je n’vos pon pourquo in va ch’imbêter à dépincher eune fortune pour faire un vaccin ! Dernier point, pour eune phrasse qui in dit long. In est chertain que sin budget i n’va immunisser perchonne ! Mais immunisser d’quo ? Je n’sus pon sûr’te qu’in parl’te d’ches virus !

I y avot eu des signes avint coureur, d’pis quéques mos. J’cros même que tout ch’PS i a d’jà été chingé par des clones. Ichi auchi, j’ai eu gramint d’mau à n’pon m’tromper d’miot. Cha a dû commincher aveuc Ségolène et sin show à ch’Zénith. Cha expliqu’rot pourquo alle simblot avoir été touché par l’grâche. Cor’ eune expérimintachion qui a mal tourné. In n’li a pon armonté toutes ches pièches dins ch’bion sins ! Ch’est p’t-ête auchi cha qui ch’est paché pour Titine. Cha expliqu’rot, d’euch même cop, pourquo i y a eu eune erreur d’comptache. In l’a rimplachée juste avint par sin clone qui a mis tout ch’bazar, rin qu’pour immerder Ségolène.

Mes gins, chi aveuc tout cha, te n’es pon convaincu qu’i ch’pach’te des phénomènes étrinches, ch’est à n’y rin comprinde ! Te peux arprinde tout ch’qui ch’est paché dins ch’politique d’pis un sacré biout d’timps. Chi t’appliques min point d’vue, te n’treuv’tes pon qu’tout i d’vient clair ? Pis, à m’mote, cha va ch’propager dins d’autes pays. In Italie, l’invasion alle a d’jà comminché : Berlusconi i a dit cor’ eune fos, qu’ches Obama is étotent bronzés…