Chalut mes gins ! Cor’ eune s’maine qui ch’termin’te. Ch’est pon l’peine d’dir’re : Youpi ch’est ouiquen ! In a compris, t’as d’jà prévu des trucs. Bah, chi t’in cros ch’météo, te vas cor’ pouvoir in profiter. I va faire bieau. Je n’vais nin jusqu’à dir’te qu’i va faire caud, i n’faut quind même pon poucher mémé dins ches piquots. Quoqu’in puiche ch’attinde à tout aveuc ch’récauff’mint climatique …

Eune fos i n’est pon coutume, in va sortir un peu d’euch bieau pays pour raviser un indrot gramint loin d’ichi. In va chinger ch’décor mais pon ches personnaches. Un indrot d’ù qu’tout i est pus grind. Forchémint, un indrot d’ù qu’te t’sins tout tiot ! Bah, nin, je n’dis pon cha pach’que min Nicolas i n’est pon gramint grind et qu’i dot ch’sintir cor’ pus tiot. Churtout à côté d’em Barack ! Bah, chi ! Ch’est flagrant quind min Barack i est à côté d’min Nicolas. In dirot un gigot qui promèn’te ch’gousse d’ail ! I faut arconnaîte que tout i est démesuré dins ch’pays. Ch’est pon compliqué, quind te ravises ches gins su ch’trottoir d’in face, t’as l’impréchion qu’is sont tout tiots tell’mint ch’est loin ! Essay’te, ti’z’aute, d’faire l’conversachion d’trottoir à trottoir com’ te l’fais dins tin quartier…

Bref, min Nicolas et Carlita is ont fait l’voyache pour aller à l’ONU, dins un premier timps, pis à ch’te réunion d’euch G20. I in a profité, entre aute, pour parler d’euch récauff’mint climatique. Te sais quo qu’alle dit ch’pub : Y a urginche ! Mi, j’ai invie d’dir’te que j’sus doubl’mint d’accord. Min Nicolas, d’pis qu’i est arrivé à New York, i est in churcauffe. Com’ tin manicraque informatique, quind ch’timpérature alle monte, i bugge. Li, ch’est parel. I n’arrête pon d’faire des gaffes et des erreurs d’parlache ! I est gramint timps d’in parler, te vos bin ! I y a des signes qui n’tromp’tent pon. D’jà, chi te t’chouviens, i avot fait un malaisse quind i avot fait gramint caud, i y a quéques mos. Ch’étot bin un signe avint coureur, d’autint qu’i courrot, mais in n’in avot pon pris toute l’importinche…

Tout d’abord, i y a ch’miot qui tue. Ch’est bin intindu, ch’lapsus révélateur à propos d’min Dominique de Villepin et de ch’t’affaire Clearstream. Infin, in n’peut pon vraimint dir’te qu’i tue, ch’miot, puich’qu’in a aboli ch’peine d’mort in France. Heureuss’mint, d’ailleurs, pach’que min Dominique i che s’ro artreuvé raccourchi d’eune bionne tiête, avint même avoir eu ch’timps d’prinde eune bouffée d’air ! Et crac, ch’même talle que min Nicolas ! Te vos, in a bin fait d’mette ch’t’ingin d’malheur à ches incombrants, pach’qu’in étot mal barré. D’jà qu’i y a gramint d’gins qui perdent ch’tiête com’ cha ! Bref, com’ i disot Pépin, cha a fait drécher ches qu’veux su l’tiête d’min Dominique. Puich’qu’i n’l’avot pon cor’ perdu ! Pis, i faut bin dir’te qu’i in a gramint, des qu’veux, alors cha ch’armarque.

A’ch’t’heure, i y a gramint d’monte pour dir’re que, pour un anchien avocat, ch’est quind même un comble de n’pon rechpecter ch’présompchion d’innocinche ! Rin à dir’te, ch’est vrai ! In sait auchi tertous qu’cha n’est pon l’grind amour intre ches deusse-lal. In pourrot même aller jusqu’à dir’te qu’ch’est l’équivalent à Titine et Ségolène in verchion bleue. Alors, voulu, pon voulu, in n’in saura chertain’mint jamais rin. Pourtint, même ch’i n’est pus avocat d’pis longtimps, à m’mote, ch’est com’ ch’biclou, cha n’ch’oublie pon. Ch’est bin ch’qui prouv’te qu’i y a qué cosse d’déréglé dins min Nicolas. In n’sait pon quo qu’i a vu dins ch’journée. Chi cha quée, in li a montré un bébé et i ch’est laiché attindrir. Te sais areu-areu, pis in pach’te à guili-guili. Com’ i est in Amérique et qu’i parl’te inglais, ches guili-guili is sont mélingés à l’inglais. I est in churcauffe, j’te l’rappell’te. Cha ch’est trinsformé in guilty-guilty… Bah, v’là commint qu’après in peut dir’te coupable, guilty in inglais, chins l’faire exprès…

I ch’est pris l’choux aveuc Tatie Arlette. Bah, nin ! Pon Arlette la rouche, alle est in artraite. Arlette d’France 2, pardi ! Quoqu’in puiche che d’minder pourquo alle n’l’est pon cor’, alle ! Bref, i parôt qu’alle a fait un trait d’humour. Chi, chi, alle peut l’faire ! Min Nicolas, cha ne l’a pon fait rir’te ! Ch’est normal, mes gins. D’habitute, ch’est li qui fait rigoler tertous, i n’a pon appréchié qu’alle li vol’te l’vedette. Toudis la churcauffe, te l’vos bin. Pour terminer, min Nicolas i ch’immêl’te ches pinceaux intre l’couche d’ozone et l’effet d’serre. Mes gins, i y a bin qué cosse qui n’va nin !

Bah, mi, j’te l’dis ! I est grind timps d’parler pus d’euch récauff’mint plutôt que d’no cauffer ches orelles aveuc ches bonus ! Ch’planète alle cauffe, i faut agir toud’chuite. Min Nicolas i est vraimint in churcauffe, i in a donné ch’preuf ! Chi t’in n’es pon convaincu après tout ch’qu’in a vu insimpe, li-même i l’dit dins sin interview qu’i a donnée à tatie Arlette et tonton David. Bah, nin, pon ch’canteur. David Pujadas, bin intindu. J’chite : « J’n’ai pon l’drot d’ête négligeant dins m’fachon de m’hydrater. » Te vos, bin, mes gins. I est conscient d’sin problème d’churcauffe et tout cha, à causse d’euch récauff’mint climatique !