Chalut mes gins ! Commint qu’ch’est qu’cha va in ch’premier jour d’automne ? Mi, j’te l’avoue, cha n’est pon l’saison dont j’raffole l’pus. Cha annonche l’fin d’ches bieaux jours et qu’in va bintôt ête dins ches mos d’hiver. J’sus in train d’raviser déhors par l’feniêtre d’min bureau et j’ai un drôl’te d’sintimint in contimplant ch’tableau vert qui vir’te à ch’marron. Submergée par l’chouv’nir d’un être cher. Contrariée par l’bêtisse d’euch monte et cheule d’chertains. Inondée par ches tiots tracas. Stop ! Je n’vais pon t’mette ch’moral à zéro. Ches tracas, in va in faire un tas, pis y mette ch’fu. Com’ ches feulles mortes qu’in n’va pon tarder à ramacher à l’pelle ! Te vos, j’n’ai pon oublié…

Ch’est com’ cha, mes gins ! Cha m’rind nostalgique, alors j’pinse à : « ch’est eune canchon qui no arsimpe » et me v’là partie dins :  « Ti qui avot querre à mi, mi qui avot querre à ti. » Bref, eune tiote pausse nostalgique qui ch’veut romintique, dins un monte d’brute. Eune pausse dins un monte d’ù qu’ches grinds is sont toudis in train d’parler pour sauver ch’planète, dont in a pourtint l’impréchion qu’alle tourn’te d’moins in moins rond. Un monte d’ù qu’même ches échinges su ch’Net is von’tent ête scrutés à ch’loupe, pour raviser chi te n’es pon in train d’télécharger des trucs dont te n’as pon l’drot. Et lal, com’ eune ou un adoleschint qui ch’armémore sin amour d’été et tous ches projets d’av’nir qu’i avot fait, dins ch’tiête, aveuc cheule ou ch’ti qu’i chosi élu com’ l’couvercle d’euch marmite : « Et in vivot tous deusse insimpe, ti qui avot querre à mi, mi qui avot querre à ti... »

J’in ai l’chair d’poulette, mes gins ! Mais quo qui m’arrif’ lal ? J’sus in train d’faire d’el buée su ch’carreau et j’y déchine un cœur d’dins. « Mais l’vie alle sépar’te ceusses qui ch’aim’tent, tout duch’mint, chins faire d’bruit… » Ah, bah, nin ! Ch’est quo qu’tout ch’vacarme que j’viens d’intinde ? Vingt dius ! Mes gins, j’cros bin qu’j’étos in train d’rêver tout d’bout ! Heureuss’mint qu’i y a eu ch’bruit pour m’tirer d’ches sonches. V’là ch’que ch’est d’lir’te chertains trucs quind je n’sus pon trop réveillée l’matin. J’sus dins un état s’cond pach’que min ami Ricoré i n’a pon cor’ fait sin boulot. Pis, com’ i l’disot chi bin ch’ti dont j’sus in train d’lir’te l’avinture : Cha m’émeut ! Marie Toutoule, t’es vraimint incorrigible ! Quo ch’est qu’avot b’soin d’lir’te ch’t’idylle intre Lady Di et min Valéry Giscard d’Estaing ! D’autint que, même chi ch’roman i ch’intitule : « La Princesse et le Président », rin i n’est sûr’te que ch’t’auteur i parl’te bin d’li ! D’pus, dins ch’roman, ch’est Patricia, Princesse d’Cardiff. Ch’Présidint français i ch’appell’te Jacques-Henri Lambethwalk. Nin, qu’est-che que j’raconte ! Lambertye. Ch’Lambeth walk, ch’est Dalida, cha n’est pon compliqué…

L’preuf’ in est, ch’Présidint dont i parl’te i a été réélu in quate-vingt-un ! In sait tertous que ch’est min François qui été élu ch’t’année-lal. Ouais, mais ch’est bin min Valéry qui ch’étot fait piquer l’plache. In ch’souvient tertous d’sin dichcours d’adiu. D’ailleurs, ch’est chertain’mint l’seul truc qu’ches jonnes is doiv’tent connaîte d’li. Puich’que ch’est l’générique d’fin d’ches infints d’el télé. Ch’est troublint, d’autint qu’in sait qu’i a eu gramint d’mau à digérer ch’défaite. Ch’est pratique l’fic’chion, te peux réécrir’te ch’t’histoire à tin avintache. Cor’ un truc bizarre, dins sin roman, i est veuf. Commint cha ? Je n’savos pon qu’Anne-Aymone alle étot fanée. Ch’est l’bouquet ! A moins qu’in ait annonché cha quind j’étos dins ch’pâté. Pach’que j’avos trop bu d’valériane pour dormir ou trop lu d’Valérie-Anne. Ch’qui est parel, même effet somnifère ! A’ch’t’heure, chi in ch’arplonche in arrière, cha n’le f’sot nin un Présidint qui avot eune maîtrèche. Quoque cha fut p’t-ête li qui a arlinché ch’conchept d’el favorite d’euch Ro.

Dir’te qu’in prêtot cha à min François et à cha Peugeot. Ah, bah, nin ! J’em sus cor’ gourée. Et cha Pingeot, v’là qui est miux. Pourtint i y a eune phrasse mnémotechnique pour art’nir cha : In peut mucher eune Peugeot chous eune mezzanine, mais pon eune Mazarine chous eune Pingeot ! Bref, j’arviens à min idylle présidinchielle. Est-che qu’in peut vraimint pinser que Patricia, dins ch’roman, ch’est Lady Di. Ch’est cor’ gramint troublint ! Lady Di, Princesse de Galles et Patricia, Princesse d’Cardiff. Or, mes gins, chi je n’sus pon trop mauviaisse in géographie, Cardiff, ch’est bin à ch’pays d’Galles ! Infin, même chi in  peut dir’te que l’fic’chion alle arjoint l’réalité, i y a quind même un truc qui m’chiffonn’te : Commint Lady Di alle aurot pu querre bleue d’min Valéry ? Ch’est pon eune gravure d’mote ! L’amour, mes gins, cha ne ch’echpliqu’te pon ! Pis, i faut rinde à Valéry ch’qui appartient à Giscard. Lady Di alle n’étot pon attirée par ches gravures d’mote. T’as qu’à raviser l’guiffe à min Prince Charmant ! Pardon, j’ai cor’ été trop vit’. Ch’première syllape alle est bionne, mais pon l’fin d’euch miot. Charles, te l’auras rectifié…

Pis i faut auchi arplacher un contexte. Chi, in France, in fait des gorges caudes in disant : A nous ches p’tites Inglaisses, pour ches Inglaisses, l’charme français i n’est pon négligeape ! Ch’est toudis l’même début mais cha arsimpe pus à charmant… Chins compter eune vérité vraie ou eune léginde. Chelon qu’t’es un Français ou eune Françaisse. Ches Français is sont des cauds lapins ! Ch’qui, aveuc toute l’grivoiserie dont j’ai querre à juer assez chouvint, arvient à dir’te que : In chosissant Valéry à Charles, com’ caud lapin, alle a chertain’mint perdu in grintes orelles mais alle a gagné in carotte ! Oops ! alles von’tent ête cuite, ches miennes, chi j’vais faire un tour dins sin pat’lin à ch’ti-lal…

Cha, ch’étot pour ch’côté coquin. A’ch’t’heure, pour ch’côté état civil, in supposant qu’is ch’étotent mariés, alle y gagnot vaqu’mint in timps. Je m’echplique, mes gins. Imagine qu’alle arrif’ quéque part :  Bonjour, j’sus Madame Di, épouse de Valéry Giscard d’Estaing, Présidint d’el République françaisse. Gramint pus simpe que l’verchion inglaisse. Attinchion, mes gins, prind eune bionne bouffée d’air avint. In y va : Hello, j’sus Lady Di, épouse of Son Altesse Royale le Prince Charles Philip Arthur George, Prince de Galles, Duc de Cornouailles et Comte de Chester, Duc de Rothesay et Comte de Carrick, Baron de Renfrew et Lord des Îles, Prince et Grand Sénéchal d’Écosse, Chevalier de l’ordre de la Jarretière, Chevalier de l’ordre du Chardon, Chevalier grand-croix de l’ordre du Bain, Ordre du Mérite, Chevalier de l’ordre d’Australie !

Cha y est, in est arrivé ! J’ai même carrémint chingé d’paragraphe pour qu’t’arprennes tin souffle. Pis j’n’ai rin invinté. Tout i est vrai ! Ch’est pon compliqué, ch’carte d’identité, à min Charles, ch’est un bottin ! J’vais juss’ modifier un tite. J’vais trinsformer Duc de Cornouailles in Duc à cornes tout court. Même ch’i n’étot pon mau, nin pus, pour dichtribuer des cornes. Cha n’étot pon un eximpe d’fidélité, min Charles. Lady Di alle aurot donc treuvé ch’réconfort dins ches bras à min Valéry, in brayant su sin épaule, qu’cha ne m’étonn’rot pus. D’autint qu’i a ches bras et ches épaules much’clés. Tiens, chi te n’es pon convaincu, te n’as qu’à juer d’l’accordéon com’ Gillou, au lieu d’aller boir’te un tiot cop à l’mason !

In dira ch’qu’in voudra, mais min Valéry, ch’est un athlète. I n’a pon que ch’t’haut much’clé, i a auchi ches gambes. I a jué à ch’foot, faudrot pon l’oublier ! Toudis i est qu’sin roman, qui sort seul’mint ch’diche octope, i fait couler ch’t’encre, alors qu’i in a d’jà utilisé gramint pour raconter sin histoire. Mi, j’sus d’avis à croir’te qu’i va voler l’vedette à gramint d’autes. Chi cha march’te, in n’a pon fini d’vir ches politiques faire du roman réalité-fic’chion : Titine et la garden party à ch’t’Elysée ; Ségolène et l’mychtère du cerveau cong’lé dins sin frigidaire ; Bertrand, chouv’nirs d’un maillot rosse à ch’tour d’France ; François B. et l’oranche bleue ; Danny, bienv’nue chez ches verts ; Olivier et l’énigme des lettes in artard ; DSK : In a piqué mes pilules bleues ! Jean-Louis, six rosses, un combat ; Roselyne à Crocs, commint j’ai décroché… Et j’in pach’te !

Infin, tout cha pour dir’te que ch’est un bieau roman, ch’est même eune bielle histoire, ch’te romanche intre ch’Présidint et ch’Princesse. J’espère juss’ qu’el fin alle sot pus bielle qu’el réalité. Pach’que cha fait toudis rêver eune histoire d’amour qui ch’termin’te bin et pon contre un pilier d’un pont parisien. Pis, in aurot querre à eune fin moins tragique pour ches Marilyn et John à l’françaisse. Te sais, mes gins, pus dins ches paillettes, ch’glamour, che pon Pompidou… Ah, bin, nin ! In n’va pon auchi li treuver eune avinture à ch’ti-lal !