In même timps, mes gins, ch’est normal, puich’qu’in a arrêté ch’maîte canteur. Infin, i n’faut pon aller trop vit’, in va dir’te qu’in a arrêté ch’présumé corbieau dins l’Hérault ! Un corbeau, ch’est pon forchémint un maîte canteur… T’in parl’ras à Jean de La Fontaine. Sin corbieau ouf’ bin sin bec pour montrer ch’bielle voix, nin ? Pourquo qu’in dit présumé ? Ch’est très simpe. In est supposé ête présumé innochint tint qu’in n’a pon été jugé coupape. Pis, pour l’heure, i y a tout un traval d’inquête à parfaire. In attindant, ch’poliche alle li a volé dins ches plumes, ch’est quind même un signe ! D’pus, mes gins, cha quée gramint bin qu’i sot arrêté ch’ouiquen. Bah, ouais ! Ches postiers su Paris is sont in grèf’. Chi, chi, cha leu arriv’te ! T’imagine, ti, ch’i avot mis eune nouvielle fournée d’lettes à l’poste ? Alles aurorent traîné dins un coin, dins un bureau parisien. Alles aurotent pu ch’égarer com’ ch’te carte postale, i y a quéques s’maines, qui est arrivée soichinte-diche ins après. Te t’rinds compte, cha s’rot chous l’règne d’min Nicolas II, qui suchéda à sin père, Jean Premier, comte D’Arty, d’pis qu’i avot chouscrit l’contrat d’confianche G6K. Infin, j’voulos dir’te d’mariache…

Quo ? J’ai oublié eune alternative… Bion, ch’est mal barré, quind in vot ch’campagne d’communicachion su Internet, mais chi t’y tiens ! J’vais donc dir’te qu’alles pourrotent arriver chous l’règne d’Marie-Ségolène qui suchéda à ch’grind-mère, prêtresse d’el politique à ch’tite d’honoris Bécassine, qui n’a jamais voulu laicher l’plache à sin fils. Tertous i ch’rappell’te ch’devisse : J’y sus, j’y règne ! V’là, com’ cha t’es contint ? In a rétabli ch’t’équilibre à ch’mitan. Rêf’ pon ! J’sais bin que j’inticipe d’soichinte-diche ins, mais cha n’est pon eune raison pour faire d’el scienche fic’chion. François III, cha m’étonn’rot gramint ! Bref, aveuc tout cha, j’em sus, com’ ch’te carte postale, égarée. Cha n’est pon d’cha dont j’voulos t’parler. J’arviens à min corbieau. Ch’est vraimint eune indoulle ch’ti-lal. I ch’est fait coincer par des tests ADN, pach’qu’il a collé des timbes. Qué babache ! Qué babache deusse fos ! D’jà, i aurot dû acater des timbes autocollants. Cha n’est pon fait pour ches z’arnards ! Pis, ch’i avot ravisé ches experts, i aurot su pour ches tests ADN…

Ch’femme alle a été plachée in garde à vue pour vérificachion. Ch’est sûr’te, in peut toudis croir’te qu’alle a piqué eune plume pour écrir’te, alle-auchi ! Mais pour écrir’te quo ? Qu’sin mari, ch’est un homme aigri qui est toudis in train de ch’plainde. In ch’in doute bin, mes gins ! Chi ch’vie alle avot été rosse pour li, i n’aurot jamais pinsé à écrir’te ches lettes. Pis, quind j’dis rosse, te peux même in déduir’te que ch’est in direct aveuc l’couleur politique d’euch gouvern’mint. Puich’qu’i invoie ches miots d’amour à ches gins d’l’UMP in particulier. A’ch’t’heure, ch’est quo l’significa’chion d’el balle qu’i joint aveuc ? Ch’est sûr’te, te vas m’réponde d’euch tac à ch’tac, ch’est l’mort ! Ch’est bin, te peux arv’nir in deussième s’maine ! Mi, j’vos auchi eune métaphore…

Bah, te vas m’obliger à echpliquer eune théorie, qui in vaut eune aute, j’te l’accorde. Dins sin cerveau déringé, li, i a p’t-ête pinsé à ch’que cha f’sot, eune balle. Ouais, mes gins, pour li, cha veut dir’te espèche d’trou d’balle, pach’qu’i n’est pon d’accord aveuc eusses. Toudis i est qu’i aura gramint d’timps, à m’mote, pour méditer sin acte. Chins trop ch’avincher, même ch’i est toudis présumé innochint, i a quind même arconnu avoir écrit ches lettes. I n’aura pus qu’à faire un lif’, d’euch fond d’euch cellule, com’ d’autes dét’nus. Ch’est gramint plaisant d’écrir’te. Ch’est pon mi qui vais t’dir’te ch’contraire. Pis, cha permet d’t’évader…

In va même essayer d’li treuver ch’tite. Quo qu’ch’est qu’t’in pinses : Ches lettes d’min villache, dont cha s’rot li ch’t’Hérault. Pardon, j’voulos dir’re héros. Moulin, ch’est d’jà pris. Pis, cha va trop li rapp’ler l’poliche aveuc ch’commichaire. Sin vrai nom i sonn’te pon mal. Thierry Jérôme, ch’est bin. Pis Alphonse Daudet, ch’étot d’jà fait auchi. Quoque… Daudet, cha arsimpe fort à baudet, pach’que j’in arviens toudis pon, mes gins, qu’in puiche cor’ coller des timbes aveuc ch’bouque, quind in sait qu’i y a des timbes autocollants et des tests ADN, et qu’in veut invoyer des lettes anonymes ! Tout compte fait, ch’est vraimint li, ch’trou d’balle !