Chalut mes gins ! Quind cha dot bouger, cha boug’te ! Ch’est ch’princhipe même d’Internet, ête interactif et rapite. Quéquefos, ch’est vrai qu’ch’est p’t-ête un peu trop. Parfos auchi, cha fait gramint réfléchir. Chi tertous i a tiré à boulets rouches su l’chite à Dame Ségolène, i y a deusse jours, cha li a permis de ch’rinde compte qu’i n’faut quind même pon prinde ches gins pour des baudets, même ch’is vienn’tent de ch’région ! A’ch’t’heure, in promet que ch’fond d’écran i va chinger chouvint, ch’est eune vraie révoluchion !

Ch’est cor’ un jour d’ù qu’i y a gramint d’révoluchions. Bah, nin, ch’est pon pach’que ches deusse jumelles alles ch’obcherv’tent in chien d’faïenche in attindant l’première qui va ouvrir l’guerre. Te sais, com’ ch’jeu qu’tertous i a fait quind i étot gamin : J’te tiens, te m’tiens par l’barbichette. Ch’premier qui rira aura eune tapette. Infin, ichi, cha s’rot pus : Je t’obcherve, te m’obcherves dins tous ches médias. Ch’première qui rira d’l’aute alle f’ra ch’bionheur d’euch Net. Bah, t’inquiète, mes gins, cha n’va pon durer longtimps. I y in a forchémint eune d’ches deusse qui n’va pon résister à ch’plaiji d’glisser eune pieau d’banane chous l’pid d’l’aute…

Ah, bin nin ! J’oublios qu’cha n’est pon ch’momint pour ch’casser eune gambe ! Tout cha à causse d’min Nicolas qui rindot visite à ches malates. Infin, visite, ch’est un bin grind miot. Pach’que mi, quind j’vais rinde visite à un malate, dins un hôpital, je n’fais pon évacuer l’plupart. Nin ! Cha n’prête aucun intérêt d’aller vir quéqu’un, pis d’arriver dins eune champe vide. Cha s’rot vraimint babache ! Te t’vos, ti, arriver aveuc tin bouquet d’fleurs et d’ne treuver perchonne. Churtout quind tin bouquet i a coûté deusse chint mille euros ! Ouais, ch’est vrai, t’as raison, mes gins. A ch’prix lal, ch’est prech’que toute l’produc’chion d’el Hollande qu’te peux avoir…

Vingt dius ! In peut dir’te que, quind min Nicolas i boug’te, cha fait gramint d’bruit. Ch’est tout ch’bruit des billets d’binque qui ch’invol’tent à ch’vint ! Pis, com’ tout trinch’port d’fond, in a déplaché gramint d’poliche. Cha auchi, cha fait du bruit. Infin, cha a fait auchi du bruit pach’que cha proteste d’partout. Ch’est un peu normal quind même ! Quind in pach’te sin timps à dir’te que ches caiches alles sont vides, cha n’el fait nin d’dépincher 200.000 euros pour eune visite ; chi près d’Paris d’churcroît ! D’autint, mes gins, qu’cha n’étot pon pour l’bionne causse. In effet, in aurot pu croir’te qu’i y a eu eune pandémie localisée su ch’palais d’l’Elysée et qu’i avot eu b’soin d’plache pour mette tertous in quarintaine, mais même pon ! D’toute fachon, cha aurot été pus fachile d’les laicher à ch’palais et d’verrouiller ches postes. Qui ch’est qui a dit : Et d’jeter ches clés ?

Ch’visite, ch’étot pour fiêter l’2500^ème greffe hépatique ! In ch’doute qu’i y a dû avoir ches tiots fours et tout quo qui va aveuc, seul’mint, ch’est inhumain ! J’m’explique. Ch’pauf’ malate, li, qui étot quind même ch’vedette d’euch jour, i n’in a pon profité ! Te sais, mes gins, ch’est com’ quind t’arrifes dins un magasin. In t’dit qu’t’es le Xème visiteur et ch’est pour cha qu’te gagnes un lot. Li, chi in li avot dit avint, j’sus sûr’te qu’i aurot préféré ête che 2501^ème , com’ cha i aurot pu profiter de ch’t’apéro aveuc min Nicolas ! Bah, j’oublios ! Aveuc un foie in vrac, un apéro, ch’est pon indiqué. Juss’ un verre alors !

Tindis qu’lal, i arrif’ à ch’t’hôpital. In l’acceulle : Bravo ! T’es che 2500^ème pour eune greffe hépatique. Ch’est épatant ! Te vas archevoir l’visite d’min Nicolas, in perchonne ! Pis, chi t’es bin sache, Carlita alle va v’nir t’canter eune tiote berceusse. Ben, ouais ! Te vas excuser ch’t’hôpital, mais in n’a pon gramint d’anesthésistes chous l’main. In a quind même dû chupprimer vingt-chix implois ch’t’année. Donc, in fait aveuc ches moyens d’euch bord…

A m’mote, mes gins, i faudra ch’habituer à cha. Eune tiote canchon d’Carlita, in guisse d’anesthésique, cha dot l’faire auchi. Te rajoutes à cha min Nicolas qui t’fait sin tiot dichcours. J’te l’garintie. Avint chinq minutes, te pars à ch’pays des rêfes com’ pour rir’te ! Toudis pour fiêter in grintes pompes ch’t’heureux gagnant, ch’est m’Roselyne in perchonne qui va assurer ch’rôle d’infirmière. Te vos, in n’t’as pon minti. Quind in dit in grindes pompes, cha n’est pon pour rir’te. Ch’est même d’el marque, puich’qu’alle est v’nue aveuc ches Crocs !

Te vos, mes gins, ch’est tell’mint interactif Internet, qu’in a toud’chuite faire appel à min couple célèpe Paul et Mick. Alors, qu’in fin d’compte, perchonne n’a rin compris. Chi min Nicolas et Roselyne is sont v’nus, ch’est pour prêter main forte à ch’t’équipe pach’qu’is sont in chous effectif dins ches hôpitaux. Pis, quind in même timps, t’as min François Fillon qui dit qu’i faut réduir’te ches défichits publics, te comprinds talors que même ch’présidint i monte l’eximpe puich’qu’i assure, li-même, l’acceuille à l’hôpital pour éviter d’créer des dépinches supplémintaires in imbauchant quéqu’un…