Chalut mes gins ! Cha m’fait vaqu’mint plaiji de t’artreuver ichi. Ch’est gintil d’avoir invoyé des mails pour savoir chi j’allos bin. Ch’est vrai que, mi, muette com’ eune carpe pindint chinq jours, cha n’est pon courant. T’as cru que Marie Toutoule alle a attrapé ch’grippe A, mais nin. Infin, pon cor’, car j’ai croisé des gins atteints. I faut espérer qu’euch virus i aura peur d’mi. In attindant, tout i va bin ! J’étos juss’ in déplach’mint com’ gramint d’ches élus, ch’ouiquen, mais in ne m’a pon invoyé d’insultes, ni même d’pot d’yaourt…

Te m’croiras chi te veux, mais in m’avot dit qu’i y avot eune grinte fiête à La Courneuve, aveuc des canteurs, des attrac’chions, des manèches et même un buffet ! J’avoue que j’n’avos pon bin compris, su ch’cop, pourquo in avot baptisé ch’buffet Marie-Georges. I faut croir’te que, par momints, j’fais m’blonte ! Tiens, cha, ch’est pour ceusses qui sont in train d’el pinser. A m’décharge, mes gins, cha fait gramint d’timps qu’in n’avot pon intindu parler d’alle. In parl’te toudis d’ches verts aveuc min Danny. D’ches deusse jumelles d’La Rochelle. D’euch facteur qui fait ches tournées in Porche. Ch’même qui a épousé eune d’ches pus grosses fortunes d’France, mais qui veut quind même l’fin d’euch capitalisme. A croir’te qui veut mettre ch’femme su l’paille…

Bref, intre ch’rosse et ch’rouche vif, j’avos complèt’mint oublié qu’i y avot du rouche tout court in opposichion à tout ch’bleu ! Ouais, j’sais, in a auchi du oranche, ch’est vrai, mais j’vais sortir min joker ! J’n’ai toudis pon compris commint qu’in arriv’te à faire du oranche in mélingeant du bleu et du rosse. Donc, quind in m’a proposé d’faire partie d’euch voyache, j’ai dit banco ! Mi, quind i s’agit d’avoir l’tiête à l’invers, su un manèche, j’sus toudis partante. In pus, ch’i y avot des canteurs, cha m’plaisot bin auchi. Mes amis is étotent donc v’nus m’querre aveuc leu Ferrari. J’dis cha, pach’que même leu carette alle étot à ches couleurs d’euch ouiquen. Sauf que, in guise d’Ferrari, cheule-lal alle étot plutôt aveuc un qu’val cambré par ch’pods d’ches années plutôt qu’par ch’fougue !

Ving dius, mes gins ! Cha grouillot d’monte, arrivés là-bas. Ch’étot l’foule des grinds jours. A croir’te qu’i ne d’vot pus rechter un communiste chez li. I fallot bin lâcher ch’miot un jour ou l’aute. Ch’rouche dins ch’mitan, ch’est cha ! In attindint, mi, j’ai laiché mes amis aller faire ches stands, j’avos miux à faire que d’el politique. J’étos v’nue pour ches manèches et ches canteurs. I y avot tout quo qu’i fallot. Les Wampas, aveuc Didier Wampas toudis autint excité d’euch bocal. Manu Chao qui a fini par l’dir’te à l’fin d’sin tour d’cant. Plein d’autes dont j’n’avos jamais intindu parler. Pour t’chiter qu’un groupe, i y avot « ches Grintes bouques » ! Chi, chi, cha n’ch’invinte pon, mes gins ! Com’ je n’résiste pon à ch’plaiji, j’vais ajouter qu’inviter ches grintes bouques à eune fiête d’ù qu’i y a Buffet, cha n’minqu’te pon d’piquant ! D’autint qu’i y avot auchi des stands d’ù qu’te pouvos minger des merguez…

Pour clôturer ch’liste d’canteurs, i fallot bin eune tiête d’affiche : Maxime Le Forestier. Te sais, ch’ti qui est né quéque part. Com’ tertous, d’ailleurs ! In peut auchi rapp’ler, pour rechter dins l’catégorie buffet, qu’i a canté, in 1973, Le steak ! Ch’est auchi un visionnaire puich’qu’in 1981, i cante : Le fermier, le dompteur, le président et l’autre. I ch’est gouré d’peu, puich’qu’in ch’artreuve aveuc Dany grind copain d’euch fermier Bové, Titine ch’dompteusse d’éléphants, ch’président et l’aute, dont in n’connôt toudis pon l’idintité. Chertain’mint cheule ou ch’ti qui va sauver ch’monte ! D’ailleurs, j’y pinse. Pourquo Le Forestier à l’fiête d’l’Huma ? I aurot été pus à l’aise à l’fiêete d’ches verts, in tant qu’forestier. V’là, ch’est dit ! Toudis i est que j’m’attindos à ch’qu’i ching’te ches paroles d’euch canchon : « Ch’est eune mason rouche, accrochée à l’colline… » Mais nin ! Alle étot toudis bleue, ch’mason, et perchonne i n’l’a hué, li !

Bin, ouais, te dos t’douter que j’vais auchi parler d’ches guess-stars ! In m’avot promis des attrac’chions, j’avoue qu’j’in ai eu ! Quind j’sus montée dins ch’manèche, qui ch’app’lot Kamikaze, j’m’attindos à in ête toute artournée. Je n’sus pon l’seu à avoir eu quéques frayeurs. In premier, min Frédéric Mitterrand. Li qui a un parlache chi sophistiqué, in li a dit des miots qui n’sont pon dins sin vocabulaire. I n’a pon tout compris. In pus, i n’avot pon sin dic’chionnaire aveuc li. A un momint donné, i a cru qu’i y avot infin eune voix amie quind i a intindu crier « casse-toi pauv’ con ! » Mais quind i a tourné ch’tiête, ch’étot pon min Nicolas mais quéqu’un qu’i n’connaissot pon. A m’mote, i a dû ch’gourer d’indrot. Quind i a su qu’i y avot des canteurs, i ch’est dit qu’ch’étot bion pour li d’rinde eune tiote visite. D’pis qu’i est ministre d’el culture, i n’a pon cor’ eu ch’timps d’rincontrer tertous ! Ch’étot eune occasion com’ eune aute. I f’sot bieau. Cha n’étot pon loin d’Paris, cha paraissot fin bénache. Graf’ erreur, min Frédo. Cha n’euch fait pon d’juer ches pique-achiette pach’que t’as intindu dir’te, com’ mi, qu’i y avot buffet !

Toudis dins l’catégorie nourriture, in pach’te à ch’dessert. Ouais, ch’est un laitache, mais ch’est pus chouvint in guisse d’dessert qu’in l’minge. Te t’chouviens, dins l’ducache d’tin quartier qu’i y avot toudis un casse-boîte. Te d’vos lincher eune boule in tissus pour faire querre ches boîtes et t’avos gagné ! Bin, ichi, ch’est prech’que parel. Te prinds un pot d’yaourt in guisse d’boule et te mets un ministre in face. Seul’mint, ches militants communistes is aurotent dû ch’douter que Eric Woerth i étot champion in esquive. D’jà, ch’est un politique, alors l’esquive ch’est, com’ qui dirot, eune s’conde nature. Inchuite, d’pis ch’t’affaire d’Bush aveuc ch’godasse, qu’i a failli prinde in pleine guiffe, te pinses bin qu’ches politiques is ont eu ch’timps d’faire d’l’intraîn’mint ! Te sais, pour ches soldats, t’as un stache commando. A’ch’t’heure, quind te veux dev’nir ministre, in t’obliche à faire un stage d’esquive d’objets. Cor’ raté, com’ i disot Garcimore…

Mes gins, in dit toudis que ch’monte i est tiot, j’in ai cor’ eu l’preuf’ ch’ouiquen. Te sais, je n’étos pon ch’seu ch’tie à avoir fait l’route jusqu’à l’Seine Saint-Denis. Nin ! D’vine qui j’ai rincontré ? Bah, ouais, ch’est vrai, t’as dû l’vir à ch’tévé ! Titine alle étot lal auchi ! Alle est su tous ches fronts, in ch’momint. Infin, sauf su ch’ti d’min Jean-Marie, bin intindu. Ichi, alle étot v’nue à l’invitachion d’Marie-Georges. Te connos Titine com’ mi. Quind alle a intindu buffet, alle a dû faire l’même erreur qu’mi. Pis, un buffet, cha chingeot d’ches moules-frites d’el s’maine dernière. Bref, su plache, alle a dû comprinte. Sin dichcours, alle l’connôt par cœur. Alors, alle n’a pon été prisse à ch’dépourvu : « Ch’priorité, ch’est ch’rassimbl’mint d’el gauche, tous ches sochialistes is sont d’accord lad-chus ! » Oops ! L’phrasse qui tue. I aurot fallu qu’alle ch’arrête à ch’virgule…

A m’mote, tertous is n’sont pon d’euch même avis. Min Jean-Luc Mélinchon i fait toudis l’grinchon. Li, i veut bin ch’rassimbler mais tout seu d’sin côté !  Ch’facteur, parel, puich’qu’i n’est pon v’nu à ch’fiesta alors qu’i avot été invité. Bref, cha n’est pon gagné pour Titine. Mi, j’ai gramint l’impréchion qu’alle est com’ Dom Quichotte de la Manche, alle ch’bat conte des moulins à vint. J’vais démontrer cha : Un, l’manche ch’est juste à côté d’el mer de ch’Nord, donc cha la connôt. Deusse, pis lal, te vas armarquer toute l’puissinche d’min raisonn’mint, moulin à vint, cha ne s’rot pon un synonyme d’politique ? Pach’que, chi te réfléchis bin, un politique, ch’est vraimint un moulin à vint ! Bion, i y a eune faille dins m’logique. Alle auchi, ch’est eune politique et Diu i sait qu’alle brache gramint d’vint alle-auchi ! Moins qu’Ségolène, ch’est vrai, mes gins, t’as raison. Chi te t’chouviens d’euch performinche à ch’Zénith, ches bras is marchotent dins tous ches sins quind alle prononchot sin cri d’guerre !

Toudis i est qu’alle a bin profité de n’pon ch’faire voler l’vedette, com’ à La Rochelle, par Ségolène, qui n’étot pon lal, pour faire un appel d’euch pid. Bin, ouais, ch’rassimbler tout seu, alle treuve ch’tâche gramint compliqué à faire. Alors, alle sort sin joker, dins l’ginre « même pon cap d’pacher à gauche » en ajoutant : « Chi François Bayrou dit qu’i n’est pus d’drote, j’n’ai pon cor’ pu vérifier qu’i étot d’gauche. » J’sus continte d’savoir que je n’sus pon l’seu à avoir des problèmes aveuc m’drote et m’gauche quind j’parl’te d’min François ! Cor’ eune fos, mes gins, oranche, ch’est nin eune couleur intre rosse et bleu. Pis, chins faire d’mauviais echprit, oranche, ch’est ch’couleur d’euch désespoir in ch’momint. Te n’es pon convaincu, ti ? Parle-in à ches gins d’France Télécom…

Mes gins, cha ne s’ra pon simpe. Marie-Georges Buffet alle n’est pon d’avis à partager ch’tape aveuc ch’MoDem qui a ch’cul intre deusse caïlles. Buffet, tape, caïlles, in ch’croirot chez Ikea aveuc mi. I n’minqu’rot pus que j’parl’te d’Bernard…  Bref, alle a répondu à Titine : « Ch’tourner vers ch’MoDem, ch’est aller drot vers ch’défaite. » Sauf que, ch’tourner vers ch’MoDem qui n’sait pon dins quel sins i dot tourner, cha n’li donn’te pon l’sins d’el défaite, in fin d’compte ! In tourn’te in rond, in tourn’te in rond ! Et ch’étot bin ch’que j’étos in train d’em dir’te quind j’m’artreuvos pour un tour d’manèche d’pus. In a cor’ braché gramint d’vint, ch’ouiquen, com’ ches moulins. Chi seul’mint in avot pinsé à mette eune dynamo, cha aurot pu faire éolienne et in aurot eu d’l’électrichité…