Chalut mes gins ! Bah, ouais, ch’est cor’ mi ! J’cros que j’vais avoir gramint d’mau à chuivre toutes ches actualités à l’allure d’ù qu’alles arriv’tent ! Te sais que, ch’mercredi, ch’est l’journée tradichionnelle pour ches sorties d’films à ch’cinéma. Seul’mint, à’ch’t’heure, ch’est chertain’mint pon l’sortie d’un film qui va marquer d’eune pierre blanche ch’jour dins ch’calindrier ! D’ailleurs, je n’sais pon pourquo j’parl’te d’pierre blanche, puich’que cha s’rot plutôt un pavé. Un bieau pavé d’euch Nord qui fait chint quate-vingt-dousse paches…

Vingt dius, mes gins ! Cha cauffe dur’te pour l’matricule d’Titine. D’pis ch’matin, à l’radio, j’intinds que ch’neuf du neuf d’l’année deusse mille neuf, cha porte chince mais j’sus pratiqu’mint sûr’te qu’alle n’dot pon ête d’euch même avis ! A m’mote, pour alle, in a dû mette ches nombes à l’invers. Cha s’rot pus 666, eune journée diabolique in somme. Tiens, te vos pourquo j’ai parlé d’pavé d’euch Nord, même ch’i a été écrit par des parisiens. In parl’te toudis de ch’t’enfer d’euch Nord à propos d’ches pavés ! « Hold-uPS, Arnaques et Trahisons », tout i est dit dins ch’tite, signé par Antonin André et Karim Rissouli. Aux éditions du moment, les bins nommées, car ch’étot vraimint ch’bion jour, un jour d’chince, donc l’bion momint, pour sortir un lif’ parel ! Mais, au fait, ch’est eune chince pour qui, alors ? Bah, mi, j’vos bin eune cindidate, ch’est Ségolène ! In pus, chi te t’chouviens, mes gins, alle avot d’jà rué dins ches brancards pach’qu’alle étot sûr’te, d’pis ch’début, que chint deusse vox d’pus, ch’étot grâche à eune magouille !

Ségolène alle est quind même quée d’ches nues quind alle a appris à l’sortie, que cha n’étot pon d’chint deusse vox mais d’un millier. Allen qui chouvint parl’te « rapid’mint », alle a pris des gants, chi, chi, pour dir’te : « In savot que cha avot triché mais pon de ch’t’ampleur. » Alle, qui n’hésite pon à donner des noms d’habitute, j’la treuve bin prudinte. In savot, cha avot triché… Tout i est dins l’imperchonnel. A croir’te que ch’est ches urnes alles-mêmes qui ont modifié ches bull’tins ! Bin, ch’est des grintes farceusses, ches urnes, ch’est bin connu… Ségolène alle in profite quind même pour tirer l’couvrante à alle, eune fos d’pus après La Rochelle. Et d’ajouter : « J’pinse qu’in n’peut pon laicher pacher cha pour ches militants qui ont voté, pour ch’t’opinion publique, pour ches Français pour ch’princhipe même d’el démocrachie, pour ch’morale in politique. » Vingt dius ! Quelle grinte phrasse, j’ai eu du mau à aller jusqu’à ch’biout chins rechpirer. Hé, m’Ségolène ! Te peux les faire pus courtes tes phrasses. J’sais qu’te n’minques pon d’air, mais ch’est nin l’cas d’tertous ! Mi, j’dis ri, mais… Pis, cha fait deusse fos, in tros jours, qu’te parl’tes d’morale in politique. Mi, je n’dis rin, mais…

Dans ch’bouquin, in peut lir’te que Titine alle aurot déclaré, quand alle a su que ch’étot Ségolène qui étot in tiête : « In n’prind pus d’gants, vous bourrez ches urnes ! » Quo qu’ch’est qu’te pinses qu’cha veut dir’te, ti’z’aute ? In leu a offert eune tiote bistoulle à ches urnes ? Ch’est com’ cha qu’ches erreurs alles arriv’tent. Tertoutes quervées ! Ches ch’tis is von’tent cor’ pacher pour des alcooliques. L’preuf’, dins ches bureaux d’vote à Lille, ch’est lal d’ù qu’i y a eu l’pus d’erreurs !

Alors, d’pis ch’matin, in apprind auchi qu’cha n’arrête pon d’déclarer à tout va. Laurent Fabius nie tout trucache. Dans ch’même timps, in peut lir’te dins ch’bouquin que Laurent Fabius et DSK sont ches marionnettistes d’Titine. Ch’est bizarre cha ? Mi, j’n’avos jamais armarqué qu’alle avot des fils. D’accord, alle a chouvint des t’nues qui laich’tent à désirer, mais ch’est pon des loques quind même ! Is sont vraimint mauviaisses lingues, ches deusse journalistes… Is ont dû confondre ches fils aveuc ch’fouet qu’alle a utilisé quand i a fallu drécher ches éléphants ! François Lamy, qui est just’mint l’ami d’Titine et même sin bras drot, in quéque sorte, i a dit que ch’bouquin étot juss’ un te copes-te coll’tes de ch’qui a d’jà été dit. Milliard ! Commint qu’cha ch’fait qu’in l’savot d’jà et qu’perchonne i in a parlé avint ? Pis, min François, chi te réfléchis à quo qu’te viens d’dir’te, te confirm’tes l’à-propos de ch’qui a été écrit ! Te vas vit’ t’artreuver à n’pus ête « Lamy » dont alle rêvot !

A’ch’t’heure, i faut qu’in ravise ch’que Titine alle a répondu. Ch’est normal, in a tertous pochibilité d’exercher un drot d’réponche. Pour résumer, cha réac’chion, ch’est « même pon peur ! » Alle n’est pon inquiète, alors j’ne vos pon pourquo in ch’inquiét’rot nou’z’autes! Mais alle est dev’nue eune chpécialiste in humour, d’préférinche noir’te, et in dérision. Auchi, alle a ajouté : « J’cros qu’je n’lirai même pon ch’lif’. J’attends ch’film. D’toute fachon, j’in ai vu d’autes... » Bah, ouais, cha f’rot chertain’mint un bion film ! Espionnache, trahisons, magouilles, mystique, chi in jue, com’ j’l’ai dit à ch’début intre 999 et 666. Querche pon, ch’est nin cha ch’code Da Vinci. Ichi, cha s’rot pus ch’code à ches ch’tis ! A cha, in rajoute eune rivalité à la Pétroleusse aveuc Ségolène. Un biel héros qui essay’rot d’arcoller ches morcieaux. Cha, ch’est pour mi et j’offre ch’rôle à min Benoît Hamon. Des intrigants, i y in a toute eune liste ! Alors, com’ j’ai peur d’in oublier, je n’vais chiter perchonne…

Bion, in a fait ch’tour Ah, bin, nin ! J’ai oublié ch’fait qu’alle ait dit qu’alle n’allot pon l’lir’te. Pourquo, m’Titine ? Chertain’mint pach’que te connos par cœur tout quo qu’i y a d’dins. Ch’est, du moins, ch’qu’in n’va pon minquer d’interpréter aveuc eune telle déclarachion. Mais alors, quo qu’te vas n’in faire de ch’lif’ ? L’accrocher dins tes tiots coins in chouv’nir d’euch bion viux timps d’ù qu’in avot pon cor’ invinté ch’PQ ? Attinchion, i y a des miots qui fon’tent mau même quind in les destin’te à un trou d’balle ! Un conseil, acate-in plusieurs et monte d’chus ! Cha t’donn’ra eune aute vision d’el vie, et l’av’nir très chertain’mint, qu’te pourras raviser chous un aute angle. Pis, j’sus sûr’te que même Ségolène alle n’pins’ra pon qu’te t’es érigée eune statue su un bieau pid d’estale…