Chalut mes gins ! Merchi à tertoutes et à tertous pour ches témoignaches que te m’as invoyés par mail chuite à min artique su l’mort d’Sim. J’auros préféré qu’te m’les invoies par ches commintaires pour que tertous i in profite, mais j’sus continte d’savoir qu’cha a boul’verché gramint d’monte et qu’ceusses qui m’ont écrit von’tent garder d’li un très bion chouv’nir auchi. Infin, com’ i disot l’aute, ch’ti qui a toudis bion dios : Que l’chpectaque i continue ! Forchémint, ches actualités auchi. L’eune chasse l’aute mais d’pis lundi soir, ch’est carrémint eune révoluchion qui est in marche !

Vingt dius ! J’in ai frod dins l’dios rin qu’d’avoir écrit cha ! Ti auchi chertain’mint ! T’es in train de t’dir’te : Mais quo qu’alle va cor’ m’sortir l’Marie ? J’ai eu bieau raviser ches actualités, j’n’ai rin armarqué d’pus dramatique que d’habitute. In armet eune couche su ch’grippe A dins tous ches journaux télévisés. In peut même dir’te qu’in est paché d’un tiot « a » à un « A » majuscule.  D’ailleurs, in n’sait toudis pon quind in s’ra vac’chiné, puich’qu’i parôt que ch’vac’chin i s’ra prêt quind tertous i aura d’jà attrapé ch’virus. Bion, chi te n’as aucune pathologie, i faudra qu’te sos prudint. Alors, in pourrot faire com’ ches Italiens qui organiss’tent eune grinte tombola pour gagner des implois. Quo t’in pinses d’un Super Tirache d’euch Loto pour gagner eune dosse ? Mais cha n’est pon cha, l’révoluchion in marche, puich’qu’in n’t’a pon cor’ mis au courant…

Alors quo ? Min Nicolas i a été tourné in ridicule par ches journalistes belges. Is in profitent, ch’est normal. Is n’richqu’tent pon de ch’faire taper su ches dogts ! Pis, in dit toudis que ch’ridicule i n’tue pon. Alors i n’y a pon mort d’homme. Bion, ch’est pon cha nin pus. Ségolène alle a déclaré : « Vous trouv’rez rar’mint un leader politique qui ch’sot comporté aveuc autint d’chins moral qu’mi. » Cha n’a rin d’révoluchionnaire nin pus. Chi alle-même alle n’crot pon in alle, cha va gramint ête dur’te d’treuver des gins qui von’tent y croir’te ! Quo ? Te pinses qu’alle a ches qu’villes qui gonfl’tent. V’là un scoop, mes gins. Ind’chous d’un boubou, cha n’che vot nin !

Alors, te n’as toudis pon treuvé ? Quo qu’i ch’est cor’ paché ? Ches journalistes is ont monté eune intox aveuc le vrai-faux clash intre Thierry Henry et Raymond Domenech. Cha n’a rin d’révoluchionnaire égal’mint. Quind te n’sais pon quo qu’i ch’pach’te, te prêques l’faux et t’attinds d’vir quo qu’i va in sortir. Ch’est parel à ch’couer un cocotier pour raviser ch’qui in quée, mais com’ in n’a pon gramint d’cocotiers in France, l’première méthote alle rechte l’bionne. A’ch’t’heure, chi t’as ravisé Thierry Henry faire sin déminti, t’as dû t’dir’te l’même cosse qu’mi : Pon très convaincant ! In avot l’impréchion qu’i réchitot eune lechon. Pis, in dit qu’cha finque jamais chins que ch’fu i est alleumé. Donc, d’ichi à ch’qu’i faille modifier ches paroles d’el célèbe canchon, i n’y a pon loin ! Ch’est nin cha, nin pus, l’révoluchion mais j’vais quind même t’mette ches points su ches « i ». Te sais que je n’voudros pon qu’te rech’tes su t’faim : « Ch’est de Clairefontaine que j’em sus fait virer. Par eune binde de footballeux qui pouvotent pus m’chaquer. I y a longtimps que j’galère, jamais is ne m’ont aimé. »

Pon l’peine d’préchiser qui qu’in va faire canter, mais cha n’te dit toudis pon quo qu’i y a eu d’chi révoluchionnaire dins ches infos d’lundi 7 septempe. Pourtint, chi t’avos été auchi observateur qu’mi, t’auros toud’chuite vu d’quo qu’i ch’agissot. Alors, mes gins, j’avoue que, d’pis l’début d’l’artique, j’jue aveuc tes nerfs pour faire durer ch’suspense. J’t’ai même « induit » d’erreur in parlant d’eune révoluchion in marche, pach’que j’auros dû t’parler d’ches actualités in marche ! Allez, in ouf’ ch’rideau, j’t’ai assez fait mariner com’ cha ! L’révoluchion, ch’est ch’journal télévisé d’M6. In découfre que, contrair’mint à ches journalistes des autes chaînes, ceusses d’el chix is ont des gambes ! L’tiote nouvielle, Claire Barsacq, alle te donnes ches actualités in étant d’bout et in f’sant ches chint pas ! Même ches journalistes qui intervienn’tent is sont d’bout eusses-auchi.

Quo qu’t’in pinses ti’z’autes ? Un gros problème d’budget su l’chix ? Com’ in est in timps d’crisse, is n’avotent pon assez d’pépettes pour acater des caïelles ? Eune livraison qui n’est pon cor’ arrivée ? D’jà qu’is avotent artardé deusse fos l’date d’euch linch’mint d’euch journal, cha f’sot ridicule d’avoir cor’ à l’faire eune nouvielle fos. Bah, in n’in sait rin, mais i faut bin arconnaîte qu’cha accentue l’effet. Quind te la ravises t’annoncher eune mauviaisse nouvielle, in f’sant ches chint pas, cha t’donn’te ch’tournis cor’ pus ! Tout i d’vient sinsachionnel et ch’est eune vraie révoluchion dins ches actualités ! J’t’avos bin dit qu’el révoluchion alle étot in marche. Alle est même su ches deusse gambes !

A’ch’t’heure, même chi cha n’a pon d’quo briser tros pattes à un canard, i faut arconnaîte qu’is ont été futés, ches gins d’el chix ! Faire un journal d’vingt heures à moins ch’quart, ch’est gramint astuchieux pour attirer ches téléchpectateurs. D’autint qu’is ont vraimint tout compris chi j’te dis que cha finit pile-poil pour qu’te puiches zapper su l’tros, après. Com’ cha, cha n’est pus ches actualités ou pus bielle la vie, mais ch’est ches actualités et pus bielle la vie ! Fromache et dessert, cha, ch’est eune révoluchion ! Alle est vraimint pus bielle la vie…