Chalut mes gins ! Alors ? Ch’ouiquen d’Brad’rie i ch’est bin paché ? Mi, j’ai ches pids, j’te raconte pon ! Hier soir, in aurot pu faire cuir’te d’el viante à kebab chi in l’avot misse à tourner d’vint ! Par conte, je n’sais pon quo qu’t’in pinses mais, même chi l’mairie alle annonche quarinte pour chint d’vindeux in pus, j’ai frinch’mint l’impréchion qu’i n’y a pon eu tint d’monte qu’ches autes années. P’t-ête un effet virus. Parel, tous ches ins, i y a l’gadget incontournape d’el Brad’rie. Ch’t’année, j’n’ai pon réuchi à vir quo qu’ch’étot. Même chi, d’timps in timps, te croisos des gins aveuc un machque, alors qu’in n’annonchot pon d’bal machqué !

A’ch’t’heure, j’auros querre à rev’nir su un évén’mint importint d’euch ouiquen. Du moins, quind j’ai ravisé ches infos, cha m’a fait un choc. I f’sot partie d’ches gins qu’in a toudis connus. Ches gins qu’in a l’impréchion qu’is sont immortels. Pourtint, hier, i a fait ch’dernière blaque à l’âche d’quate-vingt-tros ins, et alle est gramint mauviaisse. Li qui disot qu’i étot foutu d’ête in artard l’jour d’euch mort… Ouais, mes gins, Sim i est mort. Alors, bin intindu, in a querre ou in n’a pon querre à li, mais i n’laich’te perchonne indifférint. Auchi loin que j’em chouvienne, dès que j’aperchevos ch’bouille, à l’tévé, j’étos d’jà in train d’rigoler, avint même qu’i ait comminché à parler. Sin physique, somme toute banal, voire ingrat, i in avot fait ch’forche. Sin visache étot expréchif à ch’point qu’i n’avot pon b’soin d’parler pour faire rir’te.

Simon Jacques Eugène Berryer, fils d’ingénieur né ch’21 juillet 1926, pach’te sin infinche in Bretagne et débute ch’vie proféchionnelle à Paris, in 1946, com’ opérateur d’cinéma. Ch’est in 1953 qu’i comminche à faire du chpectaque dins ches cabarets parisiens. In 1958, i a un premier rôle dins l’film d’Georges Péclet : Ches gaîtés d’l’escadrille. Dins l’début d’ches années soichinte, i fait partie d’l’équipe d’Jean Nohain qui anim’te ches émichions pour l’jonnesse. Ch’étot l’jeudi après-midi à ch’t’époque. Ch’est in 1970 qu’i a un rôle pus importint dins un film d’Michel Audiard, dont ch’tite i est tout un programme à li tout seu : Alle n’bot pon, alle n’fum’te pon, alle n’draqu’te pon mais… alle cause ! Dins l’quel i donn’te ch’réplique à Annie Girardot, qui a ch’rôle princhipal. Ch’est auchi li qui cante l’générique d’euch film : La Libellule, qui d’vient un churnom, tint i paraissot fragile…

Dins ches années soichinte-diche, i fait d’nombreux sketchs dins ches émichions à Guy Lux. Chouvint déguisé, i n’est pon rar’te qu’i apparaiche in femme. J’ai auchi l’chouv’nir d’el première fos d’ù que j’voyos un sketch d’ù qu’el comique i f’sot deusse personnaches in même timps. Grâche à un costume et un maquillache divisés in deusse. D’un côté, homme. D’l’aute, femme. Pis, par un ju d’artourn’mint rapite, t’avos l’illusion d’un couple qui ch’donnot l’réplique ou cantot in duo. Ch’est in 1971 qu’i crée eune canchon qui allot marquer toute eune générachion : J’aime pon ches rhododendrons. Ch’est à l’télévision belge qu’i crée pour l’première fos sin personnache ch’pus célèbe : L’Baronne d’el Tronche-en-Biais !

Télévision, cinéma, théâte, canchon, écriture, Sim i est un véritape touche-à-tout dont chaque apparichion ch’armarque. Aveuc li, ches zygomatiques alles n’on’tent pon gramint d’répit. Tout i est bion pour faire rigoler et arbondir aveuc eune parodie, mais toudis chins l’moindre vulgarité ! Ch’est ainchi, qu’in 1978, i n’hésite pon à indosser eune robe et donner l’réplique à Patrick Topaloff pour ête, l’timps d’eune canchon, eune verchion françaisse d’Olivia Newton-John dont tertous i che chouvient cor’ d’euch tite : D’ù qu’alle est ma qu’mise grisse ? Deusse ins après, ch’est chous ches traits d’un rocker su l’artour qu’i apparôt pour faire eune parodie d’Johnny, aveuc un Quo ma gueule ? Ch’étot auchi cha, Sim. I savot rir’te d’li-même et faire d’l’autodérision pour amuser ches gins. I étot perchuadé, com’ mi, d’ailleurs, que l’humour est eune bionne thérapie conte tous ches tiots problèmes d’tous ches jours et un excellint chupport pour faire pacher des messaches...

Adieu Sim ! In a perdu l’pus grosse d’ches Grosses Tiêtes qu’el France alle n’ait jamais eues. Tin Agecanonix, in n’ch’in étot pon aperchu, tint t’avos toudis l’eul et l’echprit vifs. Chins compter un savoir inégalé pour raconter des histoires. Aveuc ti, eune blaque Carambar alle prenot eune diminchion au-d’là d’tout intind’mint. Ch’qui est sûr’te ch’est que, quel que sot l’indrot d’ù t’es à ch’t’heure, is n’ont pon fini d’ête plié d’rir’te, ches gins aveuc ti !