Chalut mes gins ! Je n’sais pon chi te l’as armarqué, mais i y a gramint pus d’ados su ches trottoirs ch’matin. D’main, cha s’ra à ch’tour d’ches tiêtes blontes. D’ailleurs, cha m’a toudis fait rir’te qu’in dise ches tiêtes blontes. Chi te ravises bin, i n’y in a pon tint qu’cha ! Même après, quind in ravise chez ches adultes. I y a gramint d’bruns et gramint d’brunes. Pis, com’ alle l’a chi bin canté Lio, ches brunes alles n’comptent pon pour des prunes. Mes gins, i y in a eune qui a bin déchidé d’faire intinde ch’vox…

I n’y a pon d’doute pochipe, alle est bin rintrée d’vacinches et alle simbe pus in forme qu’jamais. Chertain’mint l’bion air d’el campagne poitou-charentaise et, churtout, ch’bion bol d’air d’La Rochelle. Te rajoutes à cha un relent d’euch Zénith aveuc eune bielle schène et un bieau pupitre. Chins oublier ches applaudich’mints d’eune foule in délire, i n’in fallot pon davintache ! Cha a agi su alle com’ chi alle avot avalé un tube d’vitamines C in intier ou eune caiche d’Redbull. Mes gins, finies ches actualités trichtes, chins vie, voichi l’artour de Ségolène, qui est d’jà su tous ches fronts ! Alors, j’me sus dit qu’alle méritot bin quéques lines ichi, pour faire l’point su tous ches points qu’alle a abordé. Tout cha in un ouiquen !

Un ouiquen vaqu’mint chargé. Infin, vaqu’mint, cha n’est pon vraimint l’miot puich’que, à peine avoir quitté La Rochelle, alle est allée à ch’concours nachional d’ches mulassiers, à Niort. Donc, i aurot fallu qu’j’écrive mul’mint, mais cha n’euch dit pon. Infin, bref ! Ch’est d’vint eune assimblée d’mules poitevines, mulets et autes baudets du Poitou qu’alle a déclaré qu’i étot timps, pour alle, d’sortir d’euch silinche. L’heure d’el grinte mèche alle a sonné pour faire printe conscienche, à ches Français, qu’i y a gramint d’cosses qui n’von’tent pon dins ch’politique à min Nicolas. Auchitôt, ches propos ont été très acclamés par des braimints d’un enthousiasme évidint. Je n’sais pon chi ch’étot subliminal mais d’vint des baudets, j’ai trouvé qu’i y avot quind même un messache muché. In pus, ches Français is ont gramint d’raisons d’braire auchi. Te vos toute l’importinche d’eune telle mise in schène ! Même min Dominique Besnehard i n’a pon réuchi à faire auchi bin quind i étot à sin cherviche…

Inchuite, toute ch’t’efferveschince autour d’alle, cha l’a chtimulée. Alle n’a pon hésité à dir’te qu’alle allot faire gramint d’tévés, d’radios et d’interviewes pour qu’sin messache i sot arlayé l’miux pochipe. Te sais, dins l’ginre : Mets-te cha dins t’crâne ! Ch’qui est sûr’te, ch’est qu’t’auras tout sin programme in Ségolènorama© stéréo, in relief et in 3D, aveuc tous ches chous-tites. In est prév’nu, in va d’voir ch’accrocher ! L’lind’main, Ségolène alle in a profité pour tirer ch’couvrante à alle ! D’jà, mes gins, in oublie ches sœurs jumelles. Y a d’el brouille dins ch’ménache, ch’est évidint. Nin ! Je n’vais pon jusqu’à dir’te qu’in a eu l’drot à un crêpache d’chignons in règle, puich’que Titine alle n’a pon cor’ répondu à ch’qu’alle a dit à Jean-Michel Aphatie : « Ch’est babache toudis ch’grind écart intre l’dich’cours et ches actes, cha fait des années qu’in fait applaudir ches militants su l’nin-cumul d’ches mindats, donc à un momint i va bin falloir pacher à ch’t’acte, chinon quelle est l’crédibilité d’el parole politique ? »

Te l’auras compris, i ch’agit bin d’euch cumul d’ches mindats à Titine, qui n’hésite pon à mette in pratique un viel adache qui dit : Fais quo que j’dis mais pon quo que j’fais ! Chins in faire l’invintaire : Maire d’Lille ; Présidinte d’el région Nord-Pas de Calais ; Ch’crétaire d’euch Parti sochialiste ; Maître d’conférinche in réunion Tupperware ; Drécheuse d’éléphants ; Experte agrée in culture d’ches rosses, aveuc eune chpécialité pour coper ches branques mortes ; Conseillère auprès d’ches restaurateurs lillois pour construire l’pus grinte pyramite d’coquilles d’moules à l’Brad’rie ; etc.. Ch’i y a des erreurs dins m’lichte, te m’diras quo, mes gins. Je n’sus pon dins l’secret des Diux ! Ségolène : 1, Titine : 0. Pis, d’ajouter, com’ chi in n’avot pon bin compris : « L’but d’euch dichcours à Titine étot d’faire applaudir ches militants aveuc des effets d’annonche, dins l’seu but d’arprinte l’main su un PS déchiré, et d’impulser sin propre tempo. » Ségolène : 2, Titine : 0 !

Excusse-me pour alle, Titine… Ah, bin, nin ! Ch’est vrai qu’cha n’est pon à mi d’faire des excusses. Infin, chi l’chpéchialiste d’ches excusses alle est alle-même l’princhipale protagoniste, i faudra quind même qu’i y ait quéqu’un qui ch’y coll’te ! Chi te veux l’plache, mes gins, te l’dis ! Mi, j’ai juss’ fait un bref intérim ! Tout n’est pon noir’te intre ches deusses brunes. In effet, i y a un sujet d’ù qu’alles sont d’accord. Chi, chi, ch’est pochipe ! Infin, quind j’dis qu’tout n’est pon noir’te, chi just’mint, puich’qu’i s’agit d’euch carbone ! Pus préchisémint, d’el taxe carbone. J’sus sûr’te qu’te sais d’quo qu’in parl’te. D’toute fachon, quind i s’agit d’eune taxe in pus, in est tertous au courant et très rapid’mint. J’dos dir’te, mes gins, que j’sus d’euch même avis…

Chi in t’met eune taxe d’pus su ch’t’essinche, alors qu’i n’y a d’jà prech’que qu’cha dins ch’prix d’un lite, cha n’est vraimint pon corrèque. Te n’as pon vraimint l’choix, com’ alle dit Ségolène. In carette électrique... Hé ! Te cros qu’in a gagné à ch’loto ? T’as vu, ti, ch’prix d’ches carettes électriques ? Pis, chi te veux travercher l’France, i t’in faut tros ou quate, in relais, com’ dins eune courche. A moins qu’t’aies gramint d’timps pour archarger ch’batt’rie chaque fos !

Quind j’disos qu’ches deusses alles étotent d’accord, j’cros qu’j’em sus laicher importer. In fait, chi in analyse bin, leu idée, cha n’est pon copie carbone. Loin ch’in faut ! Titine alle est d’accord aveuc eune fiscalité écologique et pon eune taxe. Tandis que Ségolène, qui alle treuve cha trop prématuré, alle est carrémint conte ! I faudrot que quéqu’un m’explique l’différinche intre eune fiscalité et eune taxe, mais cha n’est pon l’sujet. Bref, com’ alle a gramint pus insisté lad’chus, Dany le vert i a viré auchitôt à ch’rouche. Mais Ségolène alle n’a même pon eu peur ! Alle treuve même qu’alle f’rot eune très bionne cindidate écologique !

Mes gins, te l’auras compris, ch’est vraimint l’rintré, j’viens d’te l’prouver ! I n’rechte pus qu’à attinde pour savoir quo quelle va ête l’réac’chion d’Titine. A’ch’t’heure, ch’est vrai que, ch’te s’maine, alle a gramint d’trucs à faire. I faut qu’alle aille faire du tri dins sin grenier car, l’ouiquen prochain, ch’est l’Brad’rie d’Lille. Cha s’ra chertain’mint l’occasion d’brader de vielles idées. I y a chertain’mint cor’ des collectionneurs qu’cha intéréche. In attindra donc un peu pus longtimps. Mais ch’qui est sûr’te, mes gins, ch’est que cha vienn’te d’Titine, d’Ségolène, d’Dany, d’Nicolas ou autre, in va in vir d’toutes ches couleurs !





Chi te veux raviser sin dichcours d'vint ches baudets :
http://www.dailymotion.com/video/xabzy4_la-rentree-politique-de-segolene-ro_news