Chalut mes gins ! Bion, i est temps d’quitter tin frigo. Cha n’est pon eune soluchion de t’printe pour eune salate ou l’ress’ d’el veille, pour squatter l’seu indrot cor’ frais. Chi te veux un peu d’fraîqueur, j’pourros toudis t’parler d’trucs qui donn’tent frod dins ch’dios, ch’est sûr’te. Mais in n’est pon ichi pour ch’printe l’tiête. In n’est plutôt lal pour printe du bion timps par tous ches timps !

Quo qu’ches timps is dis’tent ? Bah, qu’in comminche à ravoir des mouv’mints chez ches politiques ! Ch’qui chous-intind qu’in richqu’te d’avoir eune rintrée torride. Après un tiot cop d’canicule, in aura d’l’intraîn’mint. Même chi cha ne s’ra pon d’el même manière qu’in aura pus caud. Fièfre… Nin, ch’est pour rir’te ! A’ch’t’heure, quind j’te parl’te d’mouv’mints, i n’y a rin d’bin excepchionnel. Quoque… In peut che d’minder, après eune équachion impossipe à résoudre in cas d’pandémie, quo qu’ch’est qu’min Luc Chatel, ch’ministre d’l’éducachion, i f’sot dins ches rayons d’Intermarché. Ch’i in a attrapé mau à sin crâne, ch’est nin lal qu’i va treuver d’l’aspirine…

Qu’est-che que j’peux ête biête par momints ! J’ai oublié qu’min Luc i étot parti faire ches commichions pour l’rintrée. Après tout, ch’est normal. Chi in ferm’te ches écoles, i faudra bin caser ches élèfes in bionne sinté, un peu partout. In a vu insimpe, l’dernière fos, qu’i y a quind même un richqu’te d’les laicher d’vint l’tévé, tout seu à l’baraque. Li, i a gramint d’plache dins sin ministère. Pis, com’ ch’est l’patron d’tous ches inseignants, i faudra bin qu’i monte ch’t’eximpe ! I dot préparer sin stock d’fournitures dins ch’cas d’ù qu’sin bureau i ch’trinsform’rot in clache. Infin, ch’est vit’ dit. A m’mote, i avot gramint pus l’air d’un démonstrateur : «  Ravise, mes gins, com’ i est bieau ch’cartape. In pus, ch’est eune bionne affaire, i n’a même pon augminté d’pis l’année dernière ! » Par ches timps qui cour’tent, ch’est sûr’te. Quind cha n’augminte pon, t’as l’impréchion de faire eune bionne affaire.

Alors, ch’est nin dur’te d’attirer l’attinchion d’eune cliente qui pachot par-lal, par ch’pus grind d’ches hasards ! Commint ? Te n’es pon convaincu qu’alle étot lal accidintell’mint ! Ah ! Ch’est pach’que, ti auchi, te sais qu’alle est conseillère municipale UMP. Cha n’l’impêque null’mint d’pouvoir faire ches courses dins un Intermaché à Villeneuve-le-Roi, dins l’neuf-quate. Ch’est quind même troublint, à’ch’t’heure qu’in y réfléchit insimpe… J’te l’accorde ! Just’mint à ch’momint précis d’ù qu’min Luc i étot dins ch’rayon des cra’ions et des cartapes. Alors qu’alle aurot pus ête dins ch’ti d’ches fruits et légumes, même chi alle étot dins l’boutique in même timps. Mes gins, in n’a p’t-ête pon tort d’in déduire qu’ch’est eune misse in schène !

Te sais, i n’y a pon gramint d’différinches intre un démonstrateur et un magichien. Quind te les vos faire leu tour, cha march’te toudis à ch’quart d’poil. Quind te veux l’arfaire à t’baraque, ch’est eune aute paire d’manques ! In pus, com’ ch’magichien qui a un compliche dins l’salle, i n’est pon rar’te que ch’démonstrateur i ait d’vint li, dins l’foule qui a ches zis écarquillés par sin produit révoluchionnaire, quéqu’un qui va dir’te : « Vingt Dius ! J’in ai d’jà acaté un. Cha march’te vaqu’mint bin, i m’in faut un deussième ! » Te peux n’ête sûr’te qu’el vinte alle est dins l’poque ! Ichi, parel. Eune gintille cliente alle confirm’te que cha coûte moins quer ch’t’année, qu’l’année dernière. Convaincu ?

Bref, in vient d’démontrer, eune fos d’pus, qu’el barrière intre un politique et un acteur alle est gramint minche. I n’y a qu’à raviser d’euch pus à gauche à ch’pus à drote, pour savoir qu’in t’jue l’comédie dins ches grintes largeurs. Pis com’ ches écrans is sont larges à’ch’t’heure, is n’hésitent pon à t’in faire chint pour chint même chi te n’as qu’16/9éme !

J’voudros arv’nir su sin côté démonstrateur. Démonstrateur, ouais, mais in quo ? Quand i étot s’crétaire d’Etat chargé d’l’induchtrie et d’el consommachion, i avot d’jà t’nu ch’même dichcours à propos d’ches prix qui étotent plutôt in baiche. Pour être précisse, ch’étot l’19 février de ch’t’année (cf. sin chite). In pourrot donc pinser qu’i est démonstrateur in vie pon quère ! Attinds un peu, cha d’vient gramint pus drôl’te, mes gins. D’ù qu’ch’est qu’i a fait sin bieau dichcours in février ? Ouais, ch’est auchi dins un Intermarché ! Ch’ti d’Gif sur Yvette dins l’neuf-un. Nin, ch’est pon porno, babache ! J’n’ai pon parlé d’Gil sur Yvette… Te n’pinses vraimint qu’à ch’cul alors qu’je t’parl’te d’Luc ! Cadeau, mes gins, je n’pouvos pon pacher à côté d’euch miot anacyclique !

J’arviens à ches Intermaché. Chins che « s », ch’est un nom propre. In n’écrit pon ches Martins, même chi in sait qu’i y in a gramint. I est timps d’réviser ches cours. Ch’est long deusse mos, voire pus p’t-ête. Pis, in va d’voir tertous mette l’main à l’pâte. Bref, ch’est troublint. Te t’rinds compte, ti ! J’savos d’jà qu’i fallot prech’que Bac pus deusse pour ête à l’caiche, mais je n’savos pon qu’i fallot ête au moins s’crétaire d’Etat pour ête démonstrateur dins un Intermarché ! Ch’étot d’vint ch’rayon bouch’rie. A’ch’t’heure, ch’est d’vint ch’ti d’ches cra’ions. In peut in ête sûr’te, cha ch’f’ra dins ch’ti d’ches cédés (à l’françaisse) ch’i d’vient ministre d’el culture. Pis, n’rêv’te pon ! In n’est pon prêt d’el vir dins ch’rayon d’ches tiotes culottes, i n’y a pon d’ministère qui correchpond ! Par conte, d’vint ch’ti d’euch PQ, cha s’ra possipe. Quind i s’ra armerchié et qu’i n’aura pus qu’ches zis pour braire, puich’que ch’est ch’même rayon qu’ches mouchoirs in papier.

In peut quind même ch’poser l’quechtion d’savoir pourquo ch’est toudis dins un Intermarché ? In sait qu’i n’est pon à ch’Carrefour d’euch carrière. Que sin bureau i n’est pon Auchan, mais à l’ville. Qui n’est pon Maubeuche, Leclerc de lune, te l’auras d’viné ! Ch’est p’t-ête un grind ami d’el direc’chion, va savoir ! In tout cas, in a l’impréchion que ch’ministre i est sponsorisé par ch’te chaîne d’magasins. L’pub alle invahit tout d’eune manière insidieusse. Ouais, j’sais. Ch’est pon nouvieau. L’météo, ch’est Darty qui vind auchi bin des vintilos qu’des radiateurs d’appoint. Ainchi, is sont sûr’tes de n’pon ch’gourer. Ch’Présidint i est l’vitrine d’ches boutiques d’ches Camps-Elysées à li tout seu. Ségo, cheule d’euch Comptoir d’Afrique, aveuc ches boubous, ches djellabas. Quind cha n’est pon pour Jean-Louis David aveuc ches boucles à ch’Zénith. Roselyne aveuc ches Crocs, etc.. Même mi, aveuc toutes ches marques que j’viens d’chiter !

J’vais m’arrêter lal, pach’qu’in va cor’ m’dir’te que j’fais trop long, mais j’ai eune dernière explicachion et j’auros querre à t’la faire partager. Pour min Luc, ch’est un rêfe d’gamin ! I y a des tiotes files qui veul’tent ête Sissi, des tiots garchons Zorro. Li, i a toudis rêvé d’ête mousquetaire ! Après Athos, Porthos, Aramis et D’Artagnan, voichi Luc, l’chinquième ! Qui pus est, un mousquetaire d’el distribuchion ! Après l’pub d’ù qu’Jean i collot ches prix su les imballaches pour n’pon qu’is ch’invol’tent. Luc i l’a rimplaché et i fait miux, i les fait dégringoler !