Chalut mes gins ! J’vais même ajouter chalut à ceusses qui sont rintrés ! Ch’est eune s’maine d’ù qu’ches vasses communicants is von’tent ch’invercher. L’France alle va ch’réveiller tout duch’mint et sortir d’eune éténachion. Ouais, ch’est nouvieau, cha vient d’sortir et ch’est typiqu’mint français ! Ch’est eune hibernachion mais in plein été ! Quo qu’ch’est qu’te cros, mi, auchi, j’invinte des miots ! Churtout quind ches miots is d’vienn’tent indichpinsapes, étant donné qu’même ches actualités alles ont subi ch’t’état d’fait. A part quéques mauviaisses nouvielles qui n’peuv’tent pon attindre. Ch’est normal, récauffées, cha n’a pon l’même intérêt. Alles doiv’tent ête chervies fraîques, cor’ bin croustillantes ! Chinon, pour tout l’ress, i s’ra bin timps d’in parler à l’rintrée…

Just’mint, chins vouloir t’saper ch’moral, in va in parler de ch’rintrée. Alle arrif’ à grand pas et in ch’prépar’te à accueillir ches gamins dins ches écoles. Infin, pon tout à fait, puich’qu’in ardoute auchi qu’ch’te grippe A alle ch’invite chins qu’in li d’minde. Te sais, ch’est sournois ch’grippe. Pindint toutes ches vacinches, alle f’sot juss’ un tour d’essai pour ch’écauffer. Un tiot coucou à drote et à gauche, histoire qu’in n’oublie pon qu’alle est lal. Pis, com’ alle savot qu’eune grinte partie d’ches journalistes is étotent in vacinches, alle avot d’viné qu’in n’allot pon parler d’alle d’trop et qu’cha pach’rot prech’que inaperchu. Alors, eune quechtion que j’em sus posée, ch’est commint qu’alle peut faire pour ch’propager à l’rintrée plutôt qu’avint. Ch’est vrai, quo ? Ch’est eune grippe qui vient d’euch cochon. J’ne savos pon qu’ches virus is étotent malins com’ ch’is étotent v’nus d’ches sinches. Infin, i faut croir’te qu’chi . Is ont p’t-ête fait un pari intre eusses, pour immerder ches hommes. Pis, te sais ch’qu’in dit : Cochon qui ch’in dédit…

Cha n’répondot pon à m’quechtion. Auchi, j’em sus misse à l’plache d’ches virus pour avoir l’meilleu tactique d’attaque. V’là, quo qu’j’auros fait mi. J’auros pris un tarif d’groupe pour qu’cha coûte l’moins quer possipe. Ch’est l’crisse, même pour ches virus. J’em s’ros rindu su ches plaches dins ch’Sud. Ch’est pratique, ch’est lal d’ù qu’i y a l’pus fort taux d’populachion pindint l’été. Inchuite, j’auros chosi d’em mette dins ches bagaches, à ch’mitan d’ches chouv’nirs qu’in ramèn’te tertous. Com’ cha, j’auros eu l’voyache gratis pour tous ches coins d’France. A’ch’t’heure, i n’rechtot pus qu’à attindre ch’grind déballache. Com’ j’sus vraimint un virus intelligint, doté d’une grinte stratégie, à croir’te qu’in m’a fabriqué, d’ailleurs, j’em s’ros à nouvieau posé l’quechtion pour savoir commint j’allos continuer m’progréchion. Fachile ! Eune pyramite à l’invers. D’ù qu’j’ai pus d’chince d’continuer m’progréchion ? Ch’est in m’mettant d’ches bagaches à ches cartapes !

Fort d’eune pandémie latente, qui va chertain’mint ch’dérouler chelon min scénario catastrophe, ch’ministre d’l’éducachion i a travaillé dur’te. Chi, chi, ch’est possipe ! Bah, li, i a été d’corvée. Ches vacinches, cha s’ra pour pus tard ! Parel pour ch’te braf’ Roselyne Bachelot qui a artrouché ches manques. Alle qui avot acaté eune nouvielle paire d’Crocs rosses pour aller à l’pache… Alle pourra toudis les utiliser quind alle mettra ch’t’nue d’infirmière, pour prêter main forte in cas d’urginche ! Eune équachion mathématique a été art’nue :  Tros cas avérés dins eune clache durant eune s’maine, fermeture d’el clache. Voire pus chi affinité. In effet, in pourra déchider d’fermer plusieurs claches, voire l’école, voire même un quartier complet, etc.. Cha, in sait bin que, même chi ches virus is préfèr’tent ch’cours d’biologie, is s’ront p’t-ête tintés d’aller printe eune l’chon d’histoire : Nos ancêtres d’el grippe echpagnols, par eximpe…

Bref, te vos toute l’puissinche d’ches mathématiques : Eune équachion, plein d’inconnus et… pon d’résultat. In improvisse à ch’cas par cas ! Ches virus is ju’tent aveuc tes nerfs. Inchuite, in pach’te l’clache et ches autes à ch’Karcher pour décontaminer. Au biout d’chix jours, ch’i n’y a pon d’nouvieaux cas, in réoufre. Pindint ch’timps-lal, ches gamins is s’ront privés d’école. Ch’est à dir’te, qu’is s’ront obligés d’rechter à l’mason. Pour l’plupart, te parl’tes, ti, d’eune punichion. Sauf que, pour qu’is continu’tent à étudier, puich’qu’in n’sait pon combien d’timps is s’ront chez eusses, in fin d’compte, in va prévoir des cours par vidéo, su des chaînes d’tévés publiques. Seul’mint, ch’qu’i n’a pon prévu, min ministre, ch’est commint qu’in va faire ?

Un, chi ches parints is sont à ch’traval, is von’tent d’voir ch’garder tout seu. Pis, ch’est parel. L’choir, ches parints is s’ront bin obliger d’rintrer . L’lind’main, arpartir à ch’traval. Te cros, ti, que ch’virus i va ch’dir’te : Nin, ch’est un parint qui boss’te, j’vais l’laicher in paix ! Deusse, commint qu’in fait pour qu’el gamin seu i ravise bin ches chaînes d’cours ?  J’sais qu’su l’plupart d’ches nouvielles télés, t’as un code parintal qui permet d’impêquer d’raviser eune chaîne chins ch’ti-chi, mais tertous i n’l’a pon ! Même chi t’alleumes ch’tévé su l’chaîne d’cours, avint d’partir à ch’traval, et qu’te muches l’zappette, cha n’va pon chervir à grind cosse. Te peux toudis chinger ches chaîne par ches boutons su tin poste. A m’mote, ch’est bin ch’qui richqu’te d’arriver et cha promet d’ête des cours assez particuliers…

Tout d’abord, in trouv’rot : Qui veut gagner des bions points ! Forchémint, cha s’rot présinté par l’père Fouras d’euch ju. Ch’ti qui connôt toutes ches réponches, puich’qu’alles sont inscrites su l’écran d’vint li, j’ai nommé min Jean-Pierre Foucault. In n’ching’te pon eune équipe à li tout seu qui gagn’te ! Pis, t’armarqu’ras qu’cha comminch’te par l’même syllabe ! L’quechtion palier, cha s’rot pour eune grinte imache ; ch’est à dir’te après avoir gagné diche bions points. Pis, chi te continues à gagner des imaches, te peux atteinte l’sommet d’el pyramite, l’quechtion qui va t’faire gagner un stage in intreprisse. I n’est jamais trop tard pour goûter à ches joies du traval. In sait tertous que ch’t’apprintissache i est primordial. Pis, goûter, cha s’ra l’cas, puich’que cha consist’ra à raviser l’fabricachion d’ches imburguères chez McDo et à vérifier l’qualité in in goûtant à ch’t’hasard. Pam, lam, pam, pam pam…

Ch’est l’jingle qui dit qu’i vient d’y avoir un gagnant. A’ch’t’heure, in peut passer à ch’cours d’biologie. I est pratiqué par Gil Grissom in perchonne, alias Gégé, qui vient parler, à’ch’t’heure, d’ches larves d’coléoptères. Qui miux qu’li pour in parler, puich’que ch’est l’un des experts ! Pour illustrer sin cours, i n’hésite pon à présinter un spécimen rar’te. Eune biête à z’ailes qui a baptisé Elie. Nin pon pach’qu’i est fan d’Elie Seymoun, mais pach’que ch’biête alle vol’te in f’sant du churplache. Cha li a fait pinser à Elie-coptère… D’ailleurs, i n’hésite pon à présinter égal’mint l’pus grind spécimen d’el race. Bin intindu, te l’auras d’viné, mes gins, puich’que te suis ches cours auchi, Supercoptère ! Ch’est vrai qu’i a l’air un peu déjanté min Gégé, mais ch’est pach’qu’i arvient d’euch cours d’botanique aveuc Greg Sanders, qui essayot d’artreuver des impreintes su d’el Marie Jeanne.

In fait un rapite passache par l’cours d’anatomie. Te peux découvrir absolumint tout ch’qu’i faut savoir su l’corps d’ches femmes et d’ches hommes, chi te n’arrivos pon cor’ à faire l’différinche. J’sais qu’i y a d’jà eu Pierre Perret, mais cha ne f’sot pus assez d’Audimat. Alors, in a treuvé un aute professeur : L’professeur Benji. I est ch’qu’in appell’te un professeur polyvalent. Nin seul’mint i assur’te l’anatomie, mais auchi des cours su l’vie animalière. Ch’est ainchi qu’te peux les découvrir autour d’un point d’ieau qu’in appell’te ches douches. Mais auchi ch’arposer dins leu tanière qu’in appell’te dortoir. Ch’est d’ailleurs pour cha qu’cha ch’appell’te Secret Story, in vos qui suiv’tent. Ches histoires secrètes d’el vie animalière et i n’y in a pon trite millions pour ch’in faire des amis. Chi Kiss Cool  i a deusse effets, professeur Benji, li, in a tros. I t’propose in pus, un cours d’bions miots d’el lingue françaisse. Des miots hauts in couleur qui fon’tent qu’in a un vocabulaire extrêm’mint riche et fleuri !

Just’mint, même chi ch’professeur Benji i impiète un peu su ches cours d’français, in in n’a pon moins oublié ches fondamintaux. Pour ches maths et ches cours d’français tradichionnels, in a fait appel à eune équipe d’choc : Laurent Romejko et Bertrand, puich’qu’i est futé com’ un arnard ! Cha n’impêque pon qu’pour rinte ches maths pus intéressantes, d’autint qu’i n’y a pon que ch’calcul mintal, in a fait appel à Charlie Eppes. Li, i est gramint miux plaché pour t’apprinte tout su ches Numb3rs ! D’ailleurs, j’cros même qu’i n’y a aucun prof d’maths com’ li, qui est capape d’expliquer ch’théorème d’Pythagore, chins qu’in pinse à raviser par l’feniêtre. Ou même, eune suite d’Cauchy, chins qu’in pinse à eune champe d’hôtel. Pis, chi in veut rechter français cor’ un cop, après Cauchy, i peut parler d’euch théorème d’Bernoulli, chins qu’te pinses eune seu s’conde, mes gins, que Marie Toutoule alle vient d’faire un bug et écrir’te n’importé quo ! Te n’as qu’à chuivre ches cours, chi te n’sais pon qui est Bernoulli et, churtout, sin théorème. J’vais t’donner un tuyau : Ch’est l’bilan hydraulique d’un fluide dins eune conduite ! Te vos, j’sus généreusse. J’te promets un tuyau et j’te donn’te eune carrémint eune conduite !

A’ch’t’heure, mes gins, j’sus sûr’te que te vas relativiser ch’te pandémie. D’toutes fachons, i y a des précauchions à rechpecter. Ches Chuisses is les rappell’tent. J’les ai misses ind’chous, ça march’te auchi in France ! Inchuite, in a vu qu’ches gamins is n’allotent pon rechter pachifs d’vint ches tévés in cas d’fermeture d’écoles. Donc, i faut relativiser l’fait qu’is soient seu à l’baraque. Eune bionne soluchion, ch’est d’armette tertous en vacinches. Apparemmint, ch’virus i est moins virulint. I rechte, toutefos, eune quechtion qu’in n’a pon abordé, mais qui va ch’poser rapid’mint : Quo qu’in va n’in faire d’tous ches instits et ches profs qui n’aurontent pon d’élèves ? Les obliger à poser ches jours in journées d’grève pour les années à v’nir ? Ch’est eune idée, mais l’quechtion, alle, alle reste intière…