Chalut mes gins ! J’espèr’te que cha continue à rouler pour ti, même chi t’es coinché à ch’bureau. T’inquiète pon, te n’es quind même pon l’seu à travailler à ch’mois d’août ! Forchémint, chi t’es in vacinches, cha dot aller fin bénache. Ch’est pon trop dur’te ch’bronzette au bord d’ches plaches, ches dogts d’pid in évintal ? Pis, est-che qu’te les trimpes dins ch’t’ieau au moins ? Ouais, j’sais bin qu’pour chertains, l’ieau cha sert dins un tiot jaune, mais i n’faut pon pinser qu’à ch’t’heure d’l’apéro. L’ieau, te t’laves aveuc. Te naches d’dins ou te fais simblint…

Bah, j’cros bin qu’te l’auras d’viné, mes gins ! In va parler d’ieau à’ch’t’heure. In va faire eune bionne trimpette. I parôt qu’cha délache… Pourtint, chi j’in cros tout quo qui ch’pach’te d’pis quéque timps, ch’est auchi eune source d’bizarreries. In n’va pon arv’nir trop loin in arrière et artracher les frasques d’euch pichon national, Laure Manaudou. Alle a trimpé ches pids dins tous ches bassins d’France et d’ailleurs avint d’treuver eune ieau à sin goût. D’ailleurs, alle n’a pon treuvé qu’l’ieau à sin goût, puich’qu’alle a auchi chingé d’copain. Adiu biel Italien ; bonjour, l’made in France ! Bref, in va les laicher in paix. D’toute fachon, chi leu idylle alle prind l’ieau, in l’saura vit’ et cha f’ra couler gramint d’incre !

A’ch’t’heure, je n’vais pon nin pus parler de ch’t’intraîneur. Te sais, une sorte d’Rambo, verchion décolorée. Toudis prêt à cacher l’guiffe à ch’premier qui s’interpose. Ch’i n’in rechte qu’un à l’flotte, cha n’s’ra pon li, mais ch’ti qu’i intraîne ! J’veux bin intindu parler d’min Philippe Lucas. Ch’ti qui dit d’li-même qu’à vingt ins, i étot un nageur très moyen. Eune vraie tringle. A m’mote, ch’est chertain’mint l’conchept d’el tringle à rideau qui li a donné l’invie d’tindre eune perche ! J’auros, quind même, bin voulu li pacher un messache, chi te m’le permets, mes gins. Juss’ un tiot aparté. Merchi ! Pach’qu’i y a un truc qui m’chiffonn’te : Min Philippe, te t’es treuvé un nouvieau job dins l’pub. T’auros chertain’mint été bion pour promouvoir eune marque d’pischine connue, que tertous i peut mette dins sin gardin. Seul’mint, t’as chosi d’faire d’el pub pour l’électrichité. Alors, fais attinchion à ti, min Philippe. L’ieau et l’électrichité, cha n’fait pon bion ménache ! Chi te t’prinds un cop d’jus, même ch’i t’coûte diche pour chint moins quer qu’à EDF, te s’ras mort à chint pour chint d’el même manière !

Inchuite, je n’peux pon pacher à côté d’euch feulleton qui ch’pach’te dins ch’t’univers d’el mote aquatique. D’autint que ch’principal mannequin i y jue un rôle importint ! In va commincher par li. Ch’ti qui a, just’mint, ch’rôle vedette. Pis quind te sais à quelle vitèche i nache, te comprinds toud’chuite que ch’miot vedette i revêt eune importinche toute particulière. Pour n’pon dir’te hors-bord, miot qui li va auchi com’ un gant in polyuréthane, puich’qu’i est pus souvint dins l’flotte que su ches bords d’el pischine ! Bref, j’veux parler d’Alain Bernard ! Chi te n’vos pon qui, te t’imagines un panneau attinchion et te l’artournes. T’as d’jà chertain’mint intindu parler d’euch triangle des Bermudes ? Bin, li, quind i ch’promèn’te dins ch’rue, ch’est ch’triangle su bermuda. Nin seul’mint i a fait gramint parler d’li pach’qu’i nache pus vit’ que ti, te déchinds ches pintes d’bière. Mais i a fait auchi parler d’li à causse d’euch combinaison in polyuréthane.

In in vient donc à ch’te mote aquatique aveuc l’fameusse X-Glide d’chez Arena. Te sais, ch’est com’ chi in ch’mettot eune capote géante, mais ch’est pus du caoutchouc qu’du latex. A’ch’t’heure, je n’sus pon chimiste, mais j’peux t’dir’te qu’cha n’a rin à vir aveuc ch’caoutchouc qu’t’as à ches roues de t’carette. Pour ches pneus, ch’est Speedy. Tindis qu’ichi, cha s’rot pus Speedy Gonzales d’ches flots ! Che polyuréthane i est à ch’nageur ch’qu’el pet i est à l’toile cirée : Un courant d’air, tell’mint cha permet d’aller vit’ ! D’ailleurs, min Alain i n’ch’y est pon trompé. Speedy gonzales criot ariba riba. Li, i crie Arena rena !

L’annonche qu’in n’homologuot pon ch’te combinaison a fait l’effet d’un pavé dins ch’mare. Infin, plutôt un pavé dins ch’pischine ! Min Alain Bernard i a failli printe ch’bouillon et ches arcords s’rotent qués à l’ieau. Un comble ! Quo qu’i li rechtot à faire ? Prouver qu’i étot toudis rapite, même chins ch’combi. Tel Speedy Gonzales chins Bip Bip ch’coyote qui li courot après ! Du cop, cha f’sot taire ches mauviaisses lingues. A moins, qu’à’ch’t’heure, alles li treuv’tent eune propulchion arrière pour expliquer ch’vitèche… D’même, pour Arena, l’Fina alle vient d’faire marche arrière. Bah, is n’voulotent pon d’eune combinaison chint pour chint polyuréthane. Qu’à ch’la n’tienne ! In ajoute deusse bindes d’tissu et l’tour i est jué ! Te vos, ch’est parel à des trucs que t’acates d’ù qu’ch’est marqué made in France, alors qu’i n’y a que d’étiquette qui est ajoutée in France. Cha n’ching’te pon grind cosse, mais cha ching’te tout ! In attindant, aveuc ches deusse bindes d’tissu, in a sorti l’nouvielle collec’chion d’el mote aquatique…

In continue, à’ch’t’heure, aveuc un cas très réchint, mais pus délicat. Je n’sais pon chi in peut clacher cha dins l’mote aquatique. Toudis i est qu’i y a un rapport vraimint, vraimint, mais alors vraimint subtil. Te s’ras seu juge. Mi, je n’em mouille pon ! Eune bielle jeune file, Carole, trinte-chinq ins, alle ch’est vue arfuser l’accès d’eune pischine. Pourquo ? Elle a voulu printe sin bain aveuc un burkini. Quo qu’ch’est que ch’t’affaire ? Le Burkini ou Burqini, ch’est l’miot pour parler d’el t’nue d’bain d’ches musulmanes, in référinche à l’Burqa. Ah, j’avos oublié d’dir’te que Carole alle ch’étot convertie à l’Islam d’pis quéques années.

I faut que j’te dise à quo cha arsimpe un burkini. Te t’imagines un pyjama noir’te composé d’un pintalon qui déchind vraimint jusqu’à ches pids. Inchuite, un t-shirt raz ch’cou aveuc des manches longues. Pour parfaire l’tout, su l’tiête, eune cagoule ! Pour t’faire un résumé, ch’est l’inverche d’un bikini. Un bikini, i y a gramint pus d’fichelle que d’churfache d’tissu. Un burkini, i n’y a carrémint pus d’fichelle, mais alors, qu’est-che qu’i y a com’ tissu ! Ches critères d’el mote aquatique ching’tent cor’ du cop.

Zut ! In est obligé d’chinger ches paroles d’el canchon auchi. Cha pourrot donner : « Dins eune pischine i y avot eune bielle file qui avot peur d’aller printe sin bain. Alle craignot d’quitter cha cabine. Alle trimblot de montrer à ch’voisin. Un, deusse, tros, alle trimblot de montrer quo ? Sin maxi itsi bitsi teenie weenie tout maxi maxi burkini, qu’alle mettot pour ch’te première fos. Un itsi bitsi teenie weenie tout maxi maxi burkini. Un burkini noir’te d’ches pids à la tiête… » L’rechte, j’te laiche l’invinter…

In arvient à ch’te pischine d’Emerainville dins l’chept-chept com’ is dis’tent. Bah, j’te rassur’te, mes gins ! Ch’est pon pach’que ches responsapes d’el pischine is croyotent à un braquache qu’is li ont interdit d’accès, quind is l’ont vue arriver. Ni, d’ailleurs, pach’qu’is ont cru à eune nouvielle verchion d’Fantomas. Nin ! Eusses, is déclar’tent que ch’est juste pour eune quechtion d’hygiène… Bah, ouais ! In peut rapp’ler à tertous que dins pratiqu’mint toutes ches pischines, même ches hommes is n’ont pon l’drot à un short d’bain ! Alors eune t’nue intégrale, te pinses bin…Forchémint, alle, alle porte plainte pour acte raciste.

Tout compte fait, in vient d’apprinte qué cosse. Du moins, ch’est des déduc’chions que j’viens d’faire. Chi te veux printe un bain tout habillé dins eune pischine, i vaut miux avoir du polyuréthane que du tissu. Au moins, in t’prindra pour un nageur d’haut niveau. Chi te tiens vraimint à nager aveuc tin burkini, i t’rechte quind même des possibilités. Un, ch’mer d’ù qu’tertous i fait ch’qu’i veut d’dins. Même des trucs qu’i ne d’vrot pon faire d’ailleurs ! Deusse, te treuves eune école d’plongée. Vu qu’is sont tertous d’jà tout en noir’te, in général, te d’vros pacher gramint pus inaperchu parmi ches nageurs !

Mes gins, j’croyos qu’un tiot bain cha allot faire du bin à ti et à mi. J’comminche à in douter. A m’mote, i dot y avoir qué cosse dins l’ieau d’pis quéque timps. A moins qu’cha sot dû à ches fouffes. Dins ch’cas, tertous à poil com’ cha, pus d’problème ! Toudis i est, qu’au lieu d’te détindre, cha a l’air d’créer gramint d’tenchion. J’espèr’te que ch’est pon l’faute d’min Philippe et d’sin électrichité !