Episote 1 : M’prière à Michael

Chalut mes gins ! Quo d’neuf dins t’vie ? J’espèr’te qu’intre deusse cops d’solel, te pinses à sortir aveuc tin pébroque ! Pach’que, quind cha drache, cha n’est pon pou rir’te. A Los Angeles i a draché dur’te, mais cha n’est pon parel. Ch’étot tous ches fans qui brayotent à ch’cérémonie in hommache à Michael Jackson. Mardi, j’étos com’ eune grinte partie d’euch monte. Eune boîte d’mouchoirs d’eune main et d’l’aute, un tiot verre d’liqueur d’Ecosse pou m’armonter ch’moral. J’ai même fait eune tiote prière…

Reposse in paix, MJ. Quoqu’in che d’minde bin qu’d’ù ? J’n’avos jamais vu un cerceul auchi baladeur que ch’ti lal ! Chi t’avos été un acteur comique à succès, j’auros chertain’mint treuvé qu’tin dernier gag i est vraimint réuchi. Quoqu’in puiche auchi vir eune chuite à ch’clip Thriller, d’ù t’avos quind même ch’rôle princhipal. L’seu différinche, ch’est qu’ichi, te sors carrémint d’tierre aveuc tin cerceul et qu’te t’artreuves dins eune salle d’chpectaque, d’vint tous ches gins médusés qui ne t’attindotent pon lal. Et pou causse… Chi t’avos été un préchtidigitateur, ch’est parel. J’auros tiré min capieau. Pach’que tin tour d’pache-pache, même David Copperfield i n’a jamais tinté cha. Sortir d’tin prope interr’mint, ch’est pon banal.

Forchémint, cha n’est pon à ti qu’j’in veux. Te viens d’el payer assez quer. Mais, avoue que t’famille, ch’est pon vraimint cha ! D’jà tin père qui, à ch’début, profite d’faire ch’prope pub pou sin disque. Ch’est vrai qu’te li f’sos d’l’ombe, mais t’avos tes raisons. D’ailleurs, cha t’a conduit à ête ch’que t’es dev’nu. Inchuite, ch’est t’mère qui profite d’récupérer tes gamins. Pis, t’sœur qui fait savoir qu’in n’sait toudis pon d’quo t’es mort. Bref, tout cha comminche chérieuss’mint à juer aveuc ches nerfs d’tertous ! Infin, quind j’dis tertous, j’devros plutôt parler d’ches journalistes qui sont prom’nés par l’biout d’euch nez, ti qui in minquos !Même aveuc des hélicoptères, is n’arriv’tent pon à suif’ tin cerceul.

I faudrot quind même qu’in t’laiche trinquille eune bionne fos pou toutes. In effet, pindint ch’timps-lal, i ch’in pache des cosses et, nou’z’autes, in pache à côté. In pus, mi, j’sus in chômache technique. Commint veux-tu que j’fasse rir’te ches gins, chi in m’chupprim’te toutes ches actualités…

V’là, min Michael, ch’est eune prière que j’t’adrèche. A’ch’t’heure qu’t’es là-haut, cha s’rot bin qu’te tires ches bionnes fichelles pou tout armette dins ch’bion chins aveuc ches journalistes. Faire qu’is y aient quéques déclarachions fracachintes pou qu’in puiche arprinte ch’cour. T’inquiète pon, cha n’impêqu’ra perchonne d’avoir moins querre à ti. D’minde auchi à t’famille d’arrêter d’faire monter ches inchères, pach’que cha tourn’te à ch’farche et cha richqu’te d’ête ti qui va in ête ch’dindon !

Episote 2 : Ches bêtisses ardémarr’tent tuduch’mint

Chalut mes gins ! Bah, j’sais bin que j’te l’ai dit pus haut, mais in est dins che s’cond épisote. In va faire com’ chi in ch’étot quitté, pis artreuvé. Min Michael, j’constate que te m’as acouté. Ch’est bin, pach’que ches gins is comminchotent à treuver ch’timps long. Mi, auchi ! J’vos qu’in a eu l’drot à eune arprisse d’ches phrasses. Pis pou eune fos, ch’est pon Ségo. Chi ch’est pon alle, querche cha sœur. Bah, ouais, mes gins, j’te rappell’te qu’alle a eune sœur jumelle, du moins d’cœur, et qu’alle partache à’ch’t’heure l’même adrèche, rue Solferino. Je vos, mes gins, qu’in oublie vit’ ! J’auros dû faire un rappel d’el saga préchédinte. Bref, Titine alle a déclaré que : « I n’s’agit pon de d’minder à ches Français des réponches qu’is n’sont pon capapes d’apporter. » Ch’est quo ch’traval ? Alle no prind pou des babaches ? I faudrot p’t-ête qu’alle les posse, ches quechtions. Cha s’rot chertain’mint churprenint pou alle d’vir qu’in est nombreux à avoir des réponches ; et su bion nombre d’sujets. Mais ch’est toudis parel. Puis, i faudrot savoir no acouter, ch’est pon gagné ! In même timps, in sait d’qui cha vient ! Bref, heureuss’mint que ch’t’épisote i arrife d’jà à ch’fin, car, com’ l’aute i cante : « Cha m’énerfe ! »

Episote 3 : Tros jours pus tard

Chalut mes gins ! Ouais, cha fait l’trossième fos ! Bah, te sais ch’qu’in dit : « Jamais deusse chins tros ! » Pis, ch’est com’ ch’générique d’eune série. Ch’est à ch’début d’tous ches épisotes. Quo qu’j’n’ai pon fait lal, i y a tros jours ! Mi qui m’plaignos qu’je n’avos rin à m’mette chous l’dint. Je n’pinsos pon qu’j’allos m’réveiller aveuc ch’meilleu gag d’l’été ! Min Michael, j’t’avos d’mindé d’tirer ches fichelles, mais j’cros bin qu’te t’es gouré. Je ne t’avos pon d’mindé d’juer aveuc ches câbes électriques…

Résultat d’ches courses : Quind ches câbes is ch’croiss’tent, cha fait des courts-chircuits. Pis, cha fait graf’ péter ches fusipes chez ches responsapes d’EDF ! Après avoir fait un imprunt d’pus d’tros milliards, les v’là à vouloir, à’ch’t’heure, augminter ches prix d’vingt pou chint. Même chi ch’est su tros ins, i y a, com’ qui dirot, eune coulle dins ch’potache ! Pardon, chi j’sus grochière, mais cha choulache, mes gins ! Qu’est-che qu’i ch’pache ? Is vienn’tent de ch’arperchevoir qu’is ont proposé quate et d’mi pou chint d’intérêts pou leu imprunt, alors ch’est tertous qui va d’voir mette ches mains à ch’porte-monnaie. Ch’est cha ?

Ch’est p’t-ête un calcul chimpliste d’em part, mais ches gins qui vienn’tent d’avincher d’l’argint pou ch’t’imprunt, est-che qu’is n’von’tent pon l’arperdre ? Te m’diras, pou eux, cha s’ra eune opérachion blinche. Pis, ch’is ont été capapes d’prêter ch’t’argint, ch’est qu’is in avotent. Tindis qu’pou nou’z’autes, cha coût’ra ! Inchuite, quind te lis que EDF investit eune partie d’sin pognon, donc, de ch’qu’in li verche, su ches marchés inglais et américains, cha profite à qui ? Bin, cor’ pon nou’z’autes ! Sauf chi t’es ac’chionnaire !!! Quind te lis qu’i y a eune perte due à des capitalisachions boursières, te n’es pon in drot de te d’minder ch’i n’y a pon un rapport d’causse à effet aveuc ch’ress’ ? Dernier point, avint que j’investiche dins un vintilateur géint pou faire min jus mi-même. Ch’PDG i ch’est augminté, i n’y a pon bin longtimps. Pou li, cha n’fait p’t-ête pon gramint ! Quind in gagn’te pus d’neuf chint mille euros par in… D’autint, que j’n’sus pon sûr’te qu’i pay’te sin électrichité à ch’même prix qu’ti !

Bah, cha y est, mes gins ! J’cros que j’vais finir par argretter l’prière que j’avos faite ! Quelle idée j’ai eue d’mette in tite, ch’saga d’juillet ! In n’est pon cor’ à ch’mitan, cha promet pou l’fin d’mos et l’ress’ d’ches vacinches ! D’jà que ch’périote alle est propice à faire ch’ginre d’trucs. Pindint qu’in bronze, in oublie l’réalité. Pis, quind in arvient, bam ! Ch’est fait !