Chalut mes gins ! Infin, j’devros dir’te chalut à ceusses qui sont toudis lal et pon in train d’faire bronzette su eune plache. In leu chouhaite d’bionnes vacinches. Parel, d’ailleurs, à tous ceusses qui sont à Gardincourt. Ch’est moins loin, ch’est moins quer et, quéquefos, ch’est tout auchi bin ! Infin, ch’est pon tout cha mais : I fait bieau, i fait bion ! Ch’vie alle coul’te com’ eune canchon. Auchitôt qu’eune file alle est querre par un garchon…

Lal, à moins qu’t’aies été in hibernachion d’pis chinquinte ins, t’es in train d’te dir’te : « Mais cha m’rappell’te eune canchon d’Claude François ! » Mes gins, i n’y avot rin à gagner, chi ch’n’est qu’min echtime. Et ch’est d’jà gramint ! Mais t’as parfait’mint raison. Chi te m’connos un peu, te dos bin t’douter que chi j’te coll’te du Claude François, in introduc’chion, ch’est pach’qu’i y a un rapport aveuc l’chuite. Bin, nin ! Infin, ch’est pon tout à fait vrai pach’que j’voulos t’parler d’l’actualité d’amis à mi. Bah ! Dès que j’vais t’dir’te qu’is ont d’jà fait euch téléphone i braie, te vas vir ch’rapport… Mes gins, cha arrife tout drot pou qu’te pach’tes d’bionnes vacinches. Is sont d’artour, toudis aveuc ch’t’humour qui les caractériss’tent. J’veux, bin intindu, parler d’euch duo d’choc d’el Ch’tite Love Story ; alias Mimi Crincrin et Justin Chicon !

Ch’est tout caud, et cha va sortir ch’10 juillet. Ch’nouvieau single que t’as intérêt à acater vit’ fait ! In effet, t’auras que quéques jours pou t’intraîner avint ches bals d’euch quatorsse juillet. Mes amis Mimi Crincrin et Justin Chicon is ont eu l’idée d’arprinte l’tite d’Guy Bedos et Sophie Daumier, qu’ches moins d’vingt ins is n’peuv’tent pon connaîte. Oops ! J’m’égar’te ! Ch’est caud, ch’est caud, ch’est caud ! Eune bielle lechon d’drague pou tous ches coqs qui von’tent faire ch’bieau ch’t’été. Ouais, mes gins ! L’Ch’tite Love Story alle t’fait un cadeau. L’super slow, d’ù qu’te dinches collé collé, La Drague et in ch’ti ! A consommer chins modérachion. Ti, muché derrière tin écran, t’in as b’soin chi te n’veux pon finir viux garchon ou vielle file ! Pis, com’ Mimi et Justin n’arcul’tent pon d’vint l’talle d’leu cadeau, t’auras, pou ch’même prix, nin pon deusse, ni tros, mais quate tites à ch’total !

Alors, après eune drague d’infer, te vas découfrir que l’été s’ra caud, et ch’est rin d’el dir’te ! Pis, t’auras l’drot à un tite inédit qui a été écrit par Mimi Ducherloque d’ches Capenoules et, infin, eune canchon originale qui ch’appell’te les chansons de l’été. Avoue qu’cha quée bin ! Com’ i fait vraimint caud, churtout après eune drague com’ te viens d’faire. J’te rappell’te que cha sort dins ches bacs ch’10 juillet ! J’sais bin qu’in est pindint ches grintes vacinches et qu’tout i va à ch’ralinti, mais cha n’est pon eune raison pou qu’te fasses l’babache ! T’boîte à neurones alle n’dot pon ête in vacinches pou autint. A moins qu’cha ch’est liquéfié à causse d’euch solel ! Ch’est nin dins ches bacs à sape, ch’est chez tous ches bions disquaires, te l’auras compris !

V’là, mes gins. In va ch’quitter jusqu’à l’prochaine par ch’clip d’el drague. Histoire de t’mette l’ieau à ch’bouque ! Messache perchonnel à min Justin : Fais gaffe min gars quind te traites eune blonte com’ Mimi Crincrin d’Marie Toutoule. Pach’que, d’pis que j’fais parler d’mi su Internet et ailleurs, cha n’veut pus dir’te l’même cosse ! Te vas no avoir su ch’dios et te n’sauras pus t’in sortir min playboy ! Chi ches brunes alles n’comptent pon pou des prunes, te vas vit’ t’rinte compte que ches blontes alle peuv’tent t’invoyer dins ches peummes ! J

Grosses baisses Mimi Crincrin et Justin Chicon. Pinses, Ch’tite Love Story que, grâche à t’parodie, in richqu’te d’avoir un nouvieau baby-boom…