Chalut mes gins ! Alors, t’in as bin profité d’euch ouiquen ? J’espèr’te qu’ouais ! Malgré ch’timps inchertain qu’in no avot promis, in a eu vraimint l’été. Com’ quo, même chi in sait faire ches prévisions à chept jours, in n’peut toudis pon prévoir ch’timps qu’i f’ra ch’lind’main ! In tout cas, mi, j’sus allée vir l’mer à Malo Ches Bains et j’sus rintrée rouche com’ eune écrevisse. J’ai quind même eune pinsée émue pou tous ches ministres et ch’crétaires d’état qui ont dû travaller un diminche…

Ch’est vrai, mes gins. Cha n’est vraimint pon eune vie d’ête dins ch’gouvern’mint. D’autint qu’i y in a qui n’avotent rin d’mindé. In t’met à un pochte d’ù qu’te n’y connos rin et te dos faire bionne guiffe. In pus, te v’là imbauché d’pis quéques jours seul’mint et in te d’minde, d’jà, de v’nir travaller ch’diminche. Pis, ch’est cor’ pir’te que chi te travallos dins eune grinte churfache. Lal, te n’as même pon l’drot à du RTT pou rattraper ch’jour ! Et pindint ch’timps-lal, t’as Marie Toutoule et ti’z’aute qu’in va faire bronzette et trimper ches pids dins l’grinte bleue. Mais chi, l’mer d’euch Nord alle est bleue. Ch’est nin l’même bleu, ch’est tout ! Bah, mes gins ! I faudra qu’j’in parl’te à min Nicolas. Li qui a su faire un congrès à Verchailles, j’sus prête à li organiser l’prochaine réunion d’ches ministres à Malo Ches Bains, même chi ch’est un diminche.

D’jà, i faut que j’acate gramint d’boutelles d’crème solaire. Pach’que, chi ! T’attrapes des cops d’solel dins ch’Nord ! I n’faudrot pon, mes gins, qu’ches ministres et ch’crétaires d’état is vir’tent à ch’rouche ! D’jà qu’i y in a quéqu’uns qui étotent rosses in rintrant dins ch’gouvern’mint. Pis, i faut auchi faire attinchion à ches crânes. Ch’est qu’cha tap’te dur’te ! In n’voudrot pon, qu’à causse d’eune trop grinte exposichion, i y ait eune liquéfac’chion d’ches neurones. In in a bin assez aveuc l’fuite d’ches cherveaux ! Inchuite, pon quechtion d’app’ler ch’traiteur habituel de ch’t’Elysée. Nin ! Ichi, in minge des moules et des frites com’ tertous !  In buv’te eune bionne bière ou un cop d’blinc. Gare à ch’solel…

Ouais, su l’papier, cha march’te com’ pou Verchailles. Mais quo qui ch’pach’te pou ches frais ? In arjue che sketch d’Muriel Robin pou savoir qui pay’te quo ? Pach’que, dins l’lot, i y in a qui n’von’tent pon printe d’moules ! Te peux n’ête sûr’te ! Is von’tent préférer eune bionne mat’lote d’inguilles. D’autint que l’inguille, ch’est ch’plat préféré d’ches politiques. J’cros bin qu’je n’ai pon b’soin de t’expliquer qu’eune inguille, cha ch’faufile toudis ! Pou n’pon dir’te echquive… Alors in divisse par ch’nombre d’gins à tape ? Cha s’rot pus simpe, mais ches budgets alloués n’sont nin ches mêmes intre ches ministères. Bah, ch’est nin graf’, in fait un imprunt national ! Que ceusses qui veul’tent payer ches moules compossent ch’numéro de ch’t’Elysée et is tap’tent che un. Pou ches frites, ch’est ch’deusse. Tros, chi te prinds in charge eune bière et quate, chi ch’est pou ch’vin blinc ! Chinq, ch’est pou tout l’ress’…

Te vos, ch’est simpe com’ un cop d’fil d’armette des pépettes dins ches caisses d’l’état ! In aurot dit que j’l’avos arniflé quind j’ai fait min artique su ches nouvieaux miots d’euch dic’chionnaire. Te sais, quind j’ai découvert qu’in avot mis financiarisation qui, comme l’indique l’définichion, veut dir’te qu’in basse l’politique d’un pays su des imprunts publics. Etrinche ? T’as dit étrinche et j’te confirm’te que ch’est bizarre auchi ! Je n’savos pon que madame Larousse alle f’sot ch’même métier que madame Irma. Alle voyot dins l’futur ! Ch’est min Nicolas qui est bin contint. I va pouvoir justifier d’euch fait que ch’est dins ch’dic’chionnaire…

Com’ ches trains, un imprunt i in muche un aute ! T’as auchi EDF qui réclam’tee des pépettes à ches abonnées qui l’veul’tent. Pourtint, chi je n’em goure pon. Quind t’arçois t’facture intermédiaire, te peux n’ête sûr’te qu’in t’mets toudis pus, in consommachion, que ch’que t’as réell’mint consommé. Même chi in t’déduit cha quind in vient arl’ver tin compteur. T’appell’tes cha commint, ti’z’aute ? Mi, j’appell’te cha un imprunt ! Ch’est toudis ches mêmes qui doiv’tent aller dins l’fond d’ches poques. T’essay’ras, ti, de n’pon payer tes impôts in disint qu’ch’est un imprunt qu’te fais, pach’que ch’est l’crisse, et qu’te rimbours’ras l’année d’après ou dins chinq ins !

Mes gins, com’ ch’est à l’mote, j’annonche ichi que Marie Toutoule alle linche sin imprunt nachional pou aider sin ministère d’l’humour ! Te peux m’croir’te, j’in ai b’soin. Com’ ti, te m’diras. Ouais, mais ch’est mi qui y ai pinsé in premier. Copyright su ch’princhipe, mes gins…