Chalut mes gins ! J’espèr’te que cha roul’te pou ti ! Infin, ch’est eune fachon d’parler, car chi t’as fait tin plein, t’as dû t’rinte compte que cha coûte pus quer qu’el s’maine dernière, just’mint d’rouler ! Mi, après min périple à Verchailles, j’ai fini par treuver l’porte d’sortie pou rintrer à m’baraque. Figure-te qu’cha m’a quind même posé des problèmes car, l’nuit dernière, j’ai fait un drôl’te d’rêfe. Pis, j’pinse, après cop, que tout i est v’nu d’min artique et l’fait d’avoir parler d’el Burqa. I faut que j’te raconte cha, mes gins…

Cha ch’pachot pindint qu’j’étos in train d’quercher min qu’min dins ches couloirs d’Verchailles. V’là t’y pas que j’ai l’sinsachion qu’i y avot eune présinche derrière mi. Te sais, com’ chi, d’un cop, t’avos tin chixième sins qui tirot l’signal d’alarme ; pou dir’te qu’in étot in train de t’raviser. Quo qu’te fais dins ches cas-lal, ti’z’aute ? Te t’artournes pou raviser auchi. Ch’est quo qu’j’ai fait, mais rin ! J’continue à arpinter ch’couloir d’quéques mètes et re-parel…

Te m’connos, mes gins, je n’em sus pon déboulonnée ! D’autint que je n’sus pon un Transformer ! J’ai pris ch’poudrier dins min sac, com’ chi de rin i étot, et j’ai utilisé ch’tiot miroir pou raviser derrière mi. Bah, te m’croiras chi te veux, mais cha marche, ch’truc ! J’avos eune burqa bleue derrière mi, à bionne dichtinche, qui f’sot com’ un halo d’leumière.

—    Quo qu’te m’veux ti’z’aute ? que j’disos in continuint à avincher. Te cros que je n’t’ai pon vue ? Chi te pinses que j’ai ches chocottes, te t’mets l’dogt dins l’eul à travers tin grillache !

T’as d’jà eu l’impréchion d’parler à un mur, mes gins ? Bin, mi, ouais ! J’ai cor’ fait quéques mètes mais j’n’avos toudis pon eu eune réponche à m’quechtion. Pourtint, ch’t’OVNI, derrière mi, i continuot d’avincher dins ches mêmes proporchions. Pardon, mes gins, aveuc ches acronymes, i richqu’te avoir confusionnache. Bin intindu, te liras Objet Voilé Nin Idintifié ! In aurot dit qu’alle rechpectot ches distinches d’chécurité. Bref, cha comminchot à m’énerver graf’. J’em sus artournée à ch’momint d’ù qu’i n’y avot aucune niche à ch’n’hauteur pou ch’camucher.

—    Te n’as pon fini tin manèche, ti’z’aute ? T’arpach’ras pou ches frayeurs. Marie Toutoule alle n’a même pon peur ! Pis, t’as perdu t’lingue ou te n’causes pon com’ mi ?

—    Chi !

—    Bah, in a fait un énorme progrès in eune frac’chion de s’conde ! Ch’est quo tin délire ? Te sais, chi t’arfais un remaque d’Belphégor, te t’es gourée ! J’cros bin qu’te t’es mélingée ches pinceaux aveuc l’Louvre. Ichi, in est dins ches couloirs d’Verchailles, va falloir arvoir t’géographie et tes clachiques ! Te dos chertain’mint vir d’quo que j’veux parler et, churtout, à quo qu’i arsimpe. In a bieau avoir l’impréchion qu’ches deusse costumes is ont été déchinés par l’même chtyliste, t’as cor’ du qu’min à faire avint qu’in t’prenn’te pou ch’fantôme !

—    Euh…

—    Bah ! Te n’as pon gramint d’vocabulaire. Vas-y ! J’t’acoute !

—    FRA-TER-NI-SONS !

—    Ch’est marrant ! Te m’rappell’tes graf’ quéqu’un !

—    Oui, ch’est bin mi… Chutt…

—    J’auros dû m’in douter ! Après t’djellaba bleue du Zénith. Pis, tin boubou bleu, j’auros dû auchitôt pinser à ti. A’ch’t’heure, te t’essay’tes à l’burqa bleue. Ch’est incroyape cha ! Te n’auras pus qu’à t’mette auchi in bionne sœur. Com’ cha, in pourra offichialiser tin nom d’sœur Ségo !

—    J’sus ichi incognito pou glaner des informachions.

—    Ch’est t’nouvielle copine, Titine, qui t’fait faire ches echpionnes ?  Pach’que, ch’est parel, ches files. I n’faudrot pon faire eune confusion aveuc Mata Hari ! Pis, lal, pou ch’costume, t’arpach’ras. Pach’que, alle, alle avot ch’vitrine grinte ouverte !

—    J’sus v’nue à l’pêque à ches rinseign’mints pach’qu’in che d’mindot qui allot bin ête détourné par ch’Ro dins ch’parti. In sait bin qu’i a querre à mette du rosse dins sin bleu !

—    Bah, t’es toudis auchi in artard ! Ch’Ro i a d’jà donné l’composichion d’euch nouvieau gouvern’mint. Cha ne m’étonn’te pus que ch’est l’débindate dins tin parti.

—    Ca fait deusse jours que j’tourn’te in rond !

—    Cha fait même quéques années… Bion, com’ j’sus bionne copine, j’vais t’faire ch’résumé. Cha n’a rin d’compliqué. In fait com’ ches caïelles musicales. T’in inlèfes huit pou ch’premier tour et te balinches l’musique ! Te l’arrêtes brutal’mint et tout ch’qui quée à tierre, te les armercies bin.

—    Ah bion ! ch’étonna Ségo, donc je n’pouvos nin vir l’argard à causse d’euch grillache.

—    Mais nin ! Te n’cros quind même pon qu’el politique ch’est com’ ch’lot’rie. Quoque… In fait, te vires d’jà ceusses qui ont gagné un fauteul à Bruxelles. Ch’est bin connu. A part un qui a toudis treuvé ch’moyen d’mette sin chul intre deusse caïelles, cha n’est pon pratique. D’autint quind alles sont éloignées d’kilomètes ! Inchuite, te vires tous ceusses qui ont eune guiffe qui n’arvient pon à ch’Ro ou tous ceusses qui l’ont contrarié. Ch’est ainchi qu’in armerchie ch’jueu d’rugby qui n’a pon marqué sin essai. Pou Xavier Darcos, l’école alle est finie, mais ouais, mais ouais. Ch’est Luc Chatel qui s’ra l’nouvieau prof.

—    Ch’est bion. J’m’in chouviendrai pou 2012…

—    Ch’est cha, in peut rêfer ! A’ch’t’heure, te peux vraimint faire ches caïelles musicales. Te mets eune étiquette muchée su chaque dossier. Je n’vais pon t’expliquer. Bref, quind t’arrêtes ch’te musique, t’in as, forchémint, qui von’tent arquerre su l’étiquette qu’is avotent d’jà. Par eximpe, min Jean-Louis Borloo. Pis ch’est pon pus mau car i n’a pon cor’ eu l’timps d’finir ches maisons qu’i avot promises. I a monté ches murs, mais pon l’ress’ !

—    Donc, t’in as qui von’tent ch’artreuver à un aute sièche…

—    J’vos qu’t’as suivi. Ch’est pou cha, par eximpe, que pou MAM, l’guerre alle est finie dins ches affaires chochiales et qu’alle ch’artreuve l’porteusse d’ieau. D’ù ches fameux sceaux qu’alle s’ra obligée d’garder ! Te m’diras, ch’est dommache qu’alle n’les ait pon eus pleins d’ieau avint, pou éteinte ches feux dins ches banlieues ! Mais i n’faut pon croir’te que tout i est l’fruit de ch’t’hasard. Nin, nin, nin ! Ch’est com’ dins ch’te série américaine d’ù qu’tout i est résolu par ches maths. Bah, ichi, ch’est parel ! Ches maths alles vienn’tent à l’insu du plein gré de ch’t’hasard. Te prinds Rama Yade, par eximpe. Alle est noir’te, donc pus d’chince d’ête issue d’el banlieue. Qui dit banlieue, dit chport dins ches rues. Bah, la v’là ministre d’ches chports !

—    Ch’est gramint compliqué in fin d’compte !

—    Ch’est d’el politique, ch’est tout ! I n’s’agit pon d’faire un invintaire d’ches éléphints et d’prêquer l’bionne parole à ch’Zénith. Même chi j’arconnos, volontiers, que t’arrifes pus fachil’mint à rimplir eune salle que t’nouvielle copine. Bion, in n’va pon passer l’ress’ d’el nuit à faire l’castinge complet. J’ai gardé l’meilleu pou l’fin…

—    Ch’est quo ?

—    Min Nicolas i a arfait l’cop d’Jeanne d’Arc.

—    Je n’vos pon…

—    Pourtint ch’coiffure alle est vraimint parelle. Alle, ch’est ches pirates qu’alle voulot même hors d’France. Ches pirates informatiques, j’intinds, puich’que j’veux parler d’Christine Albanel. Cha n’impêque pon qu’alle est grillée ! V’là qu’in ch’artreuve aveuc Mitterrand !

—    Alléluia ! Alléluia ! qu’alle comminchot à canter Ségo. I est arv’nu pou no sauver !

—    Nin mais cha n’va nin, l’tiête ! Te dos churcauffer dins ta burqa. Chi te veux adopter ch’te t’nue d’schène, i faudrot qu’te pinses à installer eune clim, pou n’pon faire fonte tes fusipes ! J’sais bin qu’ches initiales alles sont parelles mais, mi, j’voulos parler d’Freddy !

—     Aahhh !!! lincha-t-alle d’eune vox affolée.

—    Nin ! Ch’est pon chi terripe que cha. I n’a rin à vir aveuc Freddy Kruger dins ches griffes d’el nuit ! Même chi j’arconnos volontiers que ch’est chpéchialiste in cinéma !

Mes gins, te m’croiras chi te veux, mais ch’est à ch’momint-lal qu’min rével i ch’est mis à sonner !  Ch’est toudis parel, cha finit in ieau d’boutin. Pardon, j’voulos dir’te in ieau d’boudin. Boutin, alle, alle n’est pus dins ch’nouvielle saison chinq d’Fillon ! In tout cas, cha confirme ch’que j’choupchonnos d’pis un biout d’timps : L’politique, ch’est com’ l’cinéma ! T’as bieau chinger ch’castinge, te t’artreuves toudis aveuc eune mauvaisse comédie ! A’ch’t’heure, in saura tout dins eune nouvielle verchion d’étoiles et toiles…