Chalut mes gins ! Alors, commint qu’te vas après ch’te fiête d’el musique ? T’in as eu plein l’tiête ? In tout cas, mi, j’em sus bin régalée. Tros soirs d’chuite, mais cha valot l’détour. Mes excusses auprès tous ches artistes qui m’ont invitée et que j’n’ai pon pu aller vir. Aveuc l’meilleu volonté d’euch monte, j’n’ai pon l’don d’ubiquité. Malheureuss’mint car cha s’rot vraimint utile par momints ! Menchion chpéchiale à min Olivier Marais à qui j’fais eune grosse baisse et aveuc l’quel j’ai paché un agréape momint, après sin conchert à Douai. Mais in va y arv’nir un aute jour. Com’ cha, j’pourros t’parler d’sin album et t’montrer ches photos qu’j’ai faites…

A’ch’t’heure, in va plutôt mette eune musique clachique. Cha ching’ra d’el techno qu’j’ai intindu ichi et lal, d’ù qu’t’as l’impréchion qu’ches marteaux piqueurs is sont in route. A moins, mes gins, qu’i y a eu gramint d’minis trimbl’mints d’tierre, tell’mint ch’sol trimblot partout ! Alors, ichi, cha s’ra plutôt du menuet. Bah, mes gins ! Ch’est un jour qui n’est pon ordinaire. Eune sorte d’révoluchion à l’invers. Ch’Ro d’France i investie Verchailles ! T’imagin’tes l’schène : Min Nicolas i arrife aveuc eune perruque blinche toute bouclée. Ch’guiffe poudrée aveuc eune mouque déchinée à ch’crayon noir’te. Eune qu’misse à jabot chous eune veste bleu ro, bin intindu. Un pintalon d’el même couleur, gramint bouffint, jusqu’à ches mollets. A ches pids, d’tiots mocachins vernis. Cha ! Ch’est gramint dur’te deut’ l’imaginer ainchi. Cha ching’te d’ches costumes Smalto ou Armani. Mais li qui est toudis à ch’mette in leumière, un peu d’bleu ro à paillettes, ch’est un chtyle ! Ches années disco arvues et corrigées, ch’mote est un éternel arcomminch’mint !
A’ch’t’heure, min Nicolas i va parler, mais pou dir’te quo ? Cha n’est pon ches sujets qui minqu’tent ! Te peux n’ête sûr’te qu’in va évoquer un sujet brûlant qui fait débat d’pis quéques jours. Ch’est ch’port d’el Burqa. Te sais, ch’est ch’que chertaines femmes alles sont obligées d’mette dins ches pays musulmans. Ch’est eune sorte d’combinaison intégrale com’ ch’i y avot eune alerte à ches gasses. L’seu différinche, ch’est qu’te n’as pon un machque in plachtique, mais eune mouchtiquaire. Bah, pou les gasses, ch’est complèt’mint raté ! Par conte, pou vintiler, ch’est quind même indispinsape. Pach’qu’in n’peut pon dir’te qu’i y ait gramint d’air qui rinte par l’bas, étint donné qu’cha déchind jusqu’à par tierre ! In France, cha fait débat pach’que, jusqu’à preuf’ d’euch contraire, in vit dins un pays laïque. D’jà qu’ches religieux is n’ch’arnaiqu’tent pus in habit et qu’te n’les arconnos pus dins l’rue. Cha n’ingag’te qu’mi, mais j’ai l’impréchion qu’ch’est eune sorte d’provocachion invers tertous.
Inchuite, d’quo qu’i va bin parler ? D’euch artraire qui va pacher à soichinte-chept ins ? Bah, mes gins ! Chi in continue à faire ch’qu’in fait, in n’aura pon d’artraire tout court ! Ch’est vrai qu’cha fait gramint peur, churtout dins chertains métiers. Mais chi te dis à ches gins qu’te vas augminter ches prélèv’mints d’fachon chpectaculaire, cha s’ra eune révoluchion cor’ pir’te. J’sais bin qu’min Nicolas i est à Verchailles mais cha n’est pon eune raison pou no arjuer cha. Quoque, j’arviens su ches t’nues d’l’époque, pach’que j’préfèr’te m’imaginer tous ches politiques dins d’bielles fouffes, plutôt que d’parler d’ches sujets qui fâch’tent. D’toute fachon, in y aura l’drot, même chi in n’in veut pon ! Alors, chi Verchailles m’étot conté, j’verros bin ches cosses com’ cha. Ch’est eune journée type qu’i y avot à ch’t’époque d’euch Ro solel.
8h, ch’est le « tiot levé ». L’premier valet i a paché l’nuit à ch’pid d’euch lit d’min Nicolas. Te sais, au cas d’ù qu’i f’rot un cauch’mar. Pou l’rassurer. Bah ! Aveuc tous ches gins qui l’attind’tent à ch’tournint, i y a d’quo faire d’mauviais rêfes. Du ginre, ches sœurs jumelles Ségo et Titine qui li scient ches pids d’euch trône pou li faire eune bionne blague quind i va ch’assir d’dins. I va ch’artreuver ches quatre fers in l’air. Ch’est ch’qu’in appell’te rinvercher l’gouvern’mint !Ch’premier valet va li dir’te à ch’n’orelle : « Sire v’là ch’t’heure ! » Bion, i faut que j’réactualisse ch’te formule. Alors, mi, j’proposse :  « I est 8 heures à t’Rolex, min Nicolas ! » Et com’ eune modif alle n’vient jamais seu, in pourrot vir, com’ premier valet, Jacques Séguéla in perchonne. D’autint qu’i est CHE chpéchialiste incontesté ! Inchuite, rintrotent dins l’champe ches chirurgiens qui ravisotent commint i allot. Ichi, cha s’rot pus eune tripotée d’syndicalistes qui constat’rotent qu’i va toudis bin dins ches sondaches, à leu grind argret. Pis, dins l’rôle d’euch premier gintilhomme, in treuve Fillon, à qui incombe l’tâche, ô combien compliquée, d’ouvrir ches rideaux d’euch lit. Ch’est pou cha qu’i arrivot toudis aveuc chix garchons d’champe.
8h15, ch’est « l’intrée familière ». Te peux traduir’te cha par l’intrée in schène d’Carlita, des tiots Princes ; Jean, passe et des meilleurs, pou finir par Louis, cor’ un ! J’ai arrêté min compteur, alors te calcul’ras, ti-même, chi cha fait disse-chept ou disse-huit ! Com’ i y a d’el plache dins l’champe, chacun i ramèn’te des copains. Par eximpe, ch’ti qui ch’occupe d’el garde-rope mais, auchi, ch’ti qui oufre l’garde-rope. Ch’est com’ dins chertaines administrachions. Perchonne i n’est multitâche. Bref, te t’imagines l’truc, is ch’artreuvent à vingt-deusse minimum ! Ch’Ro i fait eune tiote prière. Je n’sus pon dins ches vox d’euch Seigneur mais j’imagin’te bin min Nicolas : « Seigneur, faites que Ségo et Titine alle ch’arbouff’tent l’nez cor’ un cop. Pindint ch’timps-lal, j’pourros ête trinquille pou faire quo qu’j’ai invie ! Ch’est vraimint la barbe d’pis qu’alles sont com’ chul et qu’misse ! » Tiens, just’mint, ch’est à ch’tour d’euch barbier d’rintrer dins l’pièche. Je n’sais pon qui te vos dins ch’rôle, mes gins, car ch’est vraimint un privilèche d’faire l’barbe à min Nicolas. Li qui barbe tell’mint d’monte !
8h30, ch’est « l’grind l’ver ». Min Nicolas i ch’déchide infin à mette ches pids par tierre pou aller ch’assir su cha « caïelle d’affaire ». Te peux vir ch’que te veux, mais mi, j’vos un trône. Penses à ti. Quo qu’te fais juss’ après t’ête l’vé ? Cha à bieau ête Verchailles, in n’a pon toutes ches commodités… Pindint qu’i fait ches affaires, in finit par li donner un tiot cop d’peigne. Ch’est Jean-Louis David in perchonne qui a fait l’déplach’mint et qui li donn’te auchi ch’perruque. Pou l’tiote histoire, alle est moins haute qu’cheule d’el journée. Pon l’peine d’paraîte pus grind pou ches gins d’sin intourache ! Ch’est auchi l’intrée in schène d’euch contrôleur d’l’argent’rie. I dot vérifier, à m’mote, qu’i n’y a perchonne partie aveuc eune tiote ceuière. Vu l’passache qu’i y a, cha n’m’étonn’rot pon ! Inchuite, in l’aide à li inl’ver ch’qu’misse d’nuit. L’un par l’manque drote, l’autre par l’gauche. Ch’est eune drôl’te d’histoire pach’que, d’après ch’que j’avos compris, i n’y avot que François qui étot coinché intre l’drote et l’gauche ! Bref, ch’est ch’dauphin, in perchonne, qui li donn’te eune qu’misse pou ch’journée.
9h, ch’est « l’tiot déj’ner ». L’coutume alle veut que ch’Ro i buv’te deusse tasses d’tisane, mais in n’sait pon d’quo ! Pach’que, quind te l’ravises, par momints, te te d’mindes à quo i peut bin carburer… In tout cas, ch’est costaux, vu commint i armue tout l’timps !Pis, in n’parl’te pon d’toasts. Pourtint, ch’dauphin i est gramint bin plaché pou li faire des tartines grillées. Cha n’est pon ches grilles-pain qui minqu’tent dins ches rayons chez ch’femme ! Parel ! Te cros qu’i che s’rot saigné d’un fer à friser pou rectifier ches mèques d’el perruque d’sin père. Pach’que, tout dauphin qu’i est, ch’est quind même sin père ! I pourrot y faire pus attinchion, au lieu d’attinte uniqu’mint l’plache lipe su ch’trône ! Ch’est auchi l’instint d’ù qu’i li armonte ch’monte. I n’faudrot pon qu’el Rolex alle donn’te l’heure d’un aute pays. Com’ i est toudis in voyache quéque part, pou eune fos qu’i est in France, cha s’rot vaqu’mint immerdint pou ches rindez-vous. Cor’ eune tiote prière, à g’noux. Jean-Louis David i profite de ch’te chituachion pou li mette ch’perruque haute… Te vos, ch’i est obligé de ch’mette à g’noux, ch’est qu’i n’est pon chi tiot qu’cha, min Nicolas. Ou alors, ch’est min Jean-Louis David qui n’est pon grind. Va savoir !

9h30, I faut bin qu’cha démarr’te à un momint ou à un aute, ch’est l’début d’eune journée d’traval ! Alors, mes gins, in va les laicher faire et in va partir su l’pointe des pids, pou n’pon les déringer. Is sont in train d’juer aveuc not’ av’nir… Pou n’pon dir’te aveuc nos nerfs !