Chalut mes gins ! Je n’sais pon chi ch’est l’approche d’l’été, mais i ch’pache d’drôl’tes d’trucs dins ches médias. Te m’diras, ch’est pon du nouvieau, misse à part qu’cha à l’air d’ête conchintré in ch’momint ! Sors ches leunettes d’solel, te richqu’es d’ête ébloui par autint d’culture et éloign’te ches gamins, car cha richqu’tes d’ête caud…

In annonche ch’t’artour de Secret Story. Te vos, j’comminche fort dins ch’culture ! Ch’est d’ailleurs tell’mint culturel que ch’présintateur i fait d’el muscu… Bah ouais ! Ch’est bin l’problème d’ches miots, ch’est qu’in peut, quéques fos, mau les interpréter. Pis, chi j’in rajoute eune couche, cha quée bin, pach’qu’i in tient eune bionne, j’le vos mau aveuc eune pielle dins ches mains in train d’bêquer pou mette des patates ! Ou d’les récolter, d’ailleurs, même ch’i a d’jà prévu sin camion-benne. Allez, j’te l’fais, mes gins, eune benne J, bin intindu ! Nin, cha n’va pon ! In l’vot poucher un caddie dins ch’pub pou annoncher l’émichion. Ch’qui proufe bin qu’i n’les cultiv’te pon, i les acate. Millard ! M’démonstrachion alle prind eune aute tournure. Ch’est bin du métal, ch’caddie. Quind in fait d’el muscu, in dit bin qu’in soulèv’te du métal. Bin, li, i l’roul’te. J’confirm’te, i n’a pon tout sin kilo…
Bion, j’sus qu’eune moqueux d’gins. In va l’laicher faire sin traval, pou n’pon dir’te sin dur’te labeur d’ù qu’i va toucher eune misère : 650000 euros ! Moins ches frais, mes gins, i faut quind même relativiser. D’autint, qu’à’ch’t’heure, ches concurrints is von’tent ête conchidérés com’ des intermittents du chpectaque. Des acteurs, quo, d’pis qu’i y a eu jurisprudence. Ch’est pou cha qu’i n’y aura pon des caméras qui film’tent in permaninche. Etint donné qu’in n’a pon l’drot d’travailler vingt-quate heures su vingt-quate. Is auron’tent donc tout loiji pou répéter ch’qui s’ra diffusé à l’tévé ! J’n’ai pon dit qu’cha s’ra truqué, mes gins. Nin ! In sait très bin qu’cha ne s’rot jamais v’nu à l’echprit d’ches producteurs d’arringer ches bidons pou faire d’l’Audimat. Pou continuer à juer ches moqueux d’gins, j’fais eune prière. Te peux la faire aveuc mi. Etant donné qu’ch’est des salariés et pus des cindidats, i faut echpérer que, dins l’lot, i va y avoir un syndicaliste zélé. Com’ cha, is no f’ront eune bionne grèfe su ch’tas et in aura l’drot carrémint à l’chuppréchion de ch’t’émichion ! Pou eune fos qu’eune grèfe alle arring’rot ches Français !
Bion, ch’est pon Noël, mais com’ cha d’vient eune chpéchialité françaisse d’chéquestrer ches chefs d’intreprisse, in peut echpérer qu’is von’tent ch’occuper d’euch guignol d’cherviche ; cadieau bonus ! Pis, ch’is pouvotent l’bâillonner, cha évit’rot d’intinte bin des bêtisses. Ch’i n’est pon sache, is pourron’tent faire eune grosse vox. Cha quée bin, i y in a eune à dichposichion qui dot égal’mint ête salariée, ch’t’année. Tiens, parlons-in d’el vox. Ete un inchien cindidat, cha laiche forchém’int des chéquelles. Pou preufe, te prinds ch’prête d’l’année dernière, Laurent. I a du intinte eune vox, d’pis qu’i in est arsorti, ch’est sûr’te, mais cha n’est pon eune vox divine ! Ou alors, ch’est qu’i n’a rin compris ou qu’alle n’li parlot pon dins ch’lingue. In effet, i n’a rin treuvé d’miux que d’inregistrer eune canchon et d’tourner un clip. Bion, cha n’a rin d’révoluchionnaire, ch’est vrai. In est bin loin, toutefos, d’sœur Sourire et d’sin Dominique, nique, nique, comique et coquin mais chertain’mint pon voulu par ch’t’auteur.
Ichi, min Laurent i ch’balate su eune plache paradisiaque aveuc un sweat ouvert in grind su eune bielle crox. I raconte qu’i l’a rincontré d’vint sin miroir. In chupposs’te qu’i parl’te d’Diu, mais in n’sait pon pouquo i y a des files à poil qui défil’tent autour d’li. Ch’est bion qu’in n’est pon su l’île d’el tintachion, pach’qu’i y a d’quo in perte sin latin ! In n’sait pus à quel saint ch’vouer, même chi cha n’est pon ches seins qui minqu’tent ! Alors, est-che qu’i y a un messache subliminal ? Du ginre, malgré ches tintachions, mi, j’rechte su ch’drot qu’min. Même chi, in l’vot dins ch’clip, i ne ch’continte pon d’rasiser ches pids ! In peut même dir’te qu’i ch’intéréche à ches culs auchi. Faudra que j’em rinseign’te pou savoir ch’is in sont… Des culs bénis, bin intindu ! Deussième hypothèsse.  Est-che que ch’est l’nouvielle méthote pou ram’ner des gins dins ches églisses ?
A’ch’t’heure, du côté d’ches files, ches chéquelles alles sont lal auchi ! T’in as eune, Laly, qui vient d’tourner dins un film porno d’Marc Dorcel, in disint qu’cha n’pouvot pon nuir’te à sin imache. Ch’est sûr’te. Quind in pache dins ch’ginre d’émichion, in n’craint pus grind cosse pou sin imache. Pourtint, dins l’même timps, alle dit qu’alle a fait arfaire ch’poitrine, mais qu’alle n’a pon touché à sin cul. J’sus désolée, mes gins, ch’est cru mais ch’est nin mi qui l’dit ! Ch’est bin pou cha que j’ai mis eune alerte, à ch’début, pou éloigner ches gamins ! Pis, cha n’est pon l’seu. Te peux mette dins l’même panier Isabelle, qui rêfe d’tourner auchi dins un porno. Maeva, qui ch’continte d’photos d’ù qu’alle n’a pon trop d’repassache à faire. Bion, alle a, quind même, eu du mau à tinte ches fichelles d’sin stringe…
Sachint qu’min Benne J i a inchérit dins l’saison deusse in ch’déguisint in n’importé quo, in peut ch’attinte au pir’te ch’t’année. I n’a pon cor’ montré sin anatomie, du moins, cha n’m’a pon frappé ! Alors, quo qu’i va no sortir ? Tiens just’mint ! Côté d’ches gars, in attind toudis un défilé d’bigoudis, pindint qu’in y est ! I n’y a rin qui vient ! L’seul bigoudi à ch’t’horizon, ch’est pon d’quéqu’un sorti de ch’t’émichion. Ch’est ch’ti d’min Jean-Marie Bigard qui n’a rin treuvé d’miux que d’montrer l’chien à la fin d’un documintaire qu’i fait, pou ardonner ch’verchion d’ches attintats d’ches tours jumelles. Bah, mes gins, j’n’ai même pon été impréchionnée ! Cha n’a rin à vir aveuc eune tour, cha fait plutôt cabane ! J’sus gintille aveuc li, j’auros pu écrir’te niche à quien !

Mes gins, chi in tient compte auchi qu’min Jacques Chirac i a fait l’buzz, i y a quéques jours, à causse d’sin aparté aveuc eune blonte, derrière l’dios d’Bernadette, j’vais résumer par ch’qu’eune d’mes amies alle cantot tintôt, l’été s’ra caud ! Mais, apparemment, chins ches tee-shirts et chins ches maillots…


Te prinds des richques mais te peux raviser sin clip...