Chalut mes gins ! Et v’là cor’ eune s’maine qui vient d’pacher com’ pou rir’te ! In va chouhaiter d’bionnes révisions à tous ches lycéens qui vont pacher leu bac et commincher, lundi, par eune épreufe d’philosophie. Histoire d’ête in condichion toud’chuite, car ch’est toudis un peu com’ ch’lot’rie.  Mais cha n’est pon seul’mint ch’qui les attind, ni tertous d’ailleurs. Ch’est un jour d’ù qu’in va découvrir des miots nouvieaux…

Qui n’a pon dit ou pinser un jour : Est-che que ch’est dins ch’dic’chionnaire ? Ouais, mes gins ! Ch’lundi i sort l’nouvielle verchion d’euch Larousse. On va découvrir tous ches miots et ches expréchions qu’in aura l’drot d’utilisser. Ch’est quind même eune drôl’te d’coïnchidinche que ch’est l’même jour, que l’début d’euch bac. In echpèr’te, donc, que ches correcteurs is in tiendront compte ! Pou les aider, in va churvoler quéques bieaux miots. Cha va éviter la remédiation forchée alors qu’is auront raison d’avoir utilissé ches miots. Ah, ouais ! Ch’est l’miot qui veut dir’te donner du soutien à ch’t’élève qui a du mau aveuc ches fondamentaux, com’ ch’lecture, l’calcul, etc..
Pou ches parints, i n’faudra pon oublier d’marquer ches slims aveuc des nominettes ! Bion l’slim, te sais ch’que sait et j’sus sûr’te qu’eune moninette auchi, mais chins l’savoir ! Ch’est l’tiote étiquette d’ù qu’te mets tin nom. Chouviens-te quind t’allos in colonies… Cor’ un aute. Par eximpe, adulescent. Ch’est l’contrac’chion d’adulte et adolescent. Cha ch’applique à des jonnes adultes qui ch’comportent com’ des adolescents. I y a fort à parier que ch’est un miot qu’in va imployer chouvint. J’cros même que, par extinchion, in va pouvoir l’appliquer à tout ch’monte politique, qué que sot leu âche. Pach’que, tous ches jours, is no prouv’tent qu’is sont toudis aveuc un comport’mint d’ado…
In va rechter dins ch’monte des jonnes adultes car i y in aura forchémint qui von’tent décohabiter ! Bah ! Chi te n’el savos pon cor’, ch’est eune nouvielle fachon d’dir’te qu’is cachent l’cordon ombilical pou voler d’leux propres ailes. Mais com’ in n’arrête pon ches miots, cha s’ra pochipe auchi d’el dir’te quind eune femme alle va quitter sin mari polygame. Bion, in France, in n’va pon avoir gramint l’occasion mais ch’est com’ toudis. L’chins i va chinger dins l’timps. Ainchi, dins quéques années, i y a fort à parier que cha va ch’dir’te d’eune femme qui part pach’qu’alle sait qu’sin mari i a des avintures. Pou illustrer, un eximpe : Anne Sinclair alle décohabite de DSK et, j’préchisse que cha n’est pon d’em faute chi ch’miot i comminche par décoha…
Ch’est pon tout cha, mais i faut que j’enquille ! Tiens, un v’là un d’miux pou dir’te enchaîner. In n’a cor’ gramint d’cosses à vir. J’ai casté ches nouvieaux arrivints. Pach’que, dins un dic’chionnaire, i y a auchi des gins célèpes. George Clooney, Barack Obama, Jean Rochefort, Sébastien Loeb, Martine Aubry. Quo ? Qu’est-che qu’i y a ? Te cros qu’j’ai fumé la moquette ? Nin, nin, nin ! Cha va faire l’buzz, mais Titine alle est bin dins ch’nouvielle édichion. Pourtint alle n’avot pon b’soin de pipolisation ! Comme que comme, ch’polémique alle va faire pschitt… Eune bielle formule pou dir’te que cha va faire long feu. Nin ! Je n’em sus pon gourée. Comme que comme, i faudra t’y faire, ch’est parel à d’toute fachon ou quo qu’i in sot… Bref, in arvient à Titine. Ca va chertain’mint li armonter ch’moral. Alle n’aura plus qu’à faire bouger les lignes. Bah, ch’est vrai ! I faut que j’te donn’te l’définichion. Cha veut dir’te que te vas intreprinte eune ac’chion pou marquer un ching’mint, général’mint politique. In dirot qu’cha a été invinté pou alle ! J’auros pu auchi dir’te que cha va com’ eune raquette à Richard Gasquet, qui sait auchi faire bouger ches lines. Mais ch’est vraimint à l’insu d’min plein gré que j’ai écrit cha !
Dins ches timps d’crisse, in connôt tous la financiarisation qui conchiste à faire eune politique basée su l’imprunt public. Mais pir’te que tout, mes gins ! Is ont osé l’écrir’te, in est in décroissance ! In vit dins un pays in pleine présidentialisation. Un miot pou echpliquer que l’présideint d’eune république i prind le d’chus su l’parl’mint. Mi, cha n’me rappell’te rin du tout… Heureuss’mint qu’i y a ch’te technologie pou qu’in pinse à aute cosse. Ch’est ches geeks qui von’tent ch’régaler. A eusses, l’Web 2.0, ches webtélés, ches webradios. Pis tout cha, même dins l’rue. In va tous dev’nir des mobinautes, même chi t’es en moto-taxi. In pourra ch’connecter à ches peer-to-peer mais i faudra faire gaffe à Hadopi. Alors te t’contint’ras d’el vidéo à la demande. Pis chi te postes su ches blogs, i faudra faire attinchion à n’pon écrir’te n’importé quo. Chinon te richques de t’faire blacklister ! Bah, i t’recht’ra ches réseaux sociaux d’ù qu’t’as tous tes amis virtuels… Mais ch’qui est bin, ch’est que, quéque fos, t’in rincontres un dins l’vraie vie. Alors i t’donn’te sin adresse ; cha ching’te d’sin IP ! Te pourras faire eune saucette ! Nin, nin, nin ! Ch’est pon d’el cuisine, cha veut dir’te que te rinds eune brèf’ visite. Cha ! Com’ t’es toudis surbooké, toudis au taquet, te n’as pon gramint d’timps ! 

Mes gins, j’in ai oublié gramint, te dos bin t’in douter. I parôt qu’i y in a chint chinquinte in tout ! J’vais terminer par un dernier, ch’est burn-out. Pis, ch’ti-lal i est gramint graf’ ! Ch’est l’syndrome d’épuis’mint proféchionnel caractérisé par eune fatigue physique et psychique intinche. Bah, j’peux d’jà dir’te que j’in connos chertains qui n’sont pon prêt d’in souffrir ! J’ai juss’ un argret. Dins tout ches tiots nouvieaux, i y in a un que j’n’ai pon treuvé : D’ù qu’ch’est qu’alle est pachée l’bielle bravitude d’sœur Ségo ? Cha s’ra p’t-ête pou l’édichion 2011…