Chalut mes gins ! Bah ! I ch’in est paché des cosses d’pis diminche ! Te n’treuves pon que t’vie alle est différinte ? Nin ? Commint cha ch’fait ? T’as raison su eune partie. Ch’est vrai qu’ches cons is sont toudis auchi cons et lal pou t’gâcher t’vie. I n’faut pon in t’nir compte. I y a forchémint un momint d’ù qu’cha va ch’artourner conte eusses et t’in s’ras infin débarrachés. Cha n’est pon d’philosophie que j’avos invie de t’parler. In peut dir’te qu’in est in train d’vife un boul’verch’mint… climatique. Eune grinte vague verte alle vient d’invahir ch’paysache français…

Mes gins, in n’a pus qu’à faire un cours d’colorimétrie, pach’qu’i y a des trucs qui m’simblent gramint bizarre. Te prinds, par eximpe, ch’fameux Dany. Dins ch’jeunèche, in l’app’lot Dany l’rouche et i étot plutôt du ginre des villes. In effet, i adorot faire des monts aveuc des pavés. Pis, inchuite, juer aveuc ches pavés com’ ch’i f’sot du bowling. In ch’étot bin aperchu, alors, qu’ches quilles alles étotent bleues ! A forche d’avoir vu ch’sape ind’chous d’ches pavés et d’intinte ches étudiants crier :  « Chous les pavés, l’plache ! Â» Cha a du l’rapprocher d’el nature. A’ch’t’heure, Dany i est vert. Ch’est pon pach’qu’i est colère ! Quoiqu’in n’puiche pon dir’te qu’i est vraimint d’un calme olympien dins toutes ches chirconstinches. Churtout quind i ch’artreuve d’vint du oranche, com’ min François. J’n’sais pon commint in peut dir’te pou un vert qui est vert. Pus vert que vert, cha fait toudis vert. Par conte, ch’guiffe, quind i est vert, alle vir’te à ch’rouche. In vient donc d’apprinte que ch’est réverchipe. L’rouche vir’te à ch’vert et ch’vert vir’te à ch’rouche…
Inchuite, te prinds ches rosses. Ch’est parel, d’pis diminche, is sont verts ! Is che sont pris eune claque dins l’guiffe et cha laiche des bleus. Quoique, des bleus ils in aient d’jà. Te prinds, par eximple min Eric Besson ou min Bee Kay, infin j’voulos dir’te Bernard Kouchner. Ch’est d’pis quéques mos des rosses qui ont viré à ch’bleu. A’ch’t’heure, Titine, l’nouvielle meilleu amie d’sÅ“ur Ségo, alle va d’voir faire un grind cop d’dépoussiérache d’sin parti. Cha fait jamais qu’un d’pus, puich’qu’in n’oublie pon qu’alle a fait du shampooinache aveuc ches éléphints, i y a un in ! Ichi, ch’est un grind raval’mint d’fachade. Nin, ti’z’aute ! T’es cor’ pus moqueux d’gins qu’mi ! Je n’parlos pon d’el guiffe d’Titine. Ch’étot eune métaphore. In clair, in va arpeindre ches grilles d’el rue Solferino, marron moche, in vert. Cha f’ra écolo, com’ cha ! Cha leu rappell’ra que, ch’is veul’tent avoir un écho chez ches adaptes d’Dany l’rouche-vert, i faudra « faire d’el prosse et parler vert »  Ju d’miots offert par l’mason, ch’est m’tournée ! Ch’est eune habitute à printe plutôt que d’toudis cacher du chuque su ch’bleu. Te peux traduir’te ch’bleu par Schtroumpf, ch’est ti qui vos. Mi, j’voulos dir’te ch’Ro d’France. Infin, in est quind même dins l’même concept. Ch’est toudis eune métaphore… Mi, j’attends aveuc impachienche que SÅ“ur Ségo alle fache un show écolo. Eune rosse, qui aime ches boubous bleus, lancher un VER-DI-TU-TE-AT-TI-TU-TE !
Inchuite, in va étudier un cas particulier. Ouais, j’sais bin, is in sont tous, in fin d’compte. Li, in a d’jà gramint d’mau à savoir d’ù qu’ch’est qu’i a fait ches étutes d’peinture. In effet, chi te t’peins eune fèche in bleu et l’aute in rosse, cha n’a jamais donné un trou d’euch cul oranche ! Marie Toutoule, te dérapes, ch’est pon bin ! Cor’ eune fos, ch’est juss’ eune métaphore, mes gins. Je n’sus pon assez intime pou savoir… A’ch’t’heure, te mélinches inviron quisse pou chint d’rosse aveuc quinsse pou chint d’vert. Bah, cha fait marron ! Tertous i l’a conchtaté. D’pis diminche, min François  i est vraimint marron ! Pou vir cha chous un aute inge. I est dev’nu vert quind i a vu Dany l’rouche qui étot dev’nu vert. Vert et rouche, cha fait toudis marron ! Ch’est pon Noël, mes gins, mais in sert quind même ches marrons et ch’est li l’dindon d’el farche… Pou parfaire m’démonchtrachion, in n’a pus qu’à écrir’te François by roux. Roux, ch’est bin eune sorte d’châtain, quind ch’est pon oranche com’ poil d’carotte. Et châtain, j’te l’donn’te in mille, ch’est marron !
V’là cor’ un aute qui est marron. Pourtint, i est rouche d’pis l’début. J’veux, bin intindu, parler d’euch facteur. Ch’est parel. Quéques jours avint, i ch’étot fait avoir par un rosse, déguisé in ouvreux. I in est dev’nu vert ! Li qui veut déclincher eune révoluchion, i a réuchi. Tous ches princhipes d’el colorimétrie is in sont tourneboulés. D’habitute, ch’est ch’rouche qui apparôt in premier. Ichi, ch’est pus vrai. Ch’bleu est prédominint. I dot ête contint qu’i y ait un peu d’rosse, correspondint à ch’rouche délavé. Ch’est quind même ch’vert qui a pointé sin nez. Quind in ch’appell’te Olivier, in ch’dot d’pinser à l’écologie et, churtout, à n’pon prôner ch’révoluchion. Ch’est un arpe d’paix ! I dot quind même ête vert qu’un oranche i est pus fort qu’li. Pourtint, cha paraissot logique. Un facteur rouche dins un utilitaire jaune d’el pochte, cha donn’te oranche !

Mes gins, l’politique alle no in fait vir d’toutes ches couleurs. A’ch’t’heure, l’Europe alle est pus bleue qu’hier, même ch’i y a eu eune pointe d’vert. Tout cha, ch’est vraimint un point d’détal. Vu d’l’espache, ch’Tierre alle s’ra toudis l’grinte bleue. Ch’qui prouve simpl’mint que l’écologie, l’vraie, alle n’a pon d’couleur…