Chalut mes gins ! Ch’est un ouiquen particulièr’mint rimpli, com’ je t’el disos d’pis quéques jours. Je n’voudros pon qu’à causse d’mi, te n’es pon l’timps d’aller voter diminche. Pire, cor’, que te n’es pon l’timps d’aller acater un cadeau pou t’mère. D’autint qu’j’avos auchi oublié que ch’est ches finales d’tennis, alors j’vais p’t-ête faire moins long qu’d’habitute…

Chi, ch’est pochipe ! Te peux compter ches caractères, j’vais in mette moins ! Bion, in arrête ches plaisint’ries, chinon cha s’ra cor’ pus long. J’sais bin qu’ch’étot l’jour l’pus long, mais quind même, i n’faut pon poucher. J’allos dir’te mémé dins ches picots, mais in sait qu’alle n’est pon v’nue à causse d’min Nicolas. Pis, ch’gazon i est tondu impeccape. Pon un picot à l’horizon. D’euch cop, in a eu l’drot à ch’Prince Charles à l’plache d’euch mère. Ch’qu’in peut dir’te ch’est qu’i étot assorti à ches autes. Bin ouais quo… Min Nicolas, des grintes orelles. Min Obama, des grintes orelles auchi. I n’minquot vraimint pus qu’li. Eune sorte d’club Mickey arvu et corrigé pou ches commémorachions. J’dos t’l’avouer, mes gins, j’ai longtimps hésité aveuc ches Daltons. Chi te ravises bin, cha va in déchindint. Obama, Charles, pis l’tiot. Seul’mint, min problème, ch’est qu’je n’voyos pon qui aurot pu ête Lucky Luke.
In a bin eu auchi Tom Hanks qui a débarqué lal. Bin, in rechte dins l’echprit du débarqu’mint. Mais j’pinse qu’i s’rot chertain’mint pus à l’aise dins l’rôle du soldat Ryan que dins ch’ti d’Lucky Luke. Pis, j’sais bin que j’sus moqueux d’gins mais ch’est quind même drôle que, dins ch’film, i débarqu’te à Ohama beach et lal i débarqu’te aveuc Obama. Inchuite, in a eu l’drot à l’Marseillaise. Ch’est normal mais j’n’sais pon chi t’as armarqué, min Nicolas i n’a pon canté. P’t-ête qu’i a oublié ches paroles. Ch’est nin d’euch faute ! Carlita alle li rabat ches orelles aveuc ches tubes mais alle n’a jamais pris l’timps d’li faire répéter ch’t’hymne. Pourtint cha aurot pu ête drôl’te :  « Allons enfants de la patrie-i-e, je suis ta tienne, je suis ta tienne ! »
Ches caméras alles l’ont même churpris in train d’faire eune grimache pindint qu’ches canteux d’eune chorale militaire is étotent in pleine ac’chion. In annonche un communiqué de ch’t’Elysée :  « Cha n’est pon pach’que cha cantot faux qu’min Nicolas i a fait eune grimache. I avot l’solel in pleine guiffe et i avot oublié d’printe ches Ray-Ban. » Fin d’euch communiqué. Après cha, in a eu l’drot à ch’t’hymne canadien. Pis, ch’célèpe hymne inglais : « God save the queen. » Just’mint, in rappell’te, pou ceusses qui arjoin’tent ch’reportache in cours, qu’cha n’est pon l’peine d’la quercher, alle n’est pon lal. Quind alle a appris qu’ch’étot l’débarqu’mint eune fos d’pus in Normandie, alle ch’est armisse à ch’tricot pou faire des gints et des écharpes pou ches soldats. Faut l’excusser, mes gins, alle est toute tourneboulée à causse d’un courrier qui n’est pon arrivé !
Pis, ch’étot l’tour à ch’t’hymne américain. Bah, ch’est pon l’peine d’essayer de l’canter. J’cros bin qu’i faut ête américain pou arrifer à monter auchi haut dins ches notes. P’t-ête, chi t’es com’ La Calas, te vas y arrifer ou alors, te viens d’te coincher ches dogts dins l’porte… Bref, après qu’chacun i a canté sin tube, j’sus rechté su m’faim. J’m’attindos à l’arrifée d’Laurence Ferrari et David Pujadas pou compter ches points. France one point, in a l’habitute, mais j’avos oublié qu’ch’étot du chérieux et pon ch’concours d’l’Eurovision ! In n’a donc vit’ été pris dins ch’discours d’min Nicolas. I a fait eune démonstrachion très technique su ch’récauff’mint climatique, même chi in che d’minde bin pouquo i a parlé d’cha dins un momint parel. Marie Toutoule alle a m’né sin inquête pou ti. A m’mote, ch’est à causse d’euch solel qui a eu pindint l’Marseillaise. Mi, j’in sus sûr’te ! I a pris un cop d’caud et auchitôt après, i ch’est dit que ch’étot l’bion momint !
Quéques blablas pus loin, après che Canadien et ch’t’Inglais, ch’étot à ch’tour d’min Obama d’printe l’parole. Mais li, pon un miot su ch’récauff’mint climatique. I faut croir’te qu’min Obama i dot ête climatisé. I n’a pon eu un cop d’caud, li ! Bion, pou faire oublier qu’ches Américains is sont quind même ches pus gros pollueurs d’el planète, i fait eune diverchion. Bah, ch’est nin dur’te pou li, ch’est un politique quind même ! Ch’est ch’que min Nicolas, nin pon ch’ti lal. J’voulos parler d’Nicolas Hulot. I appell’te cha séquinche émochion. Min Obama i va parler d’sin pépé qui étot un soldat US. In continue dins ch’te séquinche émochion par l’armisse d’ches médalles par min Nicolas à ches vétérans. Pou l’tiote info, même ch’i comminche à avoir d’el boutelle, l’Bonhomme Michelin i n’a toudis pon été décoré pou toudis ches mêmes raisons. I craint ches arvers d’médalle. Pis, ch’est un grind peureux, dès qu’i vot eune piqûre, i ch’dégonfle !

V’là mes gins ! T’as eu l’drot à eune minute d’silinche que j’n’ai pon réussi à mette par écrit. J’avos bin invie d’mette eune pache blinche intre ch’paragraphe préchédint et ch’ti chi, mais in aurot cru à un bug. Pir’te cor’, qu’el commichion d’chinsure alle étot pachée par ichi, su min chite. Alors, intre i ch’dégonfle et v’là, te dos compter jusqu’à choichinte. Pis, com’ ch’est che choichinte-chinquième, te peux in rajouter chinq d’pus, cha n’fait pon d’mau.
A’ch’t’heure, t’es fin prêt pou aller voter pou ches européennes. Zut ! J’viens d’em rinte compte qu’je n’in ai même pon parlé ! Ch’est bin ch’que j’pinsos, i y a bin trop d’trucs in même timps ch’ouiquen !