Chalut mes gins ! In ch’artreuve d’jà à ch’mitan d’el s’maine et in ch’apprête à avoir un ouiquen gramint chargé ! Te t’rinds compte, ti ! Nin seul’mint, ch’est l’fiête d’ches mères, mais in a auchi ches élec’chions européennes. Cha s’ra donc, pou ches mères qui ch’présintent su eune liste, eune doube fiête, chi alles sont élues. Dins l’même journée, alles von’tent ch’artreuver aveuc l’grille-pain dernier cri. Ch’ti qui cante in éjectint ches toasts et un mandat d’député européen. Aucun rapport, te m’diras. Ch’est vrai et j’doute même que, pou Rachida, alle sot vraimint continte qu’in li offre un grille-pain…

Pou terminer, ch’est auchi ches commémorachions d’euch débarqu’mint ! Bion d’accord, cha n’a pon vraimint d’inchidinche su t’vie. In va raviser cha à l’tévé. A moins que t’aies l’chince d’aller vir su plache ou d’archevoir tin carton d’invitachion ! Ch’est vrai, j’avos oublié… Par m’sure d’économie, in a gramint limité l’impréchion d’cartons d’invitachion. Cha partot d’un bion sintimint : «  In va préserver un arpe d’pus ! » qu’i a dit min Nicolas à toute sin équipe. Infin, mi, j’supposse que cha ch’est paché com’ cha ! Et v’là ! Elisabeth alle a été oubliée ! Cha n’impêqu’ra pon ches Inglais d’débarquer, ch’est sûr. D’autint qu’is connaiss’tent bin l’quemin. Mais laicher mémé à l’baraque, cha n’el fait nin ! D’autint qu’alle est la seu à avoir vécu ches évén’mints !
V’là commint, d’eune économie d’biout d’papier, in fait eune boulette. Pon in papier, cheule-lal, mais diplomatique ! Alors, i y a fort à parier qu’Elisabeth alle boude dins sin coin. Cha permet cor’ à tous ches tabloïdes inglais d’printe ches Français pou des babaches. D’toute fachon, cha n’ching’te rin. In n’a toudis eu des problèmes aveuc eusses. Pis, cha n’armonte pon à hier. Te n’as qu’à vir ch’qui ch’est paché aveuc Jeanne qui a fini in méchoui ! Ch’est sûr’te, ch’est pon ches inglais qui li ont mis l’fu, mais ch’est tout com’. Alle avot l’intinchion d’les mette déhors. In connôt l’histoire… Pis après l’phrasse célèpe d’euch Conte d’Anterroche qui disot à ches Inglais d’tirer ches premiers ! Cha ne ch’arrête pon lal. Pis, ch’est nin des moindres, pach’que j’n’connos pon grind monte qui n’l’a pon dit un jour. « Merde ! » Nin, ch’est pon à ti que j’el dis, mais ch’est cor’ à causse d’ches Inglais ! Tertous i sait qu’in dot cha à ch’Général Cambronne pindint Waterloo.
Tiens, parlons-in d’Waterloo. Nin ! Ch’est pon chez les ch’tis. Babache, va ! Te confonds aveuc Wattrelos. Te m’diras, te n’es pon l’seu à t’gourer. Même Sheila alle a fait l’mélinche quind alle est v’nue. Seul’mint, alle a eune excusse, alle n’est pon d’ichi. Pis, alle connôt churtout Venisse… Donc, in y arvient  à Waterloo. Te pinses à quo, ti’z’aute ? Ouais, ouais, ouais… Te t’imagines d’jà min Nicolas in costume lamé. D’accord ! Aveuc Carlita, cha fait un couple. A’ch’t’heure, te vos qui pou faire le s’cond ? Pach’que, jusqu’à preufe de ch’contraire, pou faire ABBA,  i faut in treuver un aute ! Ti, te souffres d’euch syndrome de Stockholm, pourtint te n’t’ais pon fait kidnapper. Te vos, ch’est cadieau ! Stockholm, ch’est in Suède… Te comprinds à’ch’t’heure l’ju d’miots ? Côté sochialiste, ch’est raté ! Eusses, ch’est l’batalle d’Solferino. Ch’est nin parel ! In a d’jà ches bruns, i faut treuver ches blonds. Titine, in oublie. Nin, je n’ai pon dit chouette, t’affabul’tes ! Sœur Ségo, parel. Quoqu’alle puiche toudis faire eune couleur, alle n’est pus à cha près ! Après l’boubou, in sait à’ch’t’heure qu’alle n’a peur d’rin. Pis, alle a un chertain chins d’euch phrasé décomposé. Alors pouquo pon un pon-pon-pi-dou à la Marilyn…. Bah, j’mélinche. Putôt un i do-i do- i do-i do à la ABBA…
Côté d’ches mecs, Benoît i est auchi brun et je n’el vos pon in blond. Nin, nin, nin ! DSK, trop poifre et chel, même chi li i a un avintache. I a d’jà sin support à guitare prêt dins tous ches cas. Marie Toutoule, ch’est pon bin de faire ches moqueux d’gins ! Mes gins, heureuss’mint qu’t’es lal pou m’armette su ch’bion qu’min. Bah, je n’vos pon d’blonds dins ch’visache politique français ! Chi, ch’est vrai. Min Jean-Marie et ch’file, Marine. J’cros bin qu’ch’est tout. Bah ! Aveuc un groupe parel, ch’est sûr’te, cha va ête Waterloo ! Pou n’pon dir’te : Mama mia, cha va faire des étinchelles ! Mi, j’auros même tindinche à dir’te : « Donn’te-me, donn’te-me, donn’te-me un verre, faut que j’m’armette ! » Mais in ch’éloign’te d’euch sujet…Napoléon i a dit : « Morne plaine ! » Ch’tiot empereur, qu’est min Nicolas, i risque d’el dir’te, mais arvu et corrigé pou ches commémorachions. Ginre : « Normandie, morne plache ! » Pach’que min Obama i n’est pon contint que l’reine alle n’a pon été invitée ! Alors ch’i rechte d’sin côté, i va avoir un grind vite autour d’min Nicolas ! Cha va ête raté pou l’photo qu’i veut faire. I voudrot bin mette un poster d’li aveuc Obama aud’chus d’sin lit. Tout cha, ch’est juss’ pou immerder Sœur Ségo et, chertain’mint auchi, Titine d’Lille. Je n’sais pon ch’i a prévu d’monter su un cube, pach’que cha va quind même faire eune différinche d’talle ! A moins d’faire un plan in plongé qui fait qu’min Nicolas i fache pus grind. L’problème ch’est qu’in n’a pon cor’ fait l’apparel photo qui dévoil’te l’ego. Chinon, in n’aurot pon b’soin d’trucache… 

Mes gins, j’ai bin peur que min Nicolas i ch’artreuve dins l’chituachion d’euch débarqu’mint. Com’ i a gramint d’gins qui n’appréchie pon ch’boulette ! D’autint qu’cha fait eune d’pus. In peut dir’te qu’i n’est pus dins ches tiots papiers d’gramint d’gins. Pou li, cha s’ra l’jour l’pus long…