Chalut mes gins ! Ch’est cor’ un long ouiquen. Infin, pon pou tertous. I y in a qui travalle ch’lundi, puich’que ch’est un jour assez particulier. I est férié pou chertains et pon pou d’autes. J’pourros faire appel à min célèpe duo Paul et Mike pou dir’te que j’ai bin peur que ch’est toudis ches mêmes qui sont in congés mais, après tout, mi, j’n’sus pon jalousse. Tint miux pou eusses ! Je n’sais pon chi t’es com’ mi mais j’n’sus pon très motivée pou parler d’ches élec’chions européennes. D’ailleurs, j’em d’mind’te même chi ches politiques is sont vraimint motivés, eusses-mêmes, ch’t’année ! Alors, in ira voter par habitute, j’pinse, pus que par devoir car j’ai l’nette impréchion que gramint d’gins ch’diss’tent que, d’toute fachon, cha n’va pon chinger not’ quotidien. Ch’est pourtint cha qui f’rot toute l’différinche…

L’aute évén’mint, ch’est l’démarrache d’el tournée d’adiux d’Johnny Hallyday. Alors, in a querre ou pon mais in n’peut pon rechter indifférint à un phénomène parel. Te parl’tes ti ! Prechque chinquinte ins d’carrière et toudis à déchaîner ches foules d’el même fachon. Cha donn’te d’quo rêfer à tous ches canteux in herpe qu’in propulse vedette d’euch jour à ch’lend’main et qui, bin chouvint, n’fon’tent qu’pacher. Ch’est parel aveuc ches politiques. J’in connos eune flopée qui aurot querre à déchaîner ches foules d’el même manière. Te t’imagin’tes chi ches sœurs jumelles alles aurotent fait che stade d’France com’ Johnny ? D’ailleurs, i n’y a pon qu’alles ! Te prinds, par eximpe, Rachida. Alle auchi, alle aurot pu faire ch’stade d’France. In pus, tertous i sait que même ches comiques is arrif’tent à l’rimplir ! Prinds Jean-Marie, par eximpe. Nin, pon Le Pen, mais Bigard. I n’faut quind même pon confonte tous ches comiques ! Bin, i a auchi rimpli che stade com’ Johnny…
Ch’est vrai. A ch’début, j’dis qu’je n’vais pon parler d’ches politiques à’ch’t’heure, et cha y est ! Me v’là partie d’dins, tiête baichée ! Alors, qu’in fait, j’voulos t’parler d’un aute phénomène. Pou eune fos, in va aller vir su eune île ; chez ches Inglais. Bah, ouais ! Com’ gramint d’gins à travers ch’monte, j’sus quée chous l’charme d’eune vox. Ch’est sûr’te, alle n’est pon bielle. Du moins, l’bieauté stéréotypée qu’in vot habituell’mint dins ches magazines. Mais alors ! Dès qu’alle comminche à canter, t’as l’impréchion que ch’monte i fait eune pausse dins toutes ches absurdités ! Bin intindu, j’veux parler de Susan Boyle. Alors, j’sus gramint triss’ qu’alle n’ait pon gagné ch’concours et qu’ches téléchpectateurs inglais is ont préféré un groupe, au demeurint chpectaculaire, mais qui n’f’ra chertain’mint pon eune carrière. Infin, chi ches Inglais is avotent un brin d’goût, cha ch’saurot d’pis long !
In attindint, che sont eusses qui ont gagné qui von’tent impoquer ches chint mille Livres. In pus, is auront l’drot à faire leu numéro d’vint l’Reine. Vingt dius ! J’espèr’te que lorch’qu’alle va les raviser, ch’trinsformint in eune espèce d’insecte géint, alle n’va pon faire eune crisse… D’jà qu’alle est un peu patraque pach’que min Nicolas i n’l’a pon invité à ches commémorachions d’euch débarqu’mint ! Toudis i est que l’pauf’ Susan alle a fini deussième. Ch’est quind même eune bielle victoire. D’jà pou rinte hommache à sin talint. Auchi pach’que, pou eune fos, t’as l’impréchion qu’i n’faut pon ête sorti tout drot d’un magazine d’mote, pou avoir eune chince d’ête arconnu pou ch’qu’in est ! In effet, chi in prind ches émichions, qu’in arnomm’te télé-crochets, in pourrot bin che d’minder chi in a eune chince d’gagner chi in n’arsimpe pon à un top model !
Te connos chertain’mint un vieil adage qui dit que l’talint i n’attind pon l’nompe d’ches années. Aveuc Susan Boyle, i faudra arvir cha et dir’te que, même chi ch’talint i est infoui  pindint des années, un jour ou l’aute,  i sort et i jaillit tel un diape d’euch boîte ! Et ch’jour i est arrifé, première ou pon ! Forche est d’constater que ch’est alle l’grinte gagninte. Sin nom i a d’jà fait l’tour d’euch monte. Même chi, à ch’départ, sin physique i amorchot des sourir’tes quind alle arrivot su schène. A’ch’theure, ch’est d’l’admirachion pur’te !

V’là, mes gins ! Cha m’tenot à cœur d’faire eune parinthèsse dins tous ches délires que j’fais habituell’mint et que j’sais que t’as querre à cha. Tous ches mails que j’arçois is me l’prouv’tent tous ches jours. A’ch’t’heure, juss’ un momint d’talint brut, dins in monte d’brutes. Voichi, Susan Boyle…