Chalut mes gins ! Je l’avos bin dit ch’ouiquen, i étot timps qu’cha ch’réveille. Bah, ch’cros qu’cha comminche tout douch’mint ! Te sais, un peu com’ chi ch’étot un viux taco et qu’cha n’démarr’te pon à ch’quart d’tour. Mais ch’qu’i y a d’bin, chez ches politiques, ch’est qu’ch’est toudis ches mêmes qui fon’tent parler d’eusses ches premiers. Infin, j’auros plutôt dû écrir’te, ches premières…

Mesdames et messieurs, voichi, et p’t-ête cor’ pou quéques arprésintachions, Titine d’Lille et Sœur Ségo dins : « Ches demoiselles d’Rézé ! » qui, com’ tertous i l’sait, à’ch’t’heure, ch’treuve in Loire-Atlantique. Eune nouvielle verchion d’ches demoiselles d’Rochefort, puich’qu’in annonche qu’el hache d’guerre alle est interrée. J’vais quind même chiter eune formule d’min bieau Benoît Hamon qui m’plait bin. L’formule, mes gins, quoqu’in n’puiche pon dir’te que ch’bieau Benoît i m’laiche indifférinte… I a dit, à propos d’ches sœurs ennemies d’hier ch’que j’ai utilissé in tite : « Back to normalitute ! » Alles fon’tent causse commune. L’première fos qu’alles ch’artreuv’tent d’pis ch’fameux congrès d’Reims !
Alors, ch’est vrai auchi, qu’ches mauviaisses lingues alles diss’tent qu’i s’agit d’un mariache forché pou mette toutes ches chinces d’leu côté. Pis, in t’explique qu’ches préparatifs is ont été faits par leu intourache rechpectif, chins qu’alles n’che soient parlées, ni même vues pou mette ches détals au point. Cha n’impêque rin, ch’est vrai, même pon ches tiotes phrasses. Alles von’tent bon train. Ainchi, in apprind, à propos d’el réunion qu’i a eu avint, pou parler d’el crisse d’euch lait, qu’un proche d’Titine d’Lille a déclaré, à un producteur d’là-bas : « In a tout vérifié au micron près. Même qu’i n’y ait pon eune vaque, dins l’lot, qui ch’appell’te Ségolène… »
Cha n’va nin, mes gins ! Chi, même ches organisateurs is ch’mettent à faire d’l’humour, quo qui va m’rechter à mi’z’aute ? J’n’auros pus qu’à faire d’el politique, quelle barbe ! J’m’attindos à eune bionne dosse d’excusses d’el part d’sœur Ségo. Du style : « Je m’excusse au nom d’euch parti, pou toutes ches bêtisses qu’is peuv’tent dir’te pach’qu’is ont peur que j’fache d’l’ompe à ch’te moule-frites. Cha n’est pon v’nu. I faut croir’te que cha n’li a pon possé d’problème que, d’eune fachon indirecte, in la compar’te à eune vaque. Meuh nin ! Cor’ heureux, pou ch’te paix rosse bonbon, qu’alle ne ch’appell’te pon Marguerite ! Bref, ch’est l’calme plat in churfache. I faut quind même faire attinchion à ches lames d’fond. In effet, un des négociateurs i a cru bion préchiser : « In n’va pon jusqu’à organisser eune baisse ou déterminer l’couleur d’ches rosses, ni l’longueur d’ches épines. In n’in est pon lal… »
Ch’est bin dommache, mes gins, i n’ch’est rin paché ! Mi, j’avos d’jà vu l’schène finale dins un rêfe. Ouais, ch’est vrai ! Te dos avoir raison. Ségo et Titine dins un même rêfe, cha ch’apparinte pus à un cauch’mar. Infin, ch’est ti qui vos. Toudis i est que v’là commint j’avos vu ches artrouvailles : Ségo alle offrot eune rosse fraîque à Titine. Tout drot sortie d’euch chimpe frode. Pardon, j’voulos dir’te sin frigidaire. Alle n’est pon cor’ montée in grate. Titine, dins un même geste, f’sot l’même cosse à sin ex sœur ennemie. Infin, ch’est tout à fait pochipe qu’alle pinse qu’l’aute alle ch’piqu’rot à eune épine. Pis, in aurot assisté à eune bielle accolate. Inlachées l’eune à l’aute, alles n’aurotent pon pu ch’impêquer d’fonte in larme. Un biel élan de FRA-TER-NI-TE. Dins l’salle, i aurot régné eune imbianche particulière. Tertous aurot égal’mint eu gramint d’mau à art’nir ches émochions. Pis, aveuc sin expérienche d’el schène, Ségo aurot alors intamé un hymne à l’attinchion d’tous ches camarates d’euch parti. Auchitôt, in aurot vu ches gins brindir ches briquets quind ch’t’arfrain che s’rot fait intinte : « Che s’ra nous dès demain. Che s’ra nous pus che nain. Pou que l’parti, qu’in saura che donner, nous donn’te l’invie d’régner. Che s’ra nous dès che soir. A nous d’printe che pouvoir. Faire que che nain, qui n’veut pon che barrer, in li ferm’te sin caquet… »
Mes gins, i n’y a pon à dir’te, ch’est vraimint un cant révoluchionnair’te. Mais ches élec’chions Européennes, pou alles, ch’est auchi un prétexte pou mette eune claque aux tiotes mauvaisses odeurs, com’ alle disot eune pub ! Pis, com’ i faut bin dir’te que l’politique, cha d’vient vraimint un chpectaque, com’ à ches Etats Unis, j’voyos bin eune arprisse d’eune aute comédie musicale. J’l’ai dit à ch’début : « Nous sommes deusse sœurs jumelles, vivint rue de Solferino. Mi fa sol la mi ré. Ré mi fa sol sol sol ré do. Pus vraimint des demoiselles, dont l’eune collec’chionn’te ches frigos. Mi fa sol la mi ré. Ré mi fa sol sol sol ré do. » Forchémint, in peut ête sûr’te que ch’te salle alle in aurot d’mindé cor’ pus…
Te parl’tes ti ! Alors, com’ i y avot eu ch’te pré-réunion qui parlot d’euch prix d’euch lait, alles n’aurotent pon pu faire aut’mint que d’arprinte eune canchon célèpe d’ches années choichinte. Ch’est très repétitif, un peu com’ ch’qu’alles ont à dir’te, in fin d’compte, mais cha ch’artient chins problème : « Ladies ladies lait. Ladies ladies ladies lait. Ladies ladies ladies lait. In combat pou ch’cour d’euch lait. Ladies ladies lait. Ladies ladies ladies lait. Ladies ladies ladies lait. Marr’te d’ête pris pou des vaques à lait. L’grinte distri alle ne jue pon l’ju d’ches prix. Alors in va faire du bruit. Pou que ches agris, is ont meilleu prix… »

V’là, mes gins ! In n’sait pon chi cha s’ra vraimint l’fin d’eune rivalité. Pach’que, chous eune apparinte harmonie, i va quind même ch’poser un vrai problème. Ch’est Titine qui est l’chef et Ségo alle veut qu’in li donn’te un peu d’importinche dins ch’parti. Alors, te cros qu’i est pochipe qu’alle fache bureau commun ? Que dins un av’nir proche alles soi’tent copain com’ cochon ou plutôt cul et quemise ? Qui f’ra l’quemise ? Ches pronostiques is sont ouverts, mes gins. J’attinds tin éclairache…