Chalut mes gins ! Cha y est ! i faut ch’attinte à artreuver des s’maines normales à’ch’t’heure, et ch’est tint miux. J’n’sais pon pou ti, mais j’finissos par n’pu savoir quel jour in est. Alors, j’espèr’te que tout ch’timps lipe, cha t’a permis de t’arquinquer et t’as bin eu raison. A m’mote, com’ tout i a été à ch’ralinti, cha va ch’réveiller dur’te et in n’a pon fini d’avoir des trucs à ch’raconter. Infin pou faire ches moqueux d’gins, j’espèr’te gramint, j’implore, même, ches politiques qu’is arcomminch’tent à faire ches clowns…

Com’ j’te l’disos à l’instint, tout i simble avoir été à ch’ralinti. I flottot com’ eune douce caleur. Ches premières vraies caleurs qui fon’tent que l’vie alle simpe pacher paisiblemint. Eune sorte d’pausse dins toutes ches querelles et ches guéguerres habituelles. Un grind momint d’calme avint eune timpète qu’in n’a pon invie d’vir d’chi tôt ! Ch’est auchi l’timps d’ù qu’in veut ch’montrer chous un meilleux jour. Un timps d’ù qu’in est amoureux. Ô ma Carlita adorée, com’ j’ai querre à ti, te l’sais bin. Quo ? Te pinsos com’ cha que j’allos t’faire un roman d’chez Arlequin pach’que j’comminchos min récit com’ eusses ? Après tout, pouquo pon ! Dins tous ches romans d’gare, cha finit toudis bin, alors cha donn’te invie…

Min Nicolas et Carlita étotent su l’terrache de ch’t’Elysée. L’solel i brillot d’tout sin splendeur. Nicolas étot allongé su eune caïlle longue. Eune paire d’leunette d’solel su l’guiffe, i sirotot l’cocktail que Carlita alle li avoit fait. L’mini ombrelle su l’verre alle li entrot dins ches narines chaque fos qui avalot eune gorgée, mais cha n’el f’sot même pon râler. I étot heureux. Heureux d’pacher un bion momint d’farniente. A ches côtés, Carlita étot in train d’parfaire sin bronzage, tindis qu’ches deusse toutous avotent chosi l’seul indrot d’ù qu’i y avot un tiot peu d’ompe. Ch’timps i simblot ch’ête arrêter. Un grind silinche i régnot seul’mint troublé par l’cant quéques biêtes à z’ailes. Eune parinthèse d’l’auteur : I s’agit bin intindu d’ojieaux, com’ te peut t’in douter. Dins ches romans, i a querre à ches métaphores. Biuon, j’arprind ch’court d’l’histoire. In intindot que l’glou-glou qu’el paille d’min Nicolas alle f’sot chaque fos qui avalot eune gorgée et ches cui-cui, quind, d’un seul cop, l’Marseillaise alle ch’mit à artentir. Ch’étot l’sonn’rie d’euch BlueBerry présidinchiel.

-         Allô ? qui dit min Nicolas in décrocchint sin bazar électronique.

-         Min Nicolas, ichi, ch’est Ségo. J’m’excusse de t’déringer. (Note d’l’auteur : in ne ch’arfait pon !) J’auros querre à savoir chi te s’rot tinté par eune choirée barbeuque d’main choir. J’ai invité quéques amis et j’auros querre à ch’que te vienn’tes aveuc Carlita.

-         Mais i n’y a pon d’problème, ma Ségolinette. Ch’est mi qui vais apporter ches boissons. Quo qu’il y aura tout com’ monte ?

-         Te sais, min Nicolas, in fait cha in tiot comité. I y aura min ami inconnu qu’tertous i connos à cosse d’Paris Match. Min Dominique chins qui je ne s’rot pon ch’que sus à’ch’t’heure. Pis toute eune binde. Te verras, in va bin ch’amuser !

-         Ouais, j’n’in doute pon mais j’auros querre à savoir chi l’Titine d’Lille alle est lal auchi !

-         Pouquo ?

-         Bin, cha ching’te tout su ch’nompe d’boutelles à apporter !

L’lind’main choir, l’fiête alle battot sin plein. Tertous i étot à ch’tour d’el pischine d’Ségo. Pou l’plupart, un verre à l’main. I fleurot bion l’sintimint d’viante grillée. Dins un coin i pouvot vir DSK in pleine conversachion aveuc eune nouvielle ch’crétaire. In aurot cru un grind acteur et ch’groupie tant, cheule-chi, alle simplot boir’te ches paroles. Quemise hawaïenne su un patalon blinc, i simblot sortir tout drot d’euch film aveuc George. I d’vot chertain’mint li parler d’sin instrumint d’traval… What else ? Enchuite in treuvot ch’facteur, perdu sin ch’bourriche à lettes. Li, i étot toudis in train d’raviser ch’i n’y avot pon d’caméras. Te parl’tes, ti. D’pis qu’i ch’étot fait piéger par un faux ouvreux qui étot, in fait, un copain d’Titine, i ress’ su ches gartes. Mais cha avot été pus fort qu’li, i n’avot pon pu ch’impêcher de v’nir quind même.

In blousse blinche, in aurot pu croir’te qu’alle avot pris ch’soirée pou un bal déguissé, mais nin ! Roselyne alle étot toudis prête à montrer l’eximpe in cas d’urginche. Toudis su l’brèche, alle che s’rot dit que, pindint ches soirées, cha arrosot dur’te et qu’i y aurot chertain’mint d’el viante carvée. Pis i y in avot quéqu’un d’ù qu’alle li aurot bin fait du bouque à bouque. D’ailleurs, ch’étot gramint dur’te d’l’approcher. I n’arrêtot pon d’faire l’zazou su l’plongeoir. Tout poil déhors, ch’torse gonflé, i f’sot hurler ches files.

-         Ravise-me ch’bieau gosse qui fait l’kakou, ma Carlita. I n’y in a qu’pou li !

-         Ch’est vrai min amoureux, mais ch’est ti l’pus bieau, te sais.

-         Ouais ! Alors pouquo ch’est pon mi qui sus su ch’plongeoir ?

-         Ch’est de t’faute ! J’t’avos bin dit qu’i fallot printe tin slip d’bain.

Pindint ch’timps-lal, Titine d’Lille alle est toudis in train d’mette l’main à l’pâte et aider Ségo à cuir’te ches morcieaux d’viante.

-         Alors, te t’amusses bin Titine ?

-         Ouais mais j’ai gramint caud !

-         Chi te veux, te peux aller faire trimpette aveuc ch’bieau gosse. Mi, j’assur’te ch’serviche !

-         Nin ! J’ai querre à faire ch’barbeuque aveuc ti. Pis, i y a eune bionne imbianche. In ch’croirot à l’Brad’rie d’Lille. I minque pus qu’ches moules et ches frites !

-         Bah, j’ai pon d’moules, mais j’ai des frites dins min frigidaire. In peut toudis les faire !

-         Nin ! J’disos cha pou rigoler. Te m’laiches juss’ aller boir’te eune ou deusse cannettes. Après, j’vais leu canter ches Capenoulles. Te verras, ch’est festif. Cha va armonder ch’t’imbianche com’ pou rir’te !

Un peu à l’écart de tout ch’bieau monte, min Nicolas i a un regard lointain, com’ ch’i étot in train d’pinser à qué cosse. Carlita, toudis auchi attintif à li, alle s’in aperchue auchitôt.

-         Quo qu’i y a, min amoureux ? In dirot qu’te n’es pus aveuc nous…

-         Hein ? disot ch’ti chi com’ chi in l’avot réveillé in chursaut.

-         A quo qu’te pinses, min amoureux ?

-         J’étot in train imaginé un truc drôl’te ! Ch’est in rasivant, ch’Benoit in train d’faire l’paon dins cheule pischine et toutes ches files. J’sus in train d’em rinte compte qu’i y a presque tous ches amis du PS dins l’flotte et que nou’z’aute, à ch’t’UMP in est tertous in train d’les raviser. I n’minque pus qu’à mette l’Ségo et l’Titine lad’dins pou vir réell’mint chi ch’parti i prind l’ieau !

-         T’es vraimint un comique, min amoureux. Te n’peux pon ête chérieux chinq minutes !

-         Chérieux ? Mais, ma Carlita, ch’est pon mi qui ai comminché ! Tout cha ch’est d’el faute à Marie Toutoule. Alle n’a rin treuvé miux que d’mette tous ches chochialistes à l’flotte pou écrir’te sin artique qui comminche com’ un roman à l’ieau d’rosse. Te vos, Ches chochialistes à l’flotte, ch’est cha l’ieau d’rosse !

Quo qu’i ch’est paché, mes gins ? J’cros bin que j’em sus indormie chous l’solel et qu’j’ai pris un cop su m’guiffe ! Quo qu’j’ai pu t’raconter com’ bêtisses… Bah, v’là ! Ch’i ch’étot paché des trucs, je n’auros pon fait l’chieste et cha ne s’rot pon arrifé ! Vraimint, tertous copain com’ cochon à un barbeuque, ch’est carrémint d’el scienche fic’chion, nin un roman à l’ieau d’rosse…