Chalut mes gins ! Quo qui ch’pach’te in ch’momint ? V’là eune quechtion que j’em posse ! J’ai l’impréchion qu’i n’che pach’te rin just’mint. Ches politiques is n’fon’tent pon gramint parler d’eusses, pourtint ches Européennes alles arrif’tent. D’pis qu’in a annonché à tertous ch’miot qui fait peur, réchession, i plan’te un grind silinche médiatique. In t’armonte ch’moral aveuc ch’festival d’Cannes et aveuc ch’t’Eurovision…

Pardon, mes gins ! J’n’voulos pon armuer ch’coutieau dins l’plaie. J’avos oublié que ch’t’Eurovision n’a pon été vraimint à not’ avintache. L’canchon gagninte alle s’appell’te « Fairytale », ch’est à dir’te « conte d’fée », ch’est l’cas pou sin interprète. Pou l’France, cha tient pus d’eune nuit d’cauch’mar ! Te parl’tes ti ! In ch’artreuve aveuc l’seu canchon qui donnot invie d’braire. Com’ chi in n’avot pon assez d’raisons pou cha ! Alors, mes gins, cha n’a rin à vir aveuc Patricia Kaas et sin imminche talint. Ch’canchon alle est bielle, in n’va pon arv’nir lad’chus. Ch’est juss’ l’stratégie pou gagner que j’voudros armette in cosse. Ch’est chertain’mint cha qui m’a fait rêfer d’un truc incroyape ! J’étos arv’nue in arrière, quind in f’sot cor’ des préchélec’chions, pou savoir qui ch’est qui allot no arprésinter à ch’concours. Seul’mint, mes cindidats is étotent connus pou aute cosse. I faut que j’te raconte cha…
Mesdames, messieurs, ch’cindidate numéro un est eune véritape Show Girl. Alle a l’habitute d’el schène. In va li treuver un nom car alle n’peut pon ch’présinter à ch’t’Eurovision aveuc ch’ti habituel. J’ai treuvé ch’Zénith com’ point commun et l’fin d’euch prénom. J’auros pu quercher compliqué, cha aurot été coton à art’nir, tindis qu’lal… Par conte, i faut vaqu’mint faire gaffe dins l’chox d’el canchon, chi in n’veut pon qu’ches gins is ch’suicid’tent avint l’fin. Voichi donc, Ségolène Farmer qui va no interpréter eune chachon inspirée de « Appelle min numéro ». Ouais, ch’est toudis parel. In n’peut pon dir’te qu’ches idées alles sont innovintes. Ch’est toudis cheules d’ches autes armisses à ch’sauce. Du récauffé sorti tout drot d’sin frigidaire. « J’fais min grind numéro, des excusses à gogo. J’fais min grind numéro,  j’voudros li faire la pieau. J’fais min grind numéro, pou faire l’Une des journaux. Ni trop sache. Ni trop sinche. Juss’ che qu’i me faut…» T’artiens, mes gins, te d’vras taper un pou voter pou alle.
In continue ches préchélec’chions aveuc un duo. Nicolas et Carlita. In aurot pu faire une contrac’chion et app’ler ch’duo Nicol et Ta. D’autint qu’Nico i a eune réputachion. Is aurotent pu arprinte l’canchon « Fermons l’feniêtre et laichons ches volets clos ». Sauf qu’à ch’t’Elisée, i n’y a pon d’volets ! Millard ! I n’y a pus qu’à leu treuver aute cosse. I faut qu’cha sonn’te vraimint franchouillard. Eune mélodie légère qu’in va avoir auchitôt in tiête. Pis, i faut qu’cha sot à leu imache. Ch’est à dir’te, toudis in train d’voyager. Un couple, un voyage… Cha y est, j’ai treuvé ! Qu’est-che que te pinses d’cha : « In n’a pon été à Venisse. Ch’est chertain’mint eune méprisse. T’as pus qu’à arfaire ches valisses. In est chi bin. Oublie che solel d’euch Mexique. Che ranch qui est aux amériques. Fais me ta canchon in musique. Et prinds ma main… » Mes gins, in les applaudit bin fort. In chouhaite quind même qu’leu gondole alle n’prenn’te pon l’ieau. D’ailleurs, ch’est chertain’mint pou cha qu’li i préfèr’te un yacht. Ch’est pus chtabe ! Pou voter pou eusses, te tap’tes deusse. Cha quée bin, ch’est un duo !
In acceulle à’ch’t’heure l’numéro tros. Misse à part ch’coiffure, j’ai auchitôt pinsé à Mireille Mathieu in la ravisant. Cha dot ête à cosse d’el talle, mais aussi ches ropes d’ù qu’in n’sait pon d’ù qu’alles sortent. Un grind couturier, te m’diras. Ouais, chertain’mint. Un couturier qui a oublié d’mette ches leunettes, alors ! Bref, elle n’dinche pon su ch’pont d’Avignon, alle. Cha s’rot pus su ch’pont aud’chus d’el Deûle. Chi te cros que ch’est moins pittoresque, ch’est pach’que te n’connos pon ches viux ponts d’l’Esplanade ! Infin, in n’est pon ichi pou faire l’visite guidée d’Lille. Alle auchi alle arprind eune canchon qui est, alle-même, eune arprisse d’Abba. T’armarqu’ras que j’auros pu écrir’te « abat » étant donné que, ch’princhipale préoccupachion, ch’est d’abattre ch’Ro d’France. Ichi, alle fait un hommache à ch’rivale ; infin prech’que ! Ségolène Farmer alle aurot pu li dir’te « Bravo tu as gagné » mais Martine alle a pris ches d’vints et li cante : « Ch’est mi qui a gagné et ti, t’as tout perdu. La plache, j’te l’ai piquée, ch’est mi qu’is ont élu. Rue Solferino, i n’y avot qu’eune plache libe. Pon d’plache pou l’frigidaire, de l’ex d’l’ex checrétaire. Ch’est mi qui a gagné et ti, t’as tout perdu… » Te n’oublies pon, ch’est tros qu’i faut taper chi te votes pou alle…
In arrife à ch’quatrième. Ch’est un joyeux drille. Du moins, in in a l’impréchion quind in l’vot. I est toudis prêt aveuc sin marteau, cha n’est pourtint pon un communiste. Nin ! I aurot pu faire une nouvielle verchion de « chi j’avos un marteau » mais cha n’est pon eune ferme qu’i a l’prétinchion d’bâtir ! Alors, ch’est toudis parel, i faut eune canchon qu’in a vit’ in tiête pou qu’ches pays is no donn’tent ch’fameux dousse qui no fait tint défaut. Je n’sais pon pouquo, mais j’el vos bin dins eune arprisse d’eune canchon à boire. Voichi donc Jean-Louis qui no cante cha pachion pou ches baraques : « Allez viens vir ma baraque, oh com’ ch’est bieau. Ch’est pon quer, i t’faudra juss’ chint mille euros. Chi l’binquier i t’prête l’argint, ch’est sin boulot. Dins vingt-chinq ins, t’auras ches ruines, garinti par Borloo ! Pou qu’tertous i d’vienn’te propriétaire. Pis ch’est toudis mieux qu’ête locataire. Mais pou cha, cha n’est pon un mychtère. I faut construire, pou s’in sortir, et bin sûr’te pou pon quer ! Allez viens vir ma baraque, oh com’ ch’est bieau… » Bah, cha donn’te invie, mes gins ! Chi te veux voter pou li, ch’est quate…
In arrife à’ch’t’heure à ch’dernier finaliste d’ches préchélec’chions. François, ch’est sin nom, i est quéqu’un d’dich’cret mais cha n’impêque pon qu’i occup’te eune plache importinte. I observ’te toudis quo qu’i ch’pach’te à drote et à gauche. Ch’est vrai auchi qu’i ch’prind des claques qui vienn’tent d’drote et auchi d’gauche. Parel aveuc ch’cote d’popularité. Alle monte, alle déchind. Ch’est pou cha qu’i va canter : « Cha s’in va, pis cha arvient. Mais j’sus lal pou mette min grain. Cha ch’invol’te, cha dégringol’te, cha virevolte, ch’est la révolte, mais je n’sus pon impopulaire. MoDem ch’est min savoir-faire. Faudrot que j’pache chez Drucker. Pou echpliquer qu’ch’est l’av’nir. Que je n’sus pon un chouvenir. Que j’fais min qu’min chins in avoir l’air. Que je n’crains pon ches idées rétros d’el rue Solferino. Que j’sais mette auchi ches pids dins l’plat, quind cha n’va nin chez Nicolas. Cha s’in va, pis cha arvient. Mais j’sus lal pou mette min grain. Cha ch’invol’te, cha dégringol’te, cha virevolte, ch’est la révolte, mais je n’sus pon impopulaire.» Mes gins, chi cha prestachion alle t’a convaincu, te tap’tes chinq…

Te comprinds à’ch’t’heure pouquo j’t’ai dit que ch’étot incroyape com’ rêfe ! Alors, j’n’sus pon sûr’te qu’cha no aurot fait gagner ch’concours. P’t-ête que ch’t’idée alle est à creuser. Après tout, ichi, in a eune Première Dame canteusse. In Italie, Sylvio i a d’jà sorti deusse albums. In pourrot étinte cha à tous ches pays. Is s’ront p’t-ête pus convaincants que dins leu rôle habituel ! Pis, aveuc ches Européennes qui arrif’tent, ch’concours i est tout treuvé, exchepté qu’cha fait gramint d’arprésintints par pays !