Chalut mes gins ! Commint qu’ch’est qu’cha va ? Quate jours chins mi et te t’innuies d’jà… Ch’est vrai auchi, chins fausse modestie, qu’à part mi pou t’faire rigoler, i n’y a pon vraimint d’sujets d’actualité qui prêtent à rir’te. Te croyos qu’j’avos dichparu corps et âme dins ches méindres d’el toile. Bin, nin ! J’sus toudis lal ! T’as ches zygomatiques qui ont dû rouiller. In va essayer d’rattraper ch’timps perdu. Just’mint, à propos d’toile, je n’sais pon chi ch’est à cosse d’cha, mais j’ai gramint rêfé d’euch festival d’Cannes. Bion, j’avoue qu’el vidéo d’l’aute jour m’est chertain’mint montée à ch’cerveau. Qu’est-che qu’te veux, j’ai bin l’drot d’em printe pou eune vedette. Pis, i faut qu’te l’saches, mes gins. Mi, auchi, j’ai monté ches marches…

Bion, d’accord… Ch’étot pou aller m’couquer. In tout cas, dès qu’j’ai eu ches zis fermés, j’étos bin su l’bion escalier. A’ch’t’heure, l’tout est que j’n’attrap’te pon l’grosse tiête ! Toudis i est qu’cha ch’est mélingé grafe dins ches neurones et qu’min festival d’Cannes i est gramint différint d’el réalité. J’em sus artreuvée dins un mix intre ch’monte politique, ches strass et ches paillettes. Bref, pou résumer, cha a fait bling-bling dins mes neurones. In tout cas, min film d’ouverture, ch’étot pon un film d’animachion, com’ à Cannes, mais i y avot auchi d’l’animachion ! Cha ch’appell’te :  L’Révoluchion Françaisse, l’artour. L’histoire alle comminche un premier mai, peu avint ches élec’chions européennes. Titine d’Lille alle est armontée com’ in quatorse pou défiler dins ches rues aveuc tertous. In intind d’jà eune canchon arvindicative in guisse d’générique d’début : «  Ah ! Cha n’va nin ! Cha n’va nin ! Cha n’va nin ! Y’en a marre d’ches réformes qui no min’tent. Ah ! Cha n’va nin ! Cha n’va nin ! Cha n’va nin ! Ch’est min Nicolas qui fout tout ch’brin. »
Sin rôle, dins ch’film, est d’rinvercher ch’Ro d’France. Pou cha, alle va même faire du copinache aveuc ch’grinte rivale. Dins un flash-back, in apprind que, ch’te rivalité aveuc Sœur Ségo alle date d’el batalle d’Solferino. Te parl’tes chi cha n’est pon d’hier ! D’ailleurs, dins ch’vraie vie, ches deusse actriches alles ne ch’intintent pon nin pus. Alles ont même arfusé d’juer dins eune nouvielle verchion d’un fauteul pou deusse. Bref, d’ù qu’ch’est qu’alle est Titine ? J’querche après Titine… Vingt dius ! j’l’ai perdue d’vue. Ah, cha y est ! Alle est lal, muchée in grinte partie par un calicot géint. Ch’est qu’i y a auchi des effets chpéciaux, pach’que, in fait, ch’calicot i n’est pon chi grind qu’cha. Donc, Titine d’Lille alle a invité Sœur Ségo pou t’nir un biout d’el bind’role. So-li-da-ri-té, alle li avot dit. Pus in n’est nombreux, moins l’aute i rit !
Sœur Ségo alle fait min’te d’accepter, mais, à l’dernière minute, alle n’vient pon. Ch’est qu’i y a auchi du suspense dins ch’film… Alle préfèr’te faire calicot à part dins sin bled. Alle n’a pon trop querre à partager l’vedette, i faut bin l’dir’te. Pis, in apprind dins l’histoire qu’alle n’peut pon trop ch’éloigner d’chez alle. In effet, i y a eune binde d’vilains qui fon’tent des coupures sauvaches d’électrichité. Du cop, alle a dû mette sin frigidaire su un tiot groupe électrogène. Alle n’veut pon qu’ches idées alles prenn’tent un cop d’caud. Pou l’peu, cha ne s’rot pus des idées fraîques quind alle aurot b’soin d’ch’in servir, vers deusse mille dousse. Alors, com’ l’réservoir de ch’t’ingin i est gramint tiot, i faut qu’alle arfache l’plein plusieurs fos par jour.
Sœur Ségo et Titine d’Lille, côte à côte, cha aurot pu faire un effet vaque. Pardon, mes gins, j’voulos dir’te un effet bœuf ! Cha li aurot glaché ches sings à min Nicolas. Tindis que lal, ch’est pon cor’ pou ch’cop chi qu’i va querre d’sin trône. Cha li donn’te même l’idée d’écrir’te un nouvieau scénario : « Gramint d’bruit pou pon grind cosse ! » Ouais, mes gins ! Ch’est à ch’momint d’euch film qu’in apprind que ch’Ro i a des talints pou écrir’te, in pus des talints pou raconter gramint d’cacoulles. Cha li vient d’el Reine qui pouche toudis l’canchonnette quind alle écrit un texte. D’ailleurs, alle est in train, à ch’momint préchis, d’li canter sin nouviel opus : « Min bieau Ro, cha bada bada, cha bada bada. I est à mi, wha, bada bada, cha bada bada… » etc. pach’qu’alle in fait des tonnes in li f’sint ches zis doux. Ouais, mes gins, i y a auchi du romintisme dins ch’film…
Toute ch’te séduc’chion, cha li fait d’l’effet, chertes, mais ch’Ro i a eune manie. Ch’est pus fort qu’li, mais i faut toudis qu’i achtique ch’collec’chion d’stylos. Ch’est qu’i in a gramint. Aveuc tous ches traités et toutes ches réformes, ch’est un peu com’ autint d’chouv’nirs. Mes gins, i y a auchi d’el nostalgie dins ch’film. Eune nostalgie qui est gramint intamées quind l’Reine Carlita alle li d’minde ch’i veut qu’alle fache briller sin stylo d’ches mains expertes, pou gagner du timps. Cor’ heureux qu’alle parl’te bin d’un stylo bille, pach’qu’in che s’rot artreuvé dins un film X com’ pou rir’te !
Pindint ch’timps-lal, Titine d’Lille alle complote toudis. Alle fait des pids et des mains pou qu’sœur Ségo alle accepte infin d’faire l’paix. Pou cha, alle va même jusqu’à li d’minder d’faire un meeting commun pou ches européennes. Mais l’aute alle ch’fait prier. Bah ! Alle ch’dit qu’chi Titine alle veut tint l’avoir à côté d’alle, i va falloir faire gagnint-gagnint. Sœur Ségo alle aurot querre à ch’que Titine alle partache eune idée à alle. Même chi ch’est eune décong’lée ! Pis, alle imposse deusse condichions. Un, alle voudrot qu’in li confit eune michion. Alle a fait l’tour d’ches excusses et alle tourn’te in rond. D’autint que tertous i fait vaqu’mint gaffe à quo qu’i dit pou éviter qu’alle arbondiss’te d’chus. Tout cha, ch’est rin qu’pou l’immerder ! Deusse, alle voudrot qu’in arcomminch’te à li rimbourser ches notes d’frais. Mes gins, ch’est com’ partout ! I y a auchi eune histoire d’gros chous dins ch’film…
Te vos, j’viens d’te raconter l’trame princhipale. In ress’ suspindu jusqu’au biout tint l’suspense i va grindichint. A’ch’t’heure, je n’vais pon t’dévoiler l’fin, mais j’auros querre à t’parler auchi d’quéques rôles secondaires. In va commincher par un facteur. Min Olivier, ch’est sin nom, i a vraimint l’rache. Cha li vient d’sin métier. Ch’est pon qu’i n’a pon querre à dichtribuer ch’courrier, mais i a des mauviais chouv’nirs. Du timps d’ù qu’min Nicolas i étot l’chef d’sin villache. Ch’étot toudis parel, chaque fos qu’i avot eune lette pou li, i fallot qu’i sonn’te deusse fos à ch’baraque et l’aute, d’l’aute côté d’el porte, i n’pouvot ch’impêquer d’dir’te : « ch’est ch’facteur, i sonn’te toudis deusse fos ! » Cha l’énerfe cor’ ! Alors, i ch’est mis à rêfer d’grindeur. D’sortir d’sin trou et de ch’évader. Churtout d’pis qu’el chef du villache i a déménagé pou l’pus grinte baraque d’France et qu’i est dev’nu ch’Ro. Auchi, pou pacher sin timps, min Olivier i tricote eune corde à nœuds, symbole d’évasion par excellinche. Mais i a des problèmes aveuc ches chiffres. Alors, au lieu d’compter ches nœuds un, pis deusse, pis tros. Li, i compte a, pis b, pis c. Min Olivier i a un blocache, ch’est évidint quind in ravise ch’film. I est coincé su nœud i !
I y a un aute personnache intéréchint. I ch’appell’te François by Roux. Te m’ségot’ras, mes gins, mais je n’sus pon sûr’te de ch’t’orthographe. Quo qu’i ch’pach’te ? Ah, ouais, ch’est vrai, j’em sus gourée ! Ch’est pon cor’ dins ch’dico. Ségoter, synonyme d’excuser. V’là, ch’est dit d’toute ma bravitute ! J’arviens à min François dont l’nom i n’dot pon ête sponchorisé par Guy Roux, même chi cha m’étonn’rot vraimint qu’is ch’contintent, l’un et l’aute, d’boir’te d’el Cristalline. Li, François, i est vraimint un cas à part. Quind i a deusse caïlles d’vint li, i n’sait jamais su l’quelle i va s’assir. Alors i ch’met à ch’mitan. Seul’mint, i y a toudis un tiot malin qui li fait eune bionne blague et qui écarte ches caïlles ! Ch’est nin grafe, apparemmint, car min François i a un fond’mint gramint solite ! I ch’arlèfe toudis et, pindint l’ac’chion d’euch film, i treuve même ch’moyen d’grimper pus haut dins ches sondaches. I a dû ch’faire gramint d’amis in pus su fesse-bouc, mais l’histoire d’euch film alle n’el dit pon ! Toudis i est que François et ches deusse caïlles li val’tent un churnom. Ch’ti d’Saint François d’assir… I y a auchi d’el comédie dins ch’film…
J’auros auchi querre à t’parler d’Rachida. Sin rôle, j’avoue que je n’ai pon trop saisi d’quo i in artourn’te. A ch’début d’euch film, in insiste su ch’fait qu’alle est issue de l’immigrachion. Pis, pus cha avinche, pus te t’dis qu’alle est plutôt issue de l’imitachion… politique. In effet, tintôt te la vos aveuc eune pouchette in train d’faire ches boutiques et d’arjuer pretty woman à Paris. Pis, te la vos in train d’euch batte aveuc l’justiche. Mais, cha n’est pon l’justiche qui l’inquiète. Cha s’rot plutôt alle qui inquiète l’justiche. Après l’juge est eune femme, voici eune nouveille produc’chion d’TF1 : L’juge saute à cosse d’eune femme. Pis, d’un cop, te la vos in train d’euch bidonner d’vint eune binde d’étudiants et d’faire l’clown in répondint à côté d’ches quechtions qu’in li poss’te. Ginre ches chur-doués pass’tent leu bac à sape. Ouais, i y a auchi d’euch burlesque dins ch’film…
Enchuite, mes gins, ch’est com’ dins toutes ches super produc’chions. I y a ch’qu’in appell’te ches guess-stars, qu’in traduit, nou’z’autes, par ches vedettes invitées. Après tout, in est à Cannes ! Christine Albanel qui fait eune apparichion in mohican. Alle n’est pon l’dernière in tout cas. Aveuc ch’main d’vint l’bouque, alle crie in rythme ha… do… pi… ha… do…pi… in amorchint l’dinche d’el pluie, des votes d’ches députés. Tindis que Pierre Arditi accepte d’arprinte ch’rôle d’Tarzan, rin qu’pou ches bieaux zis, et crie auchi : « ah, ah, ah, ah, ha… dopi ! » Frédéric Lefebvre fait égal’mint eune apparichion. Bin, ch’est un peu normal. I n’faut pon oublier que ch’tite d’euch film est L’Révoluchion Françaisse, l’artour. Com’ i ch’prind d’jà pou Napoléon, i faut qu’i rech’te dins ches paraches ! Roselyne Bachelot alle jue l’rôle d’l’infirmière. Dins ches révoluchions, in ch’artreuve toudis aveuc des bléchés. Alle a eune chertaine expérienche des hôpitaux. Churtout quind in dot faire aveuc ches moyens du bord ! Benoît Hamon i fait un tiot rôle d’gogo dancer dins eune taverne près d’el Seine. Forchémint, ch’est eune révoluchion quind i ch’artreuve in stringe. Toutes ches femmes alles sont hystériques. Cha d’viendra un fait historique après… Te dos d’viner qui tient l’bar ? Ouais, mes gins, quéqu’un qui risqu’te d’boir’te tous ches bénéfiches. Pou li, ch’est vraimint un chalinche d’servir toutes ches boissons chins y toucher, mais min Jean-Louis i a gramint du caractère et i résiste…
Pou faire ches figurints, in a fermé ches univerchités et in a pris ches étudiants. Après tout, is ont eune chertaine habitute d’ête dins ches rues et d’manifester leu mécontint’mint. Pus vrai qu’nature, j’te l’dis, mes gins ! Après, t’as ches grinds abchints. Alain Delon qui n’voulot pon faire d’l’ompe à ch’Ro d’France après avoir tint brillé in impereur romain. Francis Lalanne qui n’a pon treuvé l’moyen d’expliquer à ches producteurs d’euch film que l’présinche d’un chat botté alle aurot pu rappeler un mousquetaire. Guy Roux, cor’ li, qui a très mal pris l’fait qu’in li arfus’te ch’rôle du bourreau. D’un cop, i a perdu sin air jovial et est dev’nu un Guy hautin… Jacques Séguéla qui a pourtint fait des biouts d’essai. I n’a pon été art’nu pach’qu’i n’a pon prétindu artirer cha Rolex. Com’ cha f’sot toudis des éclairs aveuc ches projecteurs, ch’réalisateur i l’a armerchié. Te m’diras, pou eune fos qu’i aurot brillé, ch’est vraimint pon d’chince ! Lionel Jospin n’a pas eu d’rôle nin pus. Cha ch’pach’te à Paris, pon à l’cimpagne. In n’avot pon b’soin d’mouton. DSK ch’est vu arfusé un tiot rôle li-auchi. Ch’ti d’un méd’cin dins l’même hôpital que Roselyne. I n’arrivot pon à dir’te ch’réplique : A ch’suivint ! Ch’étot toudis à l’suivinte ! Ch’réalisateur i n’f’sot d’jà pon eune série B, alors cha n’étot pon pou qu’cha déchinde jusqu’à X !

V’là, mes gins ! J’sais qu’j’ai oublié gramint d’personnaches mais i faut bin qu’i t’in ress’ cor’ à découfrir quind t’iras vir ch’film à ch’cinéma. Pis, j’oublios un truc très importint. Toute arsimblinche aveuc des personnaches existants ou ayant existés s’rot vraimint eune coïnchidinche que même mi, Marie Toutoule, alle n’aurot jamais pu imaginer ! In tout cas, j’ai eu querre à m’projec’chion in avint première à Cannes. Ch’étot cool. Te sais, et j’vais terminer lad’chus, pach’que j’ai gramint rattrapé min artard. J’ai été bavarte à’ch’t’heure. Donc, pou finir, j’ai même rincontré su ches marches Richard Gasquet. Quind j’li ai d’mindé ch’qu’i f’sot lal, i m’a dit qu’i n’pouvot pon résister quind i s’agissot d’Cannes. J’avoue que, su ch’cop, j’n’ai pon compris mais, après mûres réflec’chions, cha y est : Coke, ch’étot pou cocaïne. Cannes, ch’est pou cannabis…