Chalut mes gins ! Te sais que, lorch’qu’i y a qué cosse qui m’turlupin’te, i faut que j’el mette à plat. Cha m’aide à y vir pus clair, même chi cha n’fait pon avincher d’avintache che schmilblick ! Cha fait deusse jours que j’ai bieau tourner et artourner dins tous ches chins ch’problème, je n’arrife pon à echpliquer ch’te nouvielle théorie qui dit à l’insu d’sin plein gré…

A’ch’t’heure, in n’parl’te pus que d’cha. D’pis qu’Richard Gasquet i a été déclaré positif à l’cocaïne, après un soir d’bringue dins eune dichcothèque, et qu’i ch’est défindu par ch’te phrasse vraimint énigmatique. Tint qu’in ress’ dins l’première partie, in comprind toud’chuite ch’qu’i veut dir’te. In li a mis l’drogue chins li d’minder sin avis. Cha arrife ches cosses lal. In peut pinser qu’i y a quéqu’un qui a voulu li faire eune bionne blague in ch’disint : « Min Richard, j’vais li mette d’el couleur dins ches rêfes tout d’bout. Cha va li faire tout drôl’te. A côté d’cha, ches leumières psychédéliques alle vont arsimper à eune limpe d’ch’vet, d’eune chimpe d’gamin. » Te sais, ches limpes d’ù qu’cha tourn’tent quind te les alleum’tes et qui fon’tent des dessins su ches murs et ch’plafond. In a tertous, dins ches amis, quéqu’un qui n’arrête pon d’faire ch’ginre d’blague. J’allos dir’te à deusse balles, mais ch’est nin l’cas quind te parl’tes d’cocaïne. Ou alors, ch’est qu’in a affaire à eune périote d’soltes chins préchédint. Commint dir’te, l’grinte quinssaine d’el blinche…
Seul’mint v’là, sin camarate comique troupier i a oublié un détal qui a sin importinche. Min Richard i dot picher dins un bocal l’lind’main matin. V’là commint eune blaque potache alle vir’te à l’grosse tache. Churtout dins l’carrière d’un athlète ! V’là min Richard dins d’bieaux draps, toudis in promo puich’que ch’est l’quinssaine blinche… Eune aute echplicachion pochipe, ch’est qu’cha vient d’un concurrint qui a intérêt à l’éliminer d’el course. Li, i a un avintache, i connôt l’cop d’euch bocal l’lind’main. Mes gins, cha ress’ à sin insu. In est tertous d’accord ! A’ch’t’heure, ch’est lal d’ù qu’j’ai gramint pus d’mau à treuver eune echplicachion. A l’insu d’sin plein gré. Chi j’traduis cha in bion français dins l’texte, même in ch’ti, cha voudrot dir’te que chins qu’i ne s’in rinte compte, i s’rot à chint pou chint volontiers d’accord. Chus-intindu d’in printe. Bah, mi, j’ai invie d’dir’te : Hein ? Quo qu’ch’est que charabia ? A’ch’t’heure, je n’perds pon d’vue qu’i a dit ch’te phrasse just’mint après qu’in a treuvé ches traches dins sin pipi. Te vos, ch’est p’t-ête ches chéquelles. I avot cor’ ches velux ouverts dins ch’grenier et cha li f’sot des courints d’air !
Bion, i n’y a pon, i faut qu’in imagine l’schène. In artourne faire eune virée dins ch’te dichcothèque. Cha va p’t-ête éclairer mes linternes pach’que, leumières psychédéliques ou pon, j’sus dins ch’brouillard. Vingt dius ! Pourvu qu’in n’m’ait pon drogué à l’insu d’min plein gré auchi ! Bref ! Cha fait gramint d’bruit. Te t’éclates su l’dernier tube à l’mote : « cha m’énerfe. » Bion, cha donn’te gramint soif auchi. Alors, te commindes un whisky-coke, par eximpe. Ch’t’erreur alle est humaine. T’lingue alle a été pus vit’ qu’tin cerveau. Te t’es gouré et t’as dit coke à l’plache d’coca. Ch’gars à ch’bar, i crot bin faire. I ch’dit, ch’est un pipole, ch’Richard, cha n’a rin d’étonnint. Ch’est ainchi qu’in ch’artreuve aveuc un nouvieau cocktail qu’in pourrot nommer un bébé dins l’poudreusse. Par extinchion, com’ in pourrot simplifier eune équachion in math, cha finirot par un bébé talqué ! Qui finirot cor’, pou ch’ti qui l’bot, par un grind bêta décalqué…
Allez, in va l’faire pach’que j’in vos qui ch’diss’tent : « Marie Toutoule alle pach’te à côté d’un ju d’miots, d’pis l’début ! » Nin, nin, nin, mes gins ! J’n’ai pon perdu d’vue que ch’t’intraîneur à min Richard i a chertain’mint paché sin timps à li d’minder d’euch défoncer ! V’là, t’es contint ? J’arviens à m’coke, i n’faut pon que j’perde l’line d’min echplicachion. Pardon, mes gins ! J’voulos dir’te l’fil, mais j’sus sûr’te que t’avos rectifié d’ti-même. In finit par comprinte ch’qu’i a voulu dir’te, min Richard. D’sin plein gré, i d’minde coke pou coca et à sin insu, in li met d’el coke pou cocaïne. CQFD ! Ch’est quo qu’i fallot démontrer, pou ch’ti qui a vraimint oublié ches cours d’math !

A’ch’t’heure, chi in li treuve des traches dins ches queveux, i s’ra vraimint mau, min Richard. Qu’i fache l’tour d’ches placards ! Par chécurité, qu’i vérifie sin kilo d’farine. Ch’boîte d’chuque glache. Pis, quind i met du bicarbonate d’soude dins ches haricots. Chi au lieu d’les faire verdire, is comminch’tent à armuer com’ des pos mexicains, i saura qu’cha n’est pon du bicarbonate ! Parel, interdit d’acouter d’dernier alboum d’Salvatore Adamo in duo. Ou alors, i faut qu’i programm’te ch’platine CD pou sauter l’plache deusse. Tombe l’neiche, cha n’el fait pon !

Cadieau bonus :
Cha n’a rin à vir aveuc min Richard, mais d’main, ch’est l’ouverture d’euch festival d’Canne. J’n’vais pon t’arfaire l’cop d’l’année dernière, même chi te ne m’lisos pon cor’. Ch’est ichi, chi te veux t’rafraîchir ches neurones : http://www.marietoutoule.com/article-19553653.html.
Pis, j’n’ai pon l’timps et te vas comprinte pouquo chi te jue l’vidéo après…
Te pourras même l’faire pou ti, mais te t’chouviendras qu’ch’est quind même mi l’vedette !