Chalut mes gins ! Ch’est eune bin drôl’te de s’maine. J’sais qu’ch’est tous ches ins parel. In a quéques jours d’traval intre deusse grinds ponts. I y a l’mitan d’el France qui est in n’sait pon trop d’ù ! D’ailleurs, j’cros bin qu’in a construit un aute pont intre ches deusse autes. In ch’artreuve aveuc un viaduc ! Chi t’armarques bin, même ches actualités alles sont au ralinti. A part ch’virus d’el grippe, qui n’arrête pon d’faire parler d’li, in n’te parl’te d’rin. Alors chi t’arviens pach’que t’as traverché ch’viaduc, i faut quind même que j’te tienn’te au courint de ch’qui ch’est paché. Ch’est parti …

Mesdames et Messieurs, bonjour ! Ch’est l’journal présinté par mi’z’aute, Marie Toutoule. In premier, j’voudros pacher un messache perchonnel à un grincheux qui ch’appell’te Pierre et qui ch’arconnaîtra. I a râlé pach’que j’parlos chouvint d’actualités qui n’avotent rin à vir aveuc ches ch’tis. J’vais armette ch’que j’t’ai d’jà répondu : Ichi, in parl’te d’tout. In n’va pon continuer à parler d’ches mines et rechter dins l’paché, auchi glorieux fut-il… In va d’l’avint et in est ouvert à ch’ress’ d’euch monte ! In ne ch’continte pon de ch’raviser ch’nombril. In a querre auchi à ch’nombril d’ches autes, même ch’is n’sont pon ch’tis ! Chi te n’es pon contint, te peux aller vir un aute chite. Ichi, in ress’ intre amis uniqu’mint ! Même chi cha t’défriss’te, i y in a qui vienn’tent d’gramint loin ! Pou chiter quéques pays : L’Chine, Québec, l’Algérie…V’là, ch’est dit !
Orléans : Mgr. André Fort, l’évêque d’Orléans i y va fort ! I y a quéque timps, i a défrayé l’chronique et a soul’vé l’fameux couple Paul et Mick, in affirmint que l’capote alle n’étot pon chint pou chint sûr’te. In effet, i a ravisé dins un microscope et i a armarqué que l’talle d’euch virus d’euch Sida alle étot gramint pus fine qu’cheule d’un spermatozoïde. I vient d’armette eune couche in disint que ch’étot marqué su chertaines boîtes, que cha n’étot pon fiabe à chint pou chint, et que chi ches propos is avotent alerté les gins su l’fait que cha n’étot pon eune choluchion miraque, ch’étot leu problème. Ti, te dos confonte ches capotes aveuc ches filtres à café d’ù qu’t’as l’chox d’ches trous pus ou moins grinds chuivint qu’te l’veux pus ou moins corsé ! Rin i est parfait su ch’Tierre ! L’preufe : Tin habit d’Mgr. i ne t’protèche pon d’dir’te des bêtisses… In peut juss’ che d’minder, nou’z’aute, pouquo ch’est toudis ceusses qui l’utiliss’tent l’moins qui in parl’tent l’pus !
Nîmes : Tros imployées d’chez McDo affirm’tent que ch’restaurint, dins l’quel alles travaill’tent, minque régulièr’mint à ches règues d’hygiène et d’chécurité alimintaire. In effet, alles diss’tent qu’in leu d’minde chouvint d’falsifier ches dates limites et d’in mette eune nouvielle. D’arcong’ler ches produits d’jà décong’lés, etc.. Bin intindu, ches chupérieurs is fon’tent préchion par des intimidachions. A’ch’t’heure, alles ont été convoquées pou leu licinchiemint. In quée d’ches nues ! In n’aurot jamais choupchonné qu’eune telle pratique alle che f’sot. Mi, j’étos sûr’te qu’is épluchotent leux patates pindint l’nuit. Tindis qu’d’autes is allotent chosir un bieau bœuf pou li faire l’pieau et l’trinsformer in steak haché. Te connos l’histoire : Mais d’ù qu’ch’est qu’t’étot paché ? i d’minde un steak. Steak haché ! i li répond l’aute… J’me disos bin qu’is avotent un goût inimitape et j’em sus chouvint d’mindé pouquo !
Marine Le Pen : Alle n’est pon continte pach’qu’un photographe i a publié eune photo d’alle in train d’tirer l’lingue. Bion, cha n’est pon mortel, toud’même ! Pis, in vot qu’alle n’a pon eune lingue d’vipère, ch’est d’jà cha. Cha aurot été bin pus grafe chi alle avot été churprisse aveuc un dogt dins l’nez ! Infin, min Jean-Marie i va quind même garder ch’file à l’oeul, et pou cosse ! Mi, j’in appell’te à ch’photographe pou qu’i continue à printe ches politiques in pleine ac’chion. Ainchi, j’auros querre à vir eune photo d’sœur Ségo in  train d’ouvrir sin frigidaire. Eune photo d’Nicolas dins l’rayon des grille-pains, d’el bielle famille d’sin fils. Cor’ eune dernière : Eune d’Titine d’Lille et Jean-Louis Borloo in cure à Evian !
Frédéric Lefebvre : Ch’est eune grinte première d’pis des années. Un politique i accepte d’donner eune interview dins Voici ! Bin voilà, cha li est chertain’mint monté à l’tiête ! I a déclaré que : « In peut faire d’el politique aveuc des queveux longs, l’preufe aveuc Napoléon ! » D’jà, in peut vir qu’i est pouet chins l’savoir. Cha rime ! Mes gins, cha ching’te tout l’visache politique. D’pis deusse ins, in étot persuadé que ch’étot min Nicolas qui ch’prenot pou Napoléon. Ichi, in apprind qu’ch’est li ! Va falloir qu’j’in parl’te à un psy. Mi, j’croyos qu’i n’y avot qu’dins ches asiles qu’in pouvot rincontrer des gins qui ch’prenn’tent pou Napoléon. A’ch’t’heure, in sait qu’ch’est faux ! Nin, nin, nin ! N’me fais pon dir’te ch’que j’n’ai pon dit ! J’n’ai jamais suggéré que ch’monte politique sot un asile ! Quoque, par momints… In tout cas, mi, j’sus curieusse d’savoir, dins ch’cas, qui ch’prind pou Elvis Presley ; deusse à ch’top dins ches asiles !
Jordanie :  L’reine Rania est toudis su l’brèche. Alle vient d’ouvrir un compte twitter pou bloguer su ch’vie. Ch’est ainchi qu’alle raconte que sin mari, l’Ro Abdullah, i a querre à faire l’zazou quind i pilote sin hélico, pach’que cha li fait des sinsachions dins l’vinte ! In est très heureux d’el savoir ! In sait auchi d’ù qu’cha vient toutes ches timpêtes d’sape dins ch’désert ! I faut croir’te qu’alle a gramint d’timps pou faire sin blog. Pourtint, aveuc ches tros infints, alle in a eune bionne. D’autint qu’alle n’in peut d’jà pus œufrer pou des assochiachions. L’dernière in date, ch’est eune pou aider ches tiots viux. Ch’est chertain’mint pou cha qu’ch’est alle qui ch’occup’te l’pus de min Benoît XVI, in visite à Amman ! In peut rappeler à tertous que seisse cha li vient d’sin echprit qui étot treisse et tros !
In bref :
Dieudonné : Après avoir fait l’tour d’France aveuc sin bus salle d’chpectaque, i a du mau à treuver des signatures pou ch’liste à ches élections européennes.  I faut croir’te qu’tout i n’est pon chi pourri qu’cha ch’i n’arrife pon à treuver des gins pou l’suife. Mi, j’n’avos d’jà pon querre à li quind i f’sot l’comique. J’vais m’arrêter d’parler d’li, cha li fait trop d’pub ! Chi, à’ch’t’heure, l’couleur de ch’t’echpoir ch’est noir’te d’pis Obama, li, i dot ête déguissé !
Hadopi : Eune nouvielle saison alle est annonchée ! In effet, ch’est un grind arbondich’mint qu’in va vife aveuc ches artistes qui votent tradichionnell’mint pou ch’PS. Is n’sont pon contint des déchisions d’euch parti. Ch’est min Nicolas qui est gramint chatisfait d’euch faire d’nouvieaux amis. Pou ches épisotes chuivint, in connôt d’jà l’trailer. I parôt qu’in va découfrir un nouviel antagoniste qui ch’appell’te l’parl’mint européen. I veut, li auchi, mette des bâtons dins ches roues à ch’te loi. Que de suspense, mes gins ! Et pindint ch’timps-lal, ches pirates is naviguent… Pardon is churf’tent !
Lituanie : L’poliche alle découfre d’el drogue dichimulée dins des cercuels qui devotent ête lifrés à eune intreprisse d’pompes funèbes. Qué malheur ! Is ont pinsé à tout sauf qu’is ont oublié d’mette ches pailles et un tiot miroir pou ch’faire eune line. Vraimint, i y a du laiché aller. Is n’ont pon pinsé qu’ches gins, infermés lad’dins, is n’ont pon tout leu attiral aveuc eusses !
Appel urgint :
In d’minde instammint à tous ches politiques d’faire des gaffes. In effet, WonderSégo alle comminche à treuver l’timps long. Sin frigidaire i débord’te d’excusses à défaut d’idées. Merchi pou alle !

Mes gins, j’auros cor’ pu in mette quéques-eunes, mais te s’ras d’jà moins largué quind t’artourn’ras travailler ch’lundi. A’ch’t’heure, i est timps de t’quitter. Aux fines herbes, com’ is diss’tent ches Allemands, même ch’is n’sont pon ches rois d’el grillate. Baie-baie, com’ is diss’tent ches Inglais fatigués. Arrivée d’air chaud, chez ches Italiens in plein solel. Arvir et à béto com’ in dit ichi !