Chalut mes gins ! J’espèr’te que t’as fait eune bionne arprisse. Après quinsse jours à avoir mis ches dogts d’pid in évintal, t’es obligé d’les armette dins ches caussures. In oublie ches momints d’ù qu’in n’étot pon t’nu d’raviser ch’monte. Ti, derrière tin manicraque, j’te vos, te sais ! T’as cor’ l’tiête in vacinches… In fait, à’ch’t’heure, ch’est un jour com’ un aute. In est d’nouvieau dins ch’train-train quotidien. Pon tout à fait…
Quo qu’ch’est qu’te cros, ti’z’aute ? Aveuc min tite, te t’es imaginé qu’i y a eune coupure sauvache d’électricité à ch’Fouquet’s par ches gins d’ERDF et qu’ch’est pou cha qu’is ont sorti deusse candelles. Nin ! Te n’y es pon ! Ch’est un jour d’anniversaire pou min Nicolas. Cha fait deusse ins que chertains diront qu’in l’a su ch’dios. Tindis que ches autes diront qu’i a comminché à faire d’grintes réformes. In tout cas, qu’in a querre à li ou pon, i faut bin arconnaîte qu’i a été omniprésint et su tous ches fronts. I a déclinché gramint d’pachion et gramint d’foudres auchi. Alors, in n’va pon essayer d’faire un invintaire. D’toute fachon, i bouge gramint trop vit’ pou mi et j’sus sûr’te que j’in oublieros à ch’passache. I avot promis d’chinger l’France et ch’est in partie gagné. J’dis in partie pach’que ch’i y a bin quéque cosse d’impochipe à faire, ch’est d’chinger l’France. D’ailleurs in l’vot bin. Cha râle toudis autint. In fait toudis grèfe pou ches mêmes cosses. Tertous i veut rechter aveuc sin tiot acquis. Bref, ch’est com’ chi in étot tertous dins ch’même batieau, mais que t’as l’mitan qui ram’tent vers ch’Nord et l’aute, vers l’Chud. In fait du churplache !
Par conte, ch’est auchi in partie gagné. Pon à cosse d’ches réformes à l’pelle. Nin ! Je n’sus pon experte in politique pou donner min avis lad’chus. Pis, ch’est parel. J’vais m’artreuver aveuc l’mitan des gins, qui m’lis’tent, d’accord aveuc mi et l’aute mitan qui va m’faire l’guiffe. Com’ mi, j’ai querre à tertous, mes gins, j’n’ai pon invie évoquer ches sujets qui fâch’tent. In tout cas, i faut arconnaîte que min Nicolas i a révoluchionné l’visache politique d’el France. In effet, ch’est l’première fos qu’in élit un présidint qui chinge d’femme auchitôt après. Pou l’peu, l’visache i a gramint chingé. Après Anémone, Danièle et Bernadette, te n’peux pon m’dir’te l’contraire ! Par conte, i faut auchi admette eune cosse. Chi in a eune bielle imache, Carla étot quind même Top Model, in n’peut pon in dir’te autint d’euch son ! D’euch côté-lal, t’as intérêt à poucher l’volume de tin sonotone. Pis, chi t’as des silinches intre deusse miots, cha n’est pon pach’que l’trinsmichion alle est mauvaise. Nin !
Infin, chi Carla alle n’est pon l’reine d’euch dichcours, min Nicolas i parl’te pou deusse. Voire deusse doussaines ! Pis, Carla, alle cante ! Cha, auchi, ch’est du ching’mint ! Après Anémone qui tournot ches paches d’ches partichions pindint que ch’n’homme i juot d’l’accordéon. Danièle qui allot porter ches rechtes d’el cintine de ch’t’Elysée, in cachette, à ch’bielle-file. Bernadette qui f’sot eune collec’chion d’pièches jaunes, ch’est quind même l’première fos qu’eune Première Dame alle est à ch’top chinquinte ! D’ailleurs, j’m’étonn’te que min Nicolas i n’ait pon cor’ pinsé à cha pou ches réformes. Un CD aveuc eune canchon par réforme, cantée aveuc ches ministres conchernés. Bion, d’accord, mes gins ! A l’allure d’ù qu’cha a été, ches réformes, et d’ù qu’cha va chertain’mint cor’ aller, cha n’tiendra pon su un seu CD. Ch’est nin grafe. In f’ra tous ches ins eune bielle compil : « Ze Best of… Ray Formes ! » Bah, Ray Charles ch’étot d’jà pris… Pis, l’ompe d’un Charles alle plan’te toudis. Et vu l’différinche d’talle, min Nicolas i s’rot carrémint dins ch’noir’te !
Cor’ un point qui a chingé. Ch’est l’première fos qu’in peut dir’te des gros miots quind in est présidint. Ch’est vrai cha ! Avint, i fallot faire attinchion à tout ch’qu’i pouvot dir’te. I n’avot pon l’drot d’lincher « cass’ ti, pauf’ con ! » I fallot arguminter sin mécontint’mint par eune bielle phrasse qui n’pouvot pon choquer ches orelles chinsipes. Du ginre : « Je suis extrêmement atterré que vous ne fusiez point enthousiaste devant mon œuvre à redresser fièrement les fondements de la France. Je vous invite donc à vous éloigner afin de ne pas froisser la bien-séance. »  A’ch’t’heure, in sait que ch’présidint i est un homme com’ tertous. Li auchi, i fait des écarts d’parlache. Cha li arrife d’massacrer ch’te bielle lingue. I faut li pardonner, mes gins. J’in appell’te à WonderSégo !  I a été élevé in grinte partie dins eune binlieue, près d’Paris. D’ailleurs, com’ chouvint, ches jonnes, pou s’occuper, is fon’tent d’el boxe. Ch’est pou cha qu’i a gardé ches tics aveuc ches épaules toudis in mouv’mint…
Alors, ch’soir, chi te veux minger à ch’Fouquet’s, ch’est raté, ch’est complet ! Min Nicolas i a invité gramint d’amis. Com’ Jacquouille l’fripouille, qui dot li donner des l’chons d’bion français. OK ? Pis, Jean Reno pou n’pon laicher Léon, même ch’i a ches mêmes plats à l’mason. Cha va ch’arrêter lal pou ch’casting d’ches Visiteurs. In effet, i n’y aura pon Valérie Lemercier. P’t-ête qu’i a gramint peur d’l’inviter et qu’alle diss’te quind alle vot ches serveurs arriver aveuc ches plats : « Ch’est mi qui l’ai fait ! » Du cop, i richque d’che fâcher aveuc ch’patron du Fouquet’s et ch’artreuver SCF qui, com’ tertous i l’sait, veut dir’te Sins Cintine Fixe. I y aura auchi Basile Boli. Ch’est pou l’côté chportif. Pis, cha quée bin, i a l’couleur d’l’echpoir. Bion, in n’va pon les évoquer tous, cha n’est pon un roman que j’sus in train d’rédiger…
Toudis i est que gramint d’ches amis qui ont eu ches honneurs d’el France d’pis qu’min Nicolas i est présidint. Ches médalles alles sont dichtribuées à l’pelle. Ch’est à ch’ti qui va ête Chevalier, Officier, Commandeur et même Grinte-Croix d’el Légion d’Honneur. In peut armarquer eune grinte abchinte, ch’est mi ! Ah ? Ti auchi ? Bion, i va falloir qu’in arcomminde un stock d’médalles. Un médallé abchint à ch’dîner de ch’soir, ch’est l’Bonhomme Michelin. In effet, quind min Nicolas i li a accroché ch’médalle, l’aute i ch’est dégonflé et i n’a pon voulu li faire eune accolate. D’pis, leu amitié alle est un peu in roue lipe, mais com’ min Nicolas i n’minqu’te pon d’air, i l’a invité quind même. Seul’mint ch’Bonhomme i a arfusé chous prétexte qu’i étot trop crevé…
J’ai eune pinsée toute particulière pou Sœur Ségo, l’grinte michionnaire d’euch pardon, qui n’est pon invitée ch’soir. In che d’minde bin pouquo… Chi, mi, j’sais. A ch’menu, ch’est fromache et dessert. Alle, alle est gramint fâchée aveuc ches fromaches. Churtout ch’is vienn’tent d’euch Nord d’Paris. Lal d’ù qu’i y a des tulipes, mais, auchi, lal d’ù qu’i y a des corons ! A n’in pon douter, alle a dû ch’faire sin propre dichcours, ch’matin, d’vint sin miroir : « Je d’minde pardon à ch’nom d’tous ches Français d’avoir perdu ches élections, i y a deusse ins. Pardon de n’pon avoir ouvert l’porte d’min frigidaire pou sortir eune bionne idée qui aurot radical’mint chingé ch’t’histoire. Seul’mint, j’ai auchi des chirconstinches atténuintes, j’me sus fait pirater ches meilleux idées par un américain qui est v’nu faire eune razzia dins min frigo ! »

V’là, mes gins, quo qu’i y avot à dir’te su l’sujet. Mi, ch’soir, j’em contint’rai d’comminder eune pizza ou d’aller quercher un Kebab. Tout cha n’ching’te pon vraimint not’ vie qui, com’ disot un aute présidint, est l’continuité dins l’ching’mint. T’es in train de t’dir’te : « Tiens, pou eune fos, Marie toutoule alle chite un présidint et pon eune canchon ! » T’as raison. J’n’sais pon pouquo j’n’ai pon pinsé auchitôt à Rika Zarai et sin tube : « Ch’est cha, l’France ! » Infin, à l’décharge d’tous ches politiques, chi in ramot tertous dins l’même chins, cha s’rot gramint pus fachile d’chinger vraimint l’France !