Chalut mes gins ! Bah, cheule météo alle avot bin dit qu’in n’allot pon avoir gramint l’occasion d’bronzer dins sin gardin cheule s’maine et alle ch’est trompée qu’à mitan. Intre deusse draches, in a l’drot à un peu d’solel. Alors, j’n’sais pon chi ch’est cha qui m’a fait rêfer d’un pays pus ensoleillé, toudis i est qu’j’ai paché eune nuit torride in Echpagne !

Nin, j’cros bin qu’cha n’a rin à vir aveuc ch’timps. Ch’est pach’que j’sais qu’min Nicolas i est là-bas aveuc Carla. Du cop, min echprit i a fait l’ress’ ! Ch’est quind même eune drôl’te d’coïncidinche qu’i va vir José Luis après ch’qu’i ch’est paché, i y a moins d’quinsse jours. Te cros qu’i va li faire des excusses ? Ah ! Ch’est vrai ! Cha n’est pon sin rôle à li. Ch’est l’michion divine d’WonderSégo. Alors, quo qu’i va faire avec José Luis ? In tout cas, tout i est fait pou qu’cha donn’te l’impréchion qu’is sont très potes. Allez, min José Luis, in va ch’faire eune bionne paella aveuc Carla. Pis avint, in prindra l’apéro, min Zapatero ! Ch’est qu’i est pouet min Nicolas…
J’t’ai acaté eune bionne dosse d’chocolat, min Nicolas. Chi te ramèn’tes Carla, cha s’ra eune vraie corrida. J’te l’dis, mes gins, Zapatero i n’veut pon rechter à l’traîne. Li-auchi, i fait l’pouet à ches heures. Ch’est deusse lal, ch’est évidint qu’is sont potes. J’allos dir’te copains com’ cochons mais, à’ch’t’heure, aveuc ch’grippe porcine, j’ai eu peur que te balisses et qu’te chinges d’pache, chins lir’te l’chuite… Donc, pou in arv’nir à ches deusse lal, ch’est eune bielle paire. Donc, mathématiqu’mint, cha fait pouet-pouet ! Cha rim’te d’partout ! Tindis que ch’voyache, j’cros bin qu’i rim’te à rin…
Dins cheule histoire, ch’est Carla qui fait ch’t’Une d’ches magazines. In a l’impréchion qu’alle est lal pou faire diverchion. Ch’qui intéréche ches Echpagnols, ch’est ch’garde rope. Bion, ch’est vrai. Jusqu’à ch’t’heure, is ne l’avotent jamais vu in vrai, not’ Top Model Première Dame. Alors, te cros qu’alle va défiler ? In tout cas, j’espèr’te, pou eusses, qu’alle est partie chins ch’guitare. Quoqu’is ne d’mind’tent p’t-ête pon miux, cha coûte gramint moins quer que d’arroser ches cultures ! Vingt dius ! J’cros bin que j’viens d’donner un prétexte à WonderSégo pou qu’alle fache des excusses à Carla à cosse d’mi !

Ch’est pon tout cha, mes gins, mais l’fait d’rêfer d’Echpagne, cha m’a fait pinser à eune tiote canchon. Forchémint, i y in a eune qui m’est v’nue in tiête immédiat’mint, cheule nuit, quind j’em voyos auchi là-bas. I faut armonter gramint dins ch’timps, mais i y a eune célèpe canteusse qui a fait eune adaptachion d’euch clachique E Viva España, ch’est Georgette Plana. L’idole de min inquêtriche favorite, Bridget Columbo, qui, i faut que j’te mette dins l’confidinche, mes gins, aurot préféré que Georgette alle cante toutes ches vaques plutôt qu’tous ches bœufs. Ichi, in aurot pu faire tous ches taureaux, ch’est vrai, mais ch’est quind même E Viva España qu’in va faire insimpe. Gramint arvu et corrigé aveuc l’actualité d’min Nicolas…

Aveuc cheule WonderSégo et ches excusses

José me boude, je crois qu’i m’fait la gueule

Je sus bin obligé de treuver des russes

Pou que l’histoire fache pus la Une pipeule

Heureuss’mint j’ai un tour dins min capieau

Pou faire la paix aveuc Zapatero

Ravise com’ alle est fintach’tique

Ch’est ma femme Carlita

Alle ch’harnaique pon à ch’Prisunic

Ch’est eune star Carlita

Dès qu’in la vot, ch’est la panique

Is cri’tent tous Carlita

Alle donn’te eul fièfe aux ibériques

Carlita por favor

A José, alle li a fait un autographe

Ch’est un vrai fan et i m’fait pus la gueule

Tint miux, je n’avos pon l’invie d’printe eune baffe

Intre l’arrivée et pis ches amusses-gueule

Alle te l’a bin calmé Zapatero

Pou faire plaiji à sin biel hidalgo

Ravise com’ alle est fintach’tique

Ch’est ma femme Carlita

Alle ch’harnaique pon à ch’Prisunic

Ch’est eune star Carlita

Dès qu’in la vot ch’est la panique

Is cri’tent tous Carlita

Alle donn’te eul fièfe aux ibériques

Carlita por favor

Ravise com’ alle est fintach’tique

E viva Carlita

J’armonte dins la prèche ibérique

E viva Carlita

J’sus fier d’min Top Model unique

E viva Carlita

Chins alle ch’aurot pu ête tragique

E viva carlita

Ad lib…