Chalut mes gins ! Cha ch’in va et cha arvient… Mais cha fait bin rigoler, alors ch’est bin, mes gins. Pach’que nou’z’autes, in a querre à rigoler un bion cop. Ch’est sûr’te, cha s’ra cor’ à nos dépens. Toudis i est qu’i y a long qu’in n’avot pon parlé d’alle ichi. Pis, cha quée bin car in a gramint bavardé d’WonderSégo, ches derniers timps. In aurot pu croir’te que ch’PS i avot ch’monopole d’el One Woman Show. Ch’étot chins compter su l’UMP qui n’voulot pon rechter à l’traîne…

Ladies and Gentlemen, in t’annonche l’grind artour d’Rachida Dati dins sin nouvieau chpectaque : « Europe, me v’là ! » In ch’souvient d’alle i y a quéque timps. Alle avot eu un grind succès médiatique pou avoir pris à l’lette l’canchon d’Jean-Jacques Goldman. In effet, alle auchi, alle a fait un bébé toute seu. Cha avot déchaîné ches foules et fait la Une d’ches journaux. A ch’t’époque, in aurot pu croir’te à un conte d’fées, pou alle, dins l’quel alle t’not l’rôle princhipal. Ch’est vrai, alle ch’artreuve aveuc eune file à pus d’quarinte ins. Cha n’étot pon un explot in so, mais ch’étot révoluchionnaire pou eune ministre. D’autint qu’alle n’étot pon mariée…
In un clin d’oeul, la v’là dins eune série qui est un armèque d’Chindrillon, arvu et corrigé à l’chauce polichière. Cha n’étot pon eune pintoufe qui servot à un Prince Charmint pou artreuver cha propriétaire. Nin ! Ichi, ches rôles is étotent intervertis. In avot affaire à eune tiote graine qui servot à artreuver un Prince Charmint ! Ch’est qui qui avot pu oublier cha ? Pou ches journalistes et gramint d’monte, i fallot bin que cheule graine alle vienn’te d’quéque part, même chi tertous i fredonnot à nouvieau l’canchon d’min Jean-Jacques. Ch’est lal qu’in a comminché à faire un amalgame aveuc une inquête d’Agatha Christie. A un momint donné, tous ches Princes Charmints ou pon, d’ailleurs, is étotent des coupables pochipes. In ch’souvient d’tous ches sketchs portint ches noms ches pus inattindus. Seul’mint, mes gins, à l’instar d’ches séries américaines, l’première saison alle finit in ieau d’boudin. In n’connôt pon l’nom d’euch coupape. In l’saura p’t-ête dins l’saison deusse…
In attindint, l’carrière d’Rachida alle prind eune aute voie. In l’artreuve dins un rôle gramint pus dramatique. Alle a affaire à l’justiche. Nin ! Alle ne ch’artreuve pon derrière ches barreaux. Alle a com’ rôle cheule qui dot faire du ménache. In ch’arppell’te ch’t’intrigue. Pou faire simpe, alle a affaire à eune binde d’vilains juges qui li querch’tent des poux dins ch’tiête. Is ont querre à ches viux barreaux et, just’mint, is n’ont pon invie qu’in fache l’ménache. Ch’est un rôle qui n’va pon arringer ch’carrière. Nin seul’mint, alle n’importe pon l’mointe récompinche, mais ch’est l’début d’eune traversée d’euch désert. Tertous i comminche à printe de l’arcul. Même sin imprésario, Nicolas, n’la choutient pus parel. Alle voudrot bin ch’lincher dins l’canchon et arprinte un tube d’Claude François, mais sin interprétachion d’el « mal aimée » n’a convaincu  perchonne…
Déchidémint ch’monte i est bin cruel pou ma Rachida. In est vit’ oublié, d’autint qu’el concurrinche alle est rute. In assiste à un grind succès populaire qui aurot pu ch’appeler « Binv’nue à ch’PS », mais qui, in fait, est un armèque d’euch film américain : « L’guerre d’ches rosses. » Toudis i est que sin imprésario i ch’artreuve aveuc eune vedette su eune voie d’garage. Cha n’est pon bion pou ches statistiques. I faut qu’i li treuve un rôle différint qui va l’armette in chelle. Ch’est ichi qu’in arvient à ch’nouvieau chpectaque. Com’ in peut vir qu’el mote alle est à ches comédies, voire à ches comédies burlesques, ma Rachida alle ch’dit qu’i faut qu’alle ch’inspir’te d’el méga star actuelle. Cheule qui n’minqu’te pon d’faire parler d’alle au moins deusse fos à l’s’maine, WonderSégo. Seul’mint, i n’faut pon faire eune mauvaisse imitachion. Ch’t’aute alle maîtrisse gramint bin sin rôle. Pon quechtion d’juer auchi cheule qui est touchée par l’grâche divine, même chi l’divinité in quechtion, in n’sait toudis pon d’ù qu’alle sort ! Bah, chi ! J’sus biête ! Ch’est un aute imprésario, Dominique…
Ch’est l’momint, ch’est l’instint. Exit Roselyne est ch’bionne humeur à drote, ma Rachida alle va explosser dins ch’qui va forchémint faire un triomphe et que j’ai d’jà nommé à ch’début : « Europe, me v’là ! » Ch’est eune comédie légère, même chi l’sujet i est chinsé ête grafe. Cha fait quéques jours que ches répétichions alles ont comminché et in achiste d’jà à quéques bionnes répliques. Cha promet ! Cha débute dins eune imbianche d’cour d’récré. Nin ! Cha n’a rin à vir aveuc l’partie d’muche-muche derrière un rideau. Ichi, in a fait appel à eune binde d’jonnes d’l’UMP pou ête figurints d’un grind ju. In les appell’te ches « pop », mais com’ Rachida alle n’est pon blonte, cha ne s’ra pon pou juer Marilyn Monroe, pop, pop pi, dou… Ch’est « Le Grill » ! In poss’te des quechtions à ma Rachida et alle dot donner ches réponches. Pou l’momint, in peut dir’te qu’alle n’est pon cor’ rintrée dins l’pieau d’euch perchonnache. Ou alors, alle n’a pon cor’ bin appris sin texte. Toudis i est qu’in peut vir qu’i y a quind même eune bionne imbianche su l’tournache et qu’cha n’est pon ches fous rir’tes qui minqu’tent. 

Mes gins, i faut quind même que j’te disse eune cosse. Ch’est min rôle d’chroniqueusse, après tout. J’ai l’impréchion qu’alle chur-jue sin rôle ou alors, ch’est qu’in li fait des catoulles. A’ch’t’heure, in n’sait pon, nin pus, d’ù qu’alle étot juss’ avint. Alle avot p’t-ête un cocktail aveuc ches producteurs. J’n’sus pon à même d’donner min opinion su ch’t’oeufre, étint donné qu’alle n’est pon cor’ sortie. In est d’jà sûr’te qu’ches premières répétichions alles fon’tent parler d’alle. Ch’est prech’que évidint qu’alle va faire ch’t’Une d’ches magazines et l’tour d’el planète, grâche à ch’Net. Nou’z’autes, in n’a pon fini d’in rir’te… jaune. Cha n’va pon chinger gramint. J’sus in train d’em dir’te qu’in devrot auchi intervertir tous ches rôles et mette ches comiques à l’plache d’ches politiques. A m’mote, cha n’pourrot pon ête pir’te. Pis quo qui va ch’pacher quand WonderSégo alle ch’aperchevra que ma Rachida alle li a piqué ch’plache in haut d’euch clach’mint ? Ne minque pon l’chuite su ch’t’écran…