Chalut mes gins ! J’n’sais pon chi ch’est pach’qu’i y a eune partie d’el France in vacinches, toudis i est qu’i n’y a pon gramint d’informachions intéréchintes à ch’mette chous l’dint ! Ch’est p’t-ête dû à ch’fait qu’i y a auchi des coupures sauvaches d’électrichité. Ving dius ! J’espère que j’vais avoir l’timps d’finir ichi chins qu’in sot coupé. Pach’que, même chi j’ai prévu eune candelle et un cal’pin, cha s’ra gramint moins pratique pou ti d’em lir’te !

Bion, j’ai comminché à faire des incintachions in echpérint qu’un super héros i vienn’te m’sauver d’euch désert médiatique chins info et m’in apporter eune tiote. Juss’ eune tiote pou qu’in puiche pacher ch’ouiquen quind même ! Bah, cha n’vient nin ! Aucun super héros à ch’t’horizon. Ch’est toudis parel quind in a b’soin d’eusses, is n’sont jamais lal ! Quo que j’vais bin faire ? Canter eune canchon ? Faire ches pids à ch’mur ? Allez, mes gins, j’te fais marcher. Te sais bin que, même quind i ne ch’pache rin, in peut toudis compter su eune bionne copine qui va faire parler d’alle cor’ eune fos. Com’ i disot un messache d’pub, i y a qué années, j’in ai rêfé, Ségo l’a fait ! Après avoir télévingélissé ches gins du PS à ch’Zénith d’euch gloire. Pis, après diverches idées qu’alle a bin pris soin d’ringer dins sin frigidaire. Ma Ségo, quo que j’dis, Sœur Ségo, ch’est cor’ pus vrai à’ch’t’heure, alle ch’est treuvée eune nouvielle michion : Alle pache sin timps à réparer ches écarts d’parlache à min Nicolas…
Ch’est vrai qu’i y a gramint à faire. Min Zébulon 1^er i in lâche des bionnes chins s’in rinte compte, ches derniers timps. Cha dot ête l’churmenache d’méninches… Infin, cha n’date pon d’hier puich’que WonderSégo, in va l’app’ler com’ cha pou l’chirconstinche, alle a rattrapé ch’cop aveuc ches Sénégalais d’un dichcours d’pus d’deusse ins. Su l’momint, in ch’étot tertous chertain’mint dit qu’alle avot trop essayé d’boubous in plein solel et qu’cha ch’étot traduit par eune bionne insolachion. Que nenni, mes gins ! Alle vient d’armette cha et ch’est d’ichi in France. Com’ i est cor’ loin d’avoir l’canicule, cha n’a rin à vir ! Te m’diras, canicule, cha rime aveuc ridicule. Contrair’mint à ch’premier, ch’deussième i n’tue pon !
Infin, tout cha est v’nu d’min Nicolas quind i étot à un dîner aveuc des parlemintaires, très réchamint. In n’sait pon quo qu’in avot pu li mette dins ch’soupe, toudis i est qu’i a dit qu’Obama i minquot d’echpérienche. Que Barrosso i étot trop abchint. Que ch’vraie démocrachie, ch’est quind in est réélu tros fos com’ Berlusconi. Alors qu’in sait tertous qu’ch’est sin trossième mindat, dont i a été réélu qu’deusse fos. I y a des journalistes qui sav’tent compter quind même ! I a auchi dit qué cosse su Angela, mais j’n’sais pus trop quo. P’t-ête qu’alle minge trop d’choucroute, qui sait. In dessert, i a mis eune grosse ch’risse su ch’gâtieau in disint que Zapatero n’étot p’t-ête pon trop intelligint !
Bah, cha y étot ! I n’in fallot pon pus pou que WonderSégo alle sorte d’ches gonds ! A’ch’t’heure, alle ch’est sintie obligée d’faire un miot d’excusses à ch’Premier ministre echpagnol : « J’t’assur’te que ches propos n’ingageotent ni l’France, ni ches Français. J’t’assur’te, min Jose Luis Zapatero, d’toute m’considérachion, in partie pou ches réformes courageusses conduites in Espagne et churtout pou tin attach’mint à réaliser ches promèches d’cimpagne électorale, aveuc un comport’mint éthique qui devrot servir d’modèle. »
Ch’est ch’qu’in appell’te n’pon y aller par l’dios de ch’ceullère ! Pis, à l’intinchion d’tertous, alle ajoute :  « Ch’mindat d’Présidint d’el République impose un d’voir d’maîtrisse d’sin parlache et d’sin comport’mint afin de n’pon porter à ches intérêts d’el France. » Bion, j’ai invie d’ajouter qu’ch’est sûr’te, alle n’est pon présidint, mais ch’est quind même ch’t’hôpital qui ch’fout d’el charité ! In tout cas, mi, j’vos deusse trucs. In un, chi alle a inregistré tous ches dichcours à min Nicolas et qu’alle arvient su tous ches dérapaches qu’i a pu faire, cha va l’occuper eune paire d’timps ! In n’est pon sauvé, mes gins ! Quoqu’chi ! J’auros du grain à moute… In deusse, chi alle a fait eune lette d’excusses à Jose Luis, pouquo alle in n’a pon fait eune à min Barack ? Ch’est vrai, j’avos oublié qu’alle li in veut toudis. Ch’est pach’qu’i li a volé ches idées qu’i a gagné ches élec’chions. Pirate, i li a volé ch’archette !

Mes gins, j’m’excusse à ch’nom d’mi-même d’avoir décroché un sourire su t’guiffe. J’m’excusse auchi chi t’arçois eune goutte d’pluie, ch’ouiquen. J’ai eu l’malheur d’canter chous m’douche ch’matin. A’ch’t’heure, WonderSégo alle pourra ch’excusser pou mi d’avoir fait d’l’humour in m’moquint d’ches politiques. Pis, com’ cha t’a fait rir’te, alle ch’excuss’ra pou ti auchi ! Alloz in paix, mes gins ! WonderSégo alle veille su not’ parlache à tertous d’toute cha bravitute conte toute cheule ridiculitute…