Chalut mes gins ! Vingt dius ! I y a eune informachion d’el pus haute importinche et j’ai failli pacher à côté ! Infin, cha n’est pon vrai, puich’qu’in en parl’te com’ chi ch’étot révoluchionnaire. In pourrot même dir’te qu’in t’rebat ches orelles aveuc…

In n’el savot pon mais i y a eune nouvielle guiffe dins l’politique mondiale. I n’est pon très grind. Nin ! Cha n’est pon à li que j’pinsos. D’jà, pach’qu’i n’est pon nouvieau dins l’politique. Pis, pach’qu’i n’a pon l’bionne couleur. Cheule couleur qui a détrôné ch’vert d’l’echpoir, j’ai nommé ch’noir’te. I porte ch’doux nom d’Bo et, ch’est vrai, qu’i est plutôt bello. Ouais, mes gins, d’pis quéques jours, ch’est ch’quien à Obama qui li pique l’vedette. Cha n’a rin d’étonnint. In a tertous armarqué qu’in communique pus fachil’mint, aveuc quéqu’un d’aute, quind in a un quien aveuc so. Ch’meilleu ami d’l’homme i arrife, sins problème, à faire établir un dialogue intre deusse perchonnes qui s’rotent pachées, près l’eune d’l’aute, chins même ch’vir. Alors, ch’est sûr’te, in a l’impréchion que tout cha, dins ch’cas d’min Barack, i a été orchestré pou attindrir ches Américains. I faut bin l’admette, ch’présidint des Etats-Unis i a gramint promis pou ardrécher l’chituation, mais i fait quo qu’i peut aveuc cheule crisse.
Ichi, in France, in pourrot vir prochain’mint min Nicolas acater un quien li-auchi. Cha permettrot d’détinte ch’t’atmosphère quind i ch’rind quéque part. Seul’mint, ch’problème majeur, ch’est quelle marque d’quien ? D’après eune étude inglaisse, is ont évalué qu’à pus d’soichinte-diche pou chint, in vérifie ch’viux diction qui dit : Tel quien, tel maîte. Pourtint, je n’el vos pon printe un tiot quien. In aurot vit’ fait d’faire un parallèle et dir’te : ch’est un tiot roquet. I n’arrête pon d’aboyer et d’gesticuler. Parel, même à ch’baraque, t’el vos, ti, aveuc un bichon, par eximpe. Même chi in peut très bin imaginer Carlita in train d’dir’te te viens min bichon au lieu d’dir’te min amoureux…
In même timps, je n’el vos pon, nin pus, aveuc eune biête prech’que auchi grinte qu’li.Cha n’va pon ête un chox fachile à faire. Inchuite, vient un autre problème. Commint qu’in va l’appeler ? Ch’est importint, l’chox d’un nom pou un quien. Pech’que autint qu’pou un gamin ! I faut pinser à éviter ches jux d’miots ! Min Barack, i a eu eune idée toute simpe. I a pris ches inichiales, mais pou min Nicolas, cha n’va pon ête auchi fachile… In effet, cha donn’rot, pou sin quien, Enès (NS chi te n’as pon compris) ou Esen ! Heureuss’mint qu’sin prénom n’est pon Michel, par eximpe. I y aurot eune combinaison gramint tindinchieusse…
Parel, chi in prind ches inichiales à Carla, in n’aurot pon fini d’intinte, dins ches couloirs d’l’Elysée : « Mais d’ù qu’alle est cor’ muchée cheule Cébé ! » In va p’t-ête éviter CBS, cha f’rot trop chaîne d’informachion. Ches niouzes, à min Nicolas, in in a d’jà bin assez com’ cha ! Bion, i faut que j’li donn’te un cop d’main à min présidint. Gramint d’gins is l’churnomm’tent Zébulon 1^er, à cosse d’euch fait qu’i n’arrête pon d’bouger ches épaules, com’ ch’i étot monté su arsort. Cha s’rot fachile d’donner com’ nom Pollux à ch’quien. A’ch’t’heure, in n’peut pon dir’te qu’in vit dins ch’manèche inchinté. Pis, ch’est parel, i faudrot treuver eune Azalée, com’ l’vaque. Mes gins, j’te l’dis toud’chuite : N’compte pon su mi pou avincher un nom ! Ambroise, ch’t’escargot, in vot pus fachil’mint des noms mais ch’est parel, t’in prinds l’inichiative…

Aveuc tout cha, j’m’imball’te, j’m’imball’te, et j’ai dérivé d’min sujet d’euch début : Ch’quien à Obama. Pach’que te pinses bin qu’cha m’a toud’chuite donné l’idée d’eune tiote parodie à l’Toutoule. Alors, voichi eune adaptachion très perchonnelle du quien dins ch’vitrine d’très grinte Dame : Line Renaud.

Ravise bin min quien, ch’est eune vedette

I pache à l’tévé com’ un grind

Ravise bin min quien, ch’est eune vedette

I est bieau et tout trépidint

J’n’avos pus d’idée, ch’est vraimint biête

Pou calmer ches echprits grincheux

Alors ch’est min Bo et ch’est pon biête

Qui va rinte ch’monte tout joyeux

Ravise bin min quien, ch’est eune vedette

I pache à l’tévé com’ un grind

Ravise bin min quien, ch’est eune vedette

I est bieau et tout trépidint

Cha n’me coûte rin sauf eune gamelle

Bin moins quer qu’un aute concheiller

Qui s’rot toudis pindu à mes ch’melles

Et que j’pourros pon carécher

Ch’est pon ch’plache qui minqu’te à ch’mason blinche

Pou qu’in l’fim’te su tous ches ingles

Pindint ch’timps lal mi, j’ai carte blinche

Quind i fait l’pitre dins ch’tiot rectingle

Ravise bin min quien, ch’est eune vedette

I pache à l’tévé com’ un grind

Ravise bin min quien, ch’est eune vedette

In f’ra d’li un vrai présidint