Chalut mes gins ! Bah ch’est com’ cha. I y a des lois qui fon’tent parler d’alles gramint d’timps avint qu’alles soient votées. Pis, cha continue pindint ches votes. Et com’ un bion film à suspense, même chi in pinse t’nir l’choluchion, t’as un arbondich’mint d’dernière minute qui fait qu’el fin alle n’est pon com’ te l’avos prévue. Ches productions Marie Toutoule sont fières com’ l’biroute d’un bar toubac d’te présinter : « Hadopi au tapis. »

Com’ pou tous ches films, i faut qu’in monte insimpe un dochier d’prèche pou qu’in présinte un futur succès d’euch box offiche ou un bide. Cha, in n’el sait qu’après. Alors, in n’va pon rev’nir su ch’princhipe de ch’loi Hadopi. On a d’jà vu cha, i y a un mos, dins min artique que te peux arlir’te et qui est ichi : http://www.marietoutoule.com/article-28917968.html. Min problème, ch’est que j’ne sais pon dins quelle catégorie j’vais l’mette, ch’film. A ch’début, j’auros plutôt dit qu’ch’étot com’ West Side Story. In effet, in ch’artreuve aveuc deusse bindes rivales. Ches Députés pou et ches défincheurs d’ches drots d’auteur, d’un côté. Ches pirates qui télécharg’tent et auchi eune partie d’députés conte, d’l’aute. In peut vir toud’chuite qu’in n’a pon deusse cimps distincts. T’as des députés qui sont d’ches deusse côtés. Alors, rapid’mint, j’pourros partir su un drame…
Mes gins, aveuc ch’dernier arbondich’mint d’jeudi dernier, mi, j’auros plutôt invie d’mette cha dins eune bionne comédie burlesque. In effet, quind in t’annonche que tout i est prêt, à ch’carré. In a vu tous ches points d’diverginches. Qu’in n’a pus que ch’vote définitif à faire. Qu’in comminche à dir’te partout, dins ches journaux, qu’cha y est, ch’loi alle est pachée. Gare à tes fèches, pirates ! In va t’couper cheule connec’chion. Pis, com’ tertous i part d’euch princhipe qu’ch’est bion, in n’prind même pon l’peine de ch’déplacher. In ch’artreuve aveuc eune fin qui n’étot pon prévue. Mais d’ù qu’is étotent pachés tous ches députés. Trinte-chix su chinq chint soixinte-disse-chept !
Pis t’as tous ches ingrédients. Te mets quinsse députés UMP et te mets vingt et un députés PS derrière un grind rideau. Ches députés PS is rechtent muchés jusqu’à l’dernière minute. A ch’momint d’ches votes, t’as ches UMP, ch’est tout juss’ ch’is n’ont pon d’jà sorti l’apéro pou fiêter cha. Seul’mint, ch’est chins compter su ches coquins du PS qui arrif’tent et qui votent conte ! Te t’imagin’tes, ti ! In dirot qu’in ch’artreuve dins eune cour d’récréachion et qu’eune binde d’écoliers alle a déchidé d’juer un bion tour à ches autes. J’intinds d’ichi ches moqu’ries dins l’ginre : « Na, na, na ! In t’a bin eu ! » Heureuss’mint qu’sœur Ségo alle étot in Afrique, in train d’essayer ches boubous. Chinon in aurot pu croir’te qu’alle a tout maniginché pou faire dichputer ches élèfes d’el clache gouvern’mint. Ch’est qu’i n’est pon contint l’maîte ! Min Nicolas i a d’jà inguirlindé Jean-François Coppé et Roger Karoutchi. Te cros qu’i les a mis à ch’coin ?  Pis t’as Christine Albanel qui fait eune grosse colère. In a caché sin juet !
In pourrot treuver cha très drôl’te, mais i n’faut pon oublier qu’ch’est des élus ! Qu’ch’est aveuc l’argint d’ches impôts qu’in donn’te, qu’in les pay’te et cha n’est pon à che SMIC ! Alors, quind j’intinds in pus, qu’in donn’te com’ excusses qu’cha n’avot p’t-ête pon été eune bionne idée d’faire voter cheule loi juss’ avint un ouiquen Pascal et qu’ch’est pou cha qu’i n’y a pon eu d’mobilisachion. Te parl’tes, ti ! I n’y a pon gramint d’indrots d’ù qu’in pay’te ches gins même ch’is n’ont pon invie de v’nir à ch’traval !  Pou résumer, nou’z’autes ch’est : Travailler pus pou gagner parel, pach’que tout i a augminté. Pis, j’sus gintille pach’que j’pourros dir’te pou gagner moins. Ch’qui dot ête vrai pou gramint d’gins ! Ichi, eusses ch’est : Travailler chi in in a invie. In ch’in fout, in est payé quind même !
In pourra réviser eune echpréchion. Pach’que, quind te chouhaites à quéqu’un bion ouiquen. In général, te l’fais l’vinderdi. Cha chous-intind sam’di et diminche. Eune vraie fin de s’maine, quo ! Aveuc ches députés, ch’est gramint différint. Ch’est l’mercredi qu’te leu dis bion ouiquen. Puichque, l’jeudi, is sont d’jà pus lal ! Is ont ringé ches crayons l’mercredi soir. Vingt dius ! Tros jours d’traval par s’maine, mi, ch’est déchidé, j’veux ête député ! In attindint, cha n’va toudis pon pou cheule echpréchion. Quo qu’i faut qu’in diss’te alors ? Bionne mitan de s’maine… Ch’est eune mitan qui est plutôt à leu avintache. In n’peut toud’même pon dir’te bionne s’maine. J’sus sûr’te que cha aurot pou effet d’diminuer cor’ pus leu timps d’traval.
A’ch’t’heure, pou rattraper ches pots cachés, in veut déplacher eune aute loi à voter. Cha ! I faut bin qu’in ch’rinte compte, nou’z’autes, qu’is sont overbookés et qu’i n’y a pon d’aute choluchion que d’arporter, à pus tard, eune loi. I faudrot p’t-ête qu’in leu disse d’printe des ouiquens com’ tertous et is aurotent gramint pus d’timps ! Quind in travaille tros jours, ch’est mathématique, in in fait moins qu’in chinq ! Pis, j’ne sus pon convaincue qu’eune loi su l’inceste n’est pon pus prioritaire qu’eune loi qui a l’don d’mette ch’zizanie d’pis l’début ! Te n’cros pon qu’cha s’rot chertain’mint eune meilleu idée d’armette tout à plat et d’treuver qué cosse d’miux ? Pach’qu’in oublie p’t-ête trop vit’ que, même chez ches auteurs, alle n’fait pon l’unanimité. Alors, pouquo qu’in veut absolumint faire d’euch forcing ? Pou protéger ches intérêts d’ches artistes ? Ch’est l’verchion offichielle, mais n’y aurot-il pon quéques-uns qui ont invie d’gagner cor’ pus d’pépettes ? Mi, j’comminche à m’el d’minder… Ch’prochain numéro i est à ch’vingt-huit avril. Alors, com’ cha risqu’te d’bouger cor’ gramint. D’autint qu’in annonche eune manif nachionale pou qu’in l’interr’te définitiv’mint. J’vais ête obligée d’modifier min tite. Cha va dev’nir :  Hadopi au tapis volint… I verra bin d’ù qu’ch’est qui va ch’posser…

Mes gins, tout ch’bazar dot bin faire rir’te ches autes pays ! Nou’z’autes auchi, d’ailleurs. Sauf qu’in est in train d’finincher cheule produc’chion et qu’in sait d’jà qu’alle va faire un bide ! Bin, j’arviens à min point départ aveuc ches films. Alors, j’vais conclure par deusse cosses. In premier, j’auros invie d’dir’te PS qui rit, UMP qui braie. D’ailleurs, cha march’te dins ches deusse chins. Na, na, na, na nère… J’essay’te de m’mette à ch’même niveau ! Pis, in deusse, à tous ches députés UMP qui n’ont pon jugé bion v’nir voter un jeudi et qui, à’ch’t’heure, is ont invie d’braire. J’leu dédie eune phrasse légèr’mint modifiée d’un film célèpe aveuc des gamins qui fon’tent ches quate chints cops, l’Guerre d’ches boutions : « Chi j’auros su, j’auros v’nu ! »