Chalut mes gins ! J’n’sais pon chi t’es com’ mi, mais ch’est l’périote d’ù qu’in a vraimint invie d’mette toutes ches fouffes d’hiver à ch’placard. In les a assez vues et, churtout, assez misses pindint ches longs mos. In ardécoufre auchi toutes ches fouffes pus légères. I faut dir’te que ches rayons d’solel donn’tent invie d’inl’ver quéques couches pou ête pus à l’aise. I vient auchi l’timps d’ù qu’in comminche à pinser à ches vacinches…

In s’ra chertain’mint gramint à n’faire qu’y pinser aveuc cheule crisse. Infin, ch’qui est bin, ch’est qu’à Gardincour, i y a toudis d’el plache. In attindint, cha n’coûte rin d’rêfer. D’ù qu’ch’est qu’in va bin pouvoir aller ? Quel pays in va visiter ? Is ont quind même gramint d’chince, ches politiques, à toudis aller à drote et à gauche… Ch’est chertain’mint cha qui m’a plongé dins un rêfe bizarre. J’me sus dis qu’cha s’rot vaqu’mint drôl’te chi tertous i f’sot com’ Sœur Ségo. In peut dir’te, mes gins, qu’alle est précurseur in l’matière. Alle arrife à ch’Sénégal, alle ch’met in boubou bleu. Alle arpart, alle ch’met in boubou aveuc gramint d’jaune. Nin, ti, j’t’arrête toud’chuite ! Chi alle avot voulu rechter incognito, alle n’aurot chertain’mint pon fait parler d’alle com’ alle l’a fait ! In tout cas, cha mettrot d’euch pimint dins ches déplach’mints et ches visites offichielles…
Te t’imagin’tes, ti, min Nicolas qui dot aller vir ch’présidint russe. I pourrot sortir eune bielle t’nue d’cosaque. J’sais bin qu’cha n’est pon vraimint l’costume qu’in vot cor’ dins ches rues. Cha pourrot ête gramint drôl’te quind même ! Pis, pou eune fos, chi in li f’sot dincher le casatchok, cha li f’rot bouger pus ches gambes qu’ches bras. Cha ching’rot ! Nin, j’sais bin que, chouvint, i prind aveuc li eune perchonnalité qui est quéqu’fos d’euch chpectaque, mais je n’el vos pon imm’ner Rika. Pou ches Russes, cha s’rot vraimint un chock ! Pis, quind i irot faire eune balate in écosse, te cros qu’i mettrot un kilt ? Pach’que cha n’est p’t-ête pon eune bionne idée d’risquer un inchidint diplomatique à causse d’sin instrumint présidinchiel qui pourrot ête photographié par un paparazzi ! Te m’diras, mes gins, ch’est chertain’mint pou cha qu’in a mis un contrepods d’vint cheule jupe. Pou n’pon qu’tout i sot à l’air in cas d’courint d’air…
Min Benoît Hamon, j’el verros bin aller visiter Venisse. J’n’sais pon pouquo, mais j’el chins bin Rome antique. Bin, nin ! Cha n’n’va nin ! Chi ch’est Venisse, ch’est nin Rome. J’voulos écrir’te romantique. A forche d’acouter Titine qui fait des éloges d’sin physique d’Apollon, cha m’a toute armué. Ouais, j’sais, Apollon, ch’est nin un Italien. In n’va pon chipolater pou cha. Cha ress’ européen, ch’est d’jà pon chi mau ! Ving dius, te n’y es pus Marie Toutoule ! Te parl’tes d’Benoît Hanon, et v’là qu’te pinses chauchisse. Nin, j’voulos dir’te chipoter. Alle a raison Titine d’Lille, i fait tourner ches tiêtes d’ches femmes. Allez, in arvient chérieux. Chi, ch’est pochipe ! Même ch’i est d’euch pays d’ches capieaux ronds, j’treuve qu’cha li irot bin d’ête in gondolier. Forchémint, j’auros querre à ête d’euch voyache, su ch’gondole, com’ tertoutes, et m’laicher bercher par sin doux cant d’amour : « O Solferino, d’ù qu’j’ai min burieau. O Solferino, aveuc eune chef dins l’dios. O Sol, O Solférino, j’sus bin miux su l’ieau que dins min burieau… » Millard ! J’cros bin qu’i a quée dins l’flotte. J’n’ai pus qu’à aller l’arpêquer et li faire d’euch bouque à bouque…
Tiens, in va in parler just’mint d’Titine d’Lille. Ch’est vrai, in li arproche toudis d’ête harnaiquée aveuc un sac à patates ! Ch’est vraimint pon gintil pou alle. J’sais bin qu’alle est l’cheftaine d’el capitale d’ches Flandres et qu’el patate, ch’est com’ un imblème. Mais quind même ! Infin, ch’est toudis miux qu’chi in l’avot prisse pou un Maroilles, qui, com’ ch’définichion wikipédienne alle dit : « pâte molle à croûte lavée rouche orinchée. »  Quo qu’alle pourrot bin aller vir com’ pays ? Alle a déclaré qu’alle v’not d’euch Nord et, donc, qu’alle n’craignot pon ch’frod. Cha quée bin, i n’y a jamais gramint d’cindidats pou aller dins ches frods echtrêmes. Te n’peux pon m’dir’te que te n’es pon d’accord. In vot pus ches politiques dins ches pays d’ù qu’i y a solel qu’ailleurs. Pis, lal, aveuc eune grosse doudoune in pieau d’biête et eune capuche su l’tiête, in recht’rot dins l’echprit d’euch Nord. Cha rappell’rot l’K-way d’min Dany aveuc eune capuche bin cherrée pou qu’in in voi’te un minimum…

Aveuc tout cha, j’n’sais vraimint pon quo que j’vais pouvoir aller vir com’ pays. J’auros bin été tintée par ch’Sénégal, mais Sœur Ségo alle m’a piqué l’idée d’euch boubou. Quoque j’puiche toudis in mette un rosse. Bion, in attindint, i ress’ gramint d’destinachions pochipes. Alors, j’ai d’jà fait eune préchélec’chion pou savoir quo qui m’irot l’miux. Pis, mes gins, chi t’arconnos ches pays, te peux toudis les mette in commintaire. J’te l’dis toud’chuite, i n’y a rin à gagner. Ch’est pou rir’te…