Chalut mes gins ! Quo qui ch’pache dins ch’monte ? Bah, cha va toudis autint d’traviole ! Pire, cor’, cheule Tierre alle trimbl’te ! Cha n’est pon l’meilleu nouvielle qu’in puiche annoncher. Churtout pou ches gins in Italie. Forchémint, même chi in n’les connôt pon, in n’peut ête que d’tout cœur aveuc eusses. Ch’artreuver chins rin d’euch jour à ch’lind’main, cha n’dot pon ête simpe à vife. D’autint quind t’as ch’présidint d’euch concheil italien qui déraill’te auchi…

Quo qu’ch’est qui ch’pach’te in ch’momint ? Tous ches gins qui sortent du n’importé quo. J’ai bieau essayer d’treuver eune echplication, à tous ches déraill’mints à répétichion, j’n’vos pon. Alors, j’pourros faire appel à ches héros d’cheule série américaine Numbers. Du moins, faire com’ eusses pou savoir ch’i y a eune echplicachion mathématique. In va printe uniqu’mint su un mos. Com’ i dit ch’matheux dins ch’série, après, cha fait gramint trop d’variapes à t’nir in compte. Un mos, cha fait qu’in arvient à ch’Pape qui comminche à dérailler in disint qu’el machine à laver ch’linche alla a permis à ches femmes de ch’épanouir. Pis, com’ i n’fait pon dins la dintelle, il continue chous l’solel. Pon d’St-Tropez, drogué d’tévé, mais d’Afrique, in disint que ch’capote alle n’est pon eune soluchion… In connôt l’chuite ! Donc, pou ches variapes, j’ai deusses bêtisses papales et deusse indrots : un in Italie ; un in Afrique.
A’ch’t’heure, in a Sylvio Berlusconnerie. Pardon, j’cros qu’j’ai l’berlue, j’ai dû mau lir’te et j’ai fait eune conn’rie. Cha n’est pon tout à fait l’bionne orthographe. Infin, dins ch’grammaire françaisse, in sait qu’i n’y a jamais d’faute su ches noms propres. In va dir’te Sylvio, com’ cha, ch’est pus simpe ! Ch’ti-lal, i n’y a pon à dir’te, i sait armonter ch’moral des gins. Ch’i n’y avot pon eu tous ches morts et tous ches dégâts, j’cros qu’in aurot rigolé un bion cop. A m’mote, i dot faire d’euch cabaret ches ouiquens pou arrondir ches fins d’mos. Sin One Man Show, cha l’fait p’t-ête rir’te quind i répète d’vint ch’glache, mais cha n’a pon vraimint fait rir’te ches autes. Tourner cheule catastrophe à ch’rigolate in disint qu’cha s’rot com’ un ouiquen in campinge, pou tous ches gins qui ont tout perdu… Te n’y es pus, min Sylvio ! I faut croir’te que ch’trimbl’mint d’tierre i est armonté jusqu’à tes neurones ! Chi in li met auchi ch’cop d’euch téléphone, qui l’a mis in artard à ch’sommet d’l’Otan, cha fait auchi deusse bêtisses pou ches variapes et auchi deusse indrots : un in Italie ; un in France.
Chi in ch’arrête ichi, in pourrot in déduir’te qu’in dit gramint pus d’bêtisses quind in est italien. Cha s’rot complèt’mint faux, puich’qu’in sait que ch’Pape i est aAllemind. Alors, est-che que ch’est l’Italie, deusse fos in variape, qui fait dir’te des bêtisses ? Nin ! Ch’est évidint ! I n’y a qu’à raviser ichi, in France, pou ch’aperchevoir que, ches bêtisses, in in dit gramint auchi. Tiens, pou preufe. Te fais rintrer dins cheule équachion Sœur Ségo. Cha y est ! J’in vos d’ichi qui ch’diss’tent : In va ch’artreuver aveuc des variapes à la pelle ; in n’ch’in sortira jamais. Bion, cha n’est pon complèt’mint faux. Alors in va juss’ printe cheule qui parl’te à ch’t’Afrique in boubou bleu. D’un cop, cha fait tout chinger quind même ! Te t’artreuves aveuc deusse bêtisses dites in Afrique. Eune pou min Benoît, eune pou ma Ségo. Alors, cha s’rot ch’climat qui est favorape à ches déclarachions foireusses ? Ches touristes qui n’chupport’rotent pon cheule caleur africaine. Is t’fon’tent eune crisse d’cervieau boulli ? Va t’in savoir, ti ! In sait d’jà qu’in peut éliminer ches couleurs. Min Benoît i étot harnaiqué tout in blinc et Sœur Ségo, tout in bleu.
A’ch’t’heure, eune nouvielle variape alle peut in mucher eune aute. Du moins, t’in arcoller eune dins ches pattes. Ainchi, chi in rajoute ch’qu’a répondu Alain Destrem. Com’ quo, Sœur Ségo in boubou bleu, cha li rapp’lot ch’femme d’ménache. Cha fait monter ches variapes. Pis, in pus, in ch’artreuve aveuc tros inconnues. Est-che que min Alain i est raciste ? Première inconnue. Pach’que ches propos sont limites. Pis, inchuite, est-che que ch’femme d’ménache alle est déclarée ? In tout cas, à’ch’t’heure, tertous i sait qu’i in a eune et alle a plutôt intérêt à l’ête. Pou finir aveuc li, est-che qu’alle ne s’rot pon in chituachion irrégulière ?
In pourrot subodorer cor’ aute cosse, mais cha, j’sus pratiqu’mint sûr’te qu’in n’peut pon l’art’nir pou cheule équachion. Te n’vos pon ? Bah, je t’el life tel quel alors : Ch’est Sœur Ségo qui viendrot faire sin ménache in boubou bleu pou rechter incognito ! Cha echpliqu’rot bin des cosses et, churtout, qu’i a fait eune méga gaffe. Pach’que, même chi j’n’ai pon invie d’art’nir cheule hypothèsse, in peut y vir eune pochibilité bin réelle. D’pis qu’Titine d’Lille alle a gramint cherré ch’vis dins ches dépinches à Sœur Ségo, alle dot payer pus d’trucs. Ch’est l’crisse pou tertous et alle a p’t-ête b’soin d’arrondir ches fins d’mos, alle auchi ! J’l’intinds d’ichi maudir’te min Nicolas : « Tra-va-iller pus pou gagner pus, mais j’ai tou-dis au-tint d’mau à join-dre ches deusse bou-bous ! »
Te vos, mes gins, chi in tient compte uniqu’mint d’ches deusse derniers, Sœur Ségo et Alain Destrem, in pourrot aisémint conclur’te qu’ch’est in France qu’in dit l’pus d’conn’ries. Deusse Français et deusse fos in France. Pis, chi in rajoute min Nicolas et ch’binde, Titine et l’chienne, in frisse ch’grind Bing Bang d’ches bêtisses, toutes conn’ries confondues ! Mais cha s’rot cor’ trop rapite. Pach’qu’in aurot oublié ches deusse premiers. Pis, te n’peux pon m’dir’te qu’is n’sont pon assez bions cindidats pou qu’in n’les laich’te pon in lice. Alors, chi in arvient à cheule équachion à posser pou quate concurrints, cha donn’te : deusse bêtisses papales, quate bêtisses politiques, pach’qu’in a gramint arrondi. D’jà in sait qu’ches politiques is in fon’tent pus que ch’Pape. Heureuss’mint, quind même, li i est tout seu ! Chi in posse ches lieues, in ch’artreuve aveuc tros in France, deusse in Afrique et deusse in Italie. Ch’est pach’que cheule réunion d’l’Otan alle ch’est faite in France. Chinon, in che s’rot artreuvé aveuc deusse partout et eune inconnue. 

Mes gins, forche est d’conchtater qu’in vient d’proufer qu’ches séries alles n’diss’tent pon toudis l’vérité. In n’peut pon tout résoute aveuc ches mathématiques, contrair’mint à ches frères dins Numbers. Com’ in n’peut pon tout résoute aveuc des miots nin pus ! Ch’i y a eune constatachion à faire ichi, puisqu’in n’peut rin démontrer, ch’est que ch’conn’rie humaine alle est malheureuss’mint univerchelle et qu’aucune équachion alle n’peut in v’nir à boubou. Pardon, à bout, tint ches variapes, ches paramètes is sont nombreux. Pis, parel pou ches inconnues, même chi ches pus grosses bêtisses alles sont dites par des gins connus…