Chalut mes gins ! Vingt dius ! Cha a été un ouiquen riche in politique et auchi riche in déclarachions d’toutes chortes. Ch’est gramint rar’te qu’i ch’in pache autint, même un diminche. Bah, ch’est com’ cha ! Ches politiques is ont fait eune ouverture excepchionnelle l’diminche in ch’disint :  « Ches gins is ont gramint pus d’timps. Is sont moins préchés. In va pouvoir echpliquer tout quo qu’in a prévu pou sauver ch’monte et l’armette dins l’bion chins. » Seul’mint, in a tout eu en même timps. Ch’étot à ch’ti qui allot faire l’offre l’pus alléchinte. Quo qu’in fait, nou’z’autes, pou ch’y artreuver dins tout cha…

Bion, j’n’ai pus qu’à essayer d’faire un catalogue d’ches promochions. Cha sold’te à tous ches rayons… Pou utilisser eune phrasse publichitaire d’eune célèpe boutique parisienne, j’ai invie d’dir’te qu’i ch’pache toudis qué cosse in France. Par eximpe, à ch’sommet d’l’OTAN, in a atteint des sommets dins ch’n’importé quo et, churtout, dins ches débord’mints. Te sais, un peu com’ ch’premier jour d’ches soldes. Quind tertous i veut rintrer in même timps et qu’cha ch’bagarr’te pou avoir l’même truc. Cha n’est pon très glorieux. Même ches charognards dins ch’nature is n’euch battent pon autint ! Pis, ch’est toudis parel. Qui ch’est qui va payer toute cheule cache ? Bin, tertous, com’ d’habitute ! A m’mote, ch’chef d’rayon, qu’in appell’te préfet, i risqu’te d’ête virer. In va l’artreuver à ch’rayon d’euch PQ ! Mes gins, i n’faut pon printe ches deusse lettes à l’lette, just’mint. Cha n’est pon pach’qu’i y a eu d’euch brein. Cha peut auchi vouloir dir’te Préfet Quarintaine. Bion, cha m’énerfe tout cha. In va vit’ quitter ch’rayon d’ches démolichions pou aller dins un aute.
Rayon chport : In artreuve un facteur qui fait eune démonstrachion d’rindonnée aveuc sin tout nouvieau modèle d’chac à dios. Pou cha, i crapahute dins ches rues d’Strasbourg pindint quarinte-huit d’heures d’long. Min Olivier i est in très grinte forme. I n’a pon mau à ches pids grâche à eune paire d’bach’kets qu’i a acatées in promochion, dins eune tiote boutique d’Neuilly. Mais i n’faut pon ch’leurrer, mes gins ! I n’a pon acaté des Nike pach’que cha li rappell’te trop quéqu’un. I n’sait qu’trop bin qu’ch’est l’diminutif d’Nicolas. Même ch’i rêfe d’li marcher d’chus et d’canter à tertous, su tous ches tons, qu’i t’ni---- (chinsuré) d’pis qu’i est présidint ! Ch’est vrai qu’min Olivier i a gramint d’intraîn’mint et qu’ches mollets is doiv’tent ête in béton. Pis, i n’minqu’te pon d’air. Tout in marchint, i arrife à réponte à ches quechtions d’ches journalistes. Cha, ch’est parel. D’habitute, à Neuilly, i parl’te auchi in mettint ch’courrier dins ches boîtes. I a auchi montré à tertous qu’i ch’intéressot à un aute chport et n’a pon hésité à faire eune démonstrachion d’alter. Même qu’cha fait grind-bruit dins ch’monte intier et qu’ch’est pou cha qu’in appell’te cha altermondislisme !
Rayon fromache : In artreuve cheule représintinte offichielle d’euch Chabichou. Ch’bergère d’euch troupeau égaré. Cha fait gramint long qu’in n’avot pon intindu parler d’alle. Intre deusse chéinces d’photos aveuc un homme, su Paris Match et, à’ch’t’heure, Voici. Bin, la voici, l’arvoilà ! Infin, long, ch’est tout relatif. Disons qu’ch’est rar’te quind alle ress’ eune bionne s’maine chins sortir eune tiote phrasse d’sin frigidaire. Ichi, in peut dir’te qu’alle ch’artrape dur’te. Alle croyot p’t-ête qu’in étot in minque… V’là qu’alle vir’te à ch’rouche vif ! In in viendrot même à l’argretter in rosse. Même chi cha n’li allot pon vraimint nin pus ! Quo qu’i ch’pache Sœur Ségo ? T’as intindu ches vox d’el révoluchion, ch’est cha ? Te n’treuves pon qu’ch’est d’jà assez ch’bazar com’ cha… Quo qu’te préfèr’tes com’ rôle quind te vas présinter t’cimpagne d’promochion d’euch Chabichou ?  Ségo Danton ? Nin, mi, j’sais : Ché Ségolèna ! T’as d’jà ches frisettes. I ne t’minque pus que ch’béret basque. Pis, t’as l’avintache su l’ch’tie. T’as gramint moins d’route à faire, d’ta Charinte. T’as churtout treuvé un moyen d’faire cor’ parler d’ti. Attinchion, te n’pourras pon faire l’tournée aveuc ch’facteur. Ch’est un byclou qu’in leu donn’te à ch’pochte, pon un tandem !
Rayon bouqu’rie :  In annonche un tout nouvieau rayon, ch’ti du Kebab ! In effet, grâce à un arprésintint v’nu tout drot d’euch pays d’ches imburgères. Mister Obama i aurot querre à ch’qu’in mette un rayon turc in pus dins ch’magasin européen. Mi, j’auros bin invie d’li dir’te : Mais d’quo te t’mêles, ti’z’aute ! Te n’treuves pon qu’cha sint assez ch’Kebab com’ cha quind te fais l’brad’rie d’Lille. In finit même par che d’minder chi ches moules alles ont cor’ du sintimint ! Te t’prinds pou qui ? Ch’Ro ? Ch’Ro d’euch imburgère, p’t-ête, mais in rappell’te qu’te n’es pon ch’Ro d’euch monte ! Est-che que min Nicolas i t’a d’mindé d’printe Cuba, pou éviter tout ch’trafic d’barreaux d’caïlles chez ches grinds patrons et ches millionnaires ? Nin ! In invisag’ra ch’rayon Kebab quind in in f’ra chint pou chint pur porc. Quo ? Ch’est pon prêt d’arrifer… Ch’est com’ ti aveuc ch’baie d’ches cochons. In peut dir’te que cheule bestiole alle met d’el discorde intre ches gins. Allez min Barack… N’fais pon t’tiête d’cochon ! Pardon, j’n’voulos pon dir’te cha ! N’fais pon t’tiête d’mule !
Rayon produits d’entretien : In annonche un grind artour in arrière. Finis ches aspirateurs qui fon’tent gramint d’bruits. A’ch’t’heure, pou inl’ver ch’pouchière d’eune vielle statue, par eximpe, in li tapote d’chus aveuc doigté. Ch’est ainchi qu’in a pu vir Michelle Obama in pleine démonstrachion dins ch’rayon. Alle a inl’vé ch’pouchière qui d’vot y avoir su ches épaules à Elisabeth deusse in li tapotint d’chus. Te parl’tes, ti ! Cha a choqué ches Inglais ! Pouquo ? A m’mote, ch’est pach’que Michelle alle n’a pon mis d’gints. Ches Américains, qui n’arcul’tent d’vint rin pou sortir d’el crisse et churtout faire l’bionheur d’el clientèle européenne, in particulier inglaisse, is proposs’tent d’rimplacher cheule vielle marque d’euch groupe Hutchinson. Ch’est ainsi qu’in débaptiss’ra Mapa pou app’ler ches gints Mima ; contrac’chion  évidinte d’Michelle Obama.
Rayon écologie (juss’ à côté) :  In annonche que ch’rayon i in a pris un cop et qu’in va p’t-ête d’voir l’fermer. In fait tout pou qu’in pinse à cheule planète in proposint des produits qui n’pollu’tent pon. Parel, in d’minde à ches gins de n’pon printe ches carettes pou faire chint mètes.  Pis, t’as Michelle qui fait cha vedette. Alle oublie qu’alle étot auchi dins ch’rayon des produits d’entretien nin polluints juss’ avint. Alle arfusse d’monter dins ch’bus qu’in a mis à dichposichion d’ches femmes, à ch’sommet d’l’OTAN. Alle préfèr’te cha limousine. Rin à vir aveuc l’vaque d’euch même nom. In n’est pon à ch’rayon bouqu’rie. Quo qui ch’pache, Michelle ? In avot pourtint l’impréchion qu’t’étos eune gintille file. Te n’vas quind même pon dir’te qu’ch’est pach’que Carla alle sintot des d’chous d’bras ! Alle met du déo Obao, madame Obama ! Ch’est vrai, j’oublios ! I fallot bin qu’te la montres, cheule carette fabriquée à ches Etats Unis. Pach’qu’aveuc cheule crisse, alle s’ra bientôt collector… Infin, ch’est toudis parel aveuc ches touristes. Quo qu’is vienn’tent faire ch’brein ichi, in France ? In est bin assez grind pou l’faire tout seu !
Rayon vidéo et musique : In annonche qu’in va bintôt treuver un nouviel alboum d’Carla. Ch’est d’ailleurs bin l’seu qui n’risqu’te pon d’ête soumis à cheule churveillinche d’loi Hadopi, qui vient d’ête votée. Commint cha ? Bin, in n’télécharg’te pon in pirate un alboum d’Carla. Nin, mes gins ! Perchonne i n’va l’faire et in che d’minde bin pouquo ! A’ch’t’heure, alle n’a pon cor’ fini d’écouler sin stock, pouquo un nouviel alboum ? Ch’est pach’que Michelle Obama alle a infin donné l’raison pou laquelle alle avot gardé ch’limousine plutôt que d’printe ch’bus. Dins sin coffre, i y avot un cadieau pou Carla. Eune bielle guitare ! Pis, attinchion, alle n’a pon arculé d’vint ch’dépinche. Ch’est eune Gibson, l’rolls d’ches guitares ! A’ch’t’heure que Carla alle a eune nouvielle guitare, cha la déminge. Alors, alle n’va pon tarder à la gratter un tiot peu. Cor’ heureux qu’Michelle alle n’ait pon eu l’idée d’li offrir eune batt’rie, pach’que t’as d’jà min Nicolas qui n’arrête pon d’gesticuler, çha l’aurot ch’coué cor’ pus ! Te parl’tes, ti, aveuc eune grosse caiche dins ches orelles…
Rayon téléphonie : In artreuve un arprésintint italien qui fait l’zazou aveuc sin nouvieau portape. Mais ch’est un modèle tell’mint compliqué que Sylvio, ch’est sin tiot nom, i n’arrife pon à treuver ch’boution pou décrocher. Ch’est bin connu, mes gins. Quind te veux faire eune démo, te t’plintes ! D’euch cop, i arrife in artard à cheule réunion et i ch’fait armarquer par tertous ! Ches italiens, toudis à rouler d’ches mécaniques partout d’ù qu’is pach’tent. Tiens, ch’veille, ch’étot pon un italien qui étot arrifé in artard, mais min Nicolas. I faudrot qu’in vérifie ch’is n’ont pon acaté ch’même marque d’portape, cha echpliqu’rot bin des cosses. In particulier, l’fait d’rouler d’ches mécaniques…
Rayon numérique :  In a eune gagninte à ch’tirage à ch’sort. Ch’est eune mamie d’pus d’quate-vingts ins qui rimporte che biel empéquate. I s’ra armis par l’arprésintint d’el marque américaine, Mister Obama, in perchonne. La gagninte, Elisabeth, alle n’a pon cor’ donné sin impréchion su ch’nouvieau modèle d’ipod qui est fabriqué par Apple, mais alle che d’minde chi in n’l’a pon prisse pou eune peumme ! In tout cas, alle l’a mis dins ch’poque auchitôt car alle n’a pon invie qu’in croi’te qu’ch’est un nouvieau sonotone. Chertain’mint qu’in a fait l’plein d’musique et qu’in li a collé l’intégral d’Sir Elton. L’seu canteux inglais qui a l’même tailleur qu’Elisabeth. D’ailleurs, cha ch’vot à ch’premier cop d’oeul. Ches mêmes tissus flashis !

Ch’est pon tout cha, mes gins, mais ch’t’heure alle tourn’te. In n’va pon tarder à arfermer ches portes d’euch magasin. I y in a cor’ qui ch’sont fait armarquer ch’ouiquen, mais i fallot bin in chosir chertains. J’n’pouvos pon faire un invintaire complet, in che s’rot artreuvé aveuc un roman. D’toute fachon, i s’ra bin timps d’in parler l’prochaine fos…