Chalut mes gins ! Chi t’es ichi à’ch’t’heure, ch’est qu’tin manicraque informatique i n’ch’est pon fait bouffer par ch’virus d’euch premier avril. In n’saura chertain’mint jamais chi cha a été eune bielle rigolate ou chi in ch’est tertous tell’mint bin protégé qu’i n’a pon été efficache. Tout ch’qu’in peut dir’te, ch’est qu’i existe biel et bin. In tout cas, mi, j’sus bin continte qu’te sos cor’ lal. Je n’em voyos pon écrir’te pou rin ! J’n’sais pon chi te l’as su ou qu’te l’as vu, mais su France deusse, is ont monté un batieau aveuc ches éoliennes. I parôt qu’cha ralintie l’rotachion d’el tierre et qu’in s’ra rapid’mint obligé d’avoir eune vingt-chinquième heure dins eune journée. Min Pujadas qui fait d’l’humour, ch’est eune bionne blague ! 

Bion, in n’est pon ichi pou parler d’ches blagues potaches mais pou un truc gramint pus importint. Infin, in théorie. Ti, in ravisint ch’tite, t’as dû t’dir’te : Cha y est, Marie Toutoule alle va parler d’chul pou faire grimper sin Audimat et faire grimper quéques bébiêtes auchi ! Bin, nin ! Ch’est pach’que j’vais t’faire un point su ch’fameux G20 ! Cha a comminché ch’matin, mais, hier soir, i y avot un dîner chez ch’premier ministre inglais, Gordon Brown. Te armarqu’ras quind même qu’is n’ont pon ossé comminché un premier avril ! Is ch’sont contintés d’eune misse in bouque et cheule echpréchion alle prind tout sin chins aveuc ch’dîner. Pis, ch’est moins formel. Cha permet d’printe des nouvielles d’l’un et d’l’aute. Te sais, un peu com’ des artreuvailles…
In a d’jà failli avoir eune crisse diplomatique su ch’dios, no ches Français. Min Nicolas i a eu un problème. Nin seul’mint i a montré sin sale caractère, avint même d’posser ches pids su cheule île, in menachint d’quitter ches débats chi ch’étot pou bracher d’l’air pou rin. Ch’est vrai qu’li, cha n’li arrife jamais. In pus, i arrife in artard à ch’dîner. In n’peut pon dir’te qu’ch’est eune panne d’oreiller, vu ch’t’heure. Quo qu’ch’est qu’i a pu ch’pacher ? A m’mote, i a dû avoir un problème aveuc ch’Rolex. Alle a dû artarder. A forche d’faire des moulinets aveuc ches bras, alle dot ête toute déboucholée. Alle auchi, alle visse à avoir eune vingt-chinquième heure. A’ch’t’heure, i est p’t-ête toudis à ch’t’heure d’hiver…
Aute echplicachion pochipe, ch’est com’ eune vedette, i ch’fait attinte ! Bah, ch’est con, min Nicolas, t’as raté ch’t’apéro ! In tout cas, cha n’a pon churpris ch’premier ministre inglais qui ch’est impréché d’dir’te que te s’ros bin à timps pou ches intrées et qu’te s’ros cor’ lal pou ch’dessert ! A ch’décharche d’min Nicolas, mes gins, quind in est invité à minger chez ches Inglais, te peux longu’mint hésiter et cha ch’comprind. J’y vais ou j’y vais pon, zatize ze qwéchtion, com’ i disot Hamlet. Pourtint, j’ai lu ch’menu, cha n’étot pon chi mau. Etrinche, chertes, mais ch’est des Inglais.
In intrée, churtout. T’avos d’euch saumon d’Ecosse aveuc des tiots légumes. Bion, cha va. Après l’aute intrée, à m’moten j’ne l’auros pon mis lal. Ch’étot du fromache d’chèvre aveuc des échalotes. Attinchion, ches chèvres alles ne v’notent pon de n’importé d’ù. Nin ! Alles étotent tertoutes d’euch Hertfordshire. Quo qu’cha v’not faire ches échalotes aveuc ch’fromache, ch’est un mychtère… Ch’étot p’t-ête in promo. I n’faut pon oublier qu’ch’est l’crisse. Ches échalotes alles d’votent ête meilleu marché qu’ches rojins. A’ch’t’heure, l’chèvre, ch’étot chertain’mint pou faire l’transichion aveuc ch’plat d’résichtinche ; d’l’agneau. D’toute fachon, is n’avotent pon trop l’chox. Ch’is avotent chervi eune bionne roulette d’porc, à m’mote, i y aurot eu l’mitan qui n’y aurot pon touché !
Du bœuf ? Ouais, ch’est sûr’te, mais cha armue toudis ches mauviais chouv’nirs d’vaques folles. D’l’agneau, ch’est bin. Aveuc des chimpignons, des asperches et des peummes-tierre d’l’île d’Jersey. Quo qu’alles ont d’chi esstraordinaire ches patates ? Cha, j’n’étos pon invitée, mi ! J’n’peux pon t’el dir’te ! I faut qu’j’appell’te Jean-Luc Delarue. Quo ? Ch’est vrai, cha ch’discute ch’chox d’légumes, mais te m’avoueras, que d’chervir des flageolets, à un dîner aveuc toutes ches grosses tiêtes, cha n’s’rot pon l’binv’nu. Imagine quo qui pourrot ch’pacher pindint l’digestion. In frôl’rot ch’t’inchidint diplomatique ou pir’te, eune alerte à ches gasses ! Après ch’étot des tartes aveuc d’el crème. Devine, ti’z’aute, commint qu’alle étot cheule crème ? Bah, j’te l’donn’te in mille, ch’étot d’el crème inglaisse. Véridique, mes gins !
Dernier arrifé, mais premier parti ! Min Nicolas i n’sait toudis pon rechter in plache trop long. Ch’est li qui est arparti ch’premier. In n’sait même pon ch’i a eu ch’timps d’printe un café. Te m’diras, i est d’jà assez existé com’ cha ! P’t-ête bin qu’i avot ram’né sin panier pique-nique que Carlita alle li avot préparé aveuc amour. Quo ? Alle n’étot pon du voyache, cha ne l’impêque pon d’pinser à sin régime. Ch’i n’artreuve pon ches bionnes saveurs d’el France d’ches deusse F favoris, ch’est com’ chertains quind is n’ont pon d’pain à tape ; is n’ont pon mingé ! Li, ch’est p’t-ête parel…
Pis, j’l’intinds d’ichi li dir’te :
- Min amoureux, j’te prépar’te un tiot panier. J’n’ai pon l’invie qu’te t’laiches mourir d’faim. J’em rappell’te quind in est allé vir cheule Reine, l’année dernière. Te n’avos pon mingé gramint. Ichi, i faut qu’te sos in forme, pon in formes. Te n’oublies pon qu’i y aura d’euch bieau linche. Pis auchi l’aute Barack ! Ch’ti qu’in vot acater et minger des imburgères et qui n’prind pon un cintimète d’flotteur. Ch’est pon com’ ti d’ù qu’ches infographistes is sont obligés d’photoshoper tes bourrelets. I y in a et hop, i n’y in a pus ! Ch’est bieau ch’progrès… Mi, ch’est l’inverche. Is m’mettent du rimbourrache pou qu’je n’arsimpe pon trop à Kate moche… Ah, dernier concheil, min amoureux. Te n’abuss’ras pon d’ches bananes. Tertous i sait à’ch’t’heure, mais cha n’est pon eune raison.
- Ma Carlita, quo que j’f’ros chins ti ! J’vais printe auchi eune caiche d’tin CD. In n’sait jamais. Chi j’arrife à in casser eune paire, cha s’ra d’jà cha in moins. T’es sûr’te que te n’veux pon v’nir ?
- Nin ! Tertous i va essayer d’em comparer à cheule Michelle !

V’là, mes gins, in a fait un point su G. Bah, j’ai préféré faire G com’ gastronomie, pach’que ch’est gramint pus intéréchint que d’parler d’ches débats politiques. Cha a quind même un inconvénient. A’ch’t’heure, après avoir parler d’bouffe, mi, G faim !  D’toute fachon, pou tout l’ress’, tertous i va y aller d’bions sintimints. In va tout mette à plat et sauver ch’monte. Pis, dins quéques mos, in aura oublié et cha s’ra toudis ch’même brein partout su cheule Tierre…